ന്യൂഡൽഹി: വയനാട്ടിലെ ജനങ്ങൾ നൽകിയ സ്നേഹത്തിന് ഹൃദയത്തിൽനിന്നും നന്ദി പറഞ്ഞ് നിയുക്ത എംപി രാഹുൽ ഗാന്ധി. പ്രയാസമുള്ള രാഷ്ട്രീയ ഘട്ടങ്ങളിൽ വയനാട്ടിലെ ജനങ്ങൾ നൽകിയ പിന്തുണ മറക്കാനാകില്ലെന്ന് രാഹുൽ പറഞ്ഞു. തന്റെ സഹോദരിയായ പ്രിയങ്ക ഗാന്ധി മത്സരിച്ചാലും താൻ ഇടയ്ക്കിടെ വയനാട്ടിലെത്തുമെന്നും അദ്ദേഹം കൂട്ടിച്ചേർത്തു. ലോക്സഭ തെരഞ്ഞെടുപ്പിൽ വയനാട്ടിൽ നിന്നും റായ്ബറേലിയിൽ നിന്നും രാഹുൽ ജനവിധി തേടിയിരുന്നു. രണ്ട് മണ്ഡലങ്ങളിലും വിജയിച്ച രാഹുൽ വയനാട് ഒഴിയാൻ തീരുമാനിച്ചശേഷം മാധ്യമങ്ങളോട് സംസാരിക്കുകയായിരുന്നു.
‘‘എനിക്ക് വയനാടുമായും റായ്ബറേലിയുമായും വൈകാരിക ബന്ധമുണ്ട്. കഴിഞ്ഞ 5 വർഷമായി വയനാട് എംപിയാണ്. വയനാട്ടിലെ എല്ലാ ആളുകളും പാർട്ടിക്കാരും സ്നേഹം മാത്രമാണ് നൽകിയത്. അതിന് ഹൃദയത്തിൽ നിന്ന് നന്ദി പറയുന്നു. ജീവിതകാലം മുഴുവൻ അതെന്റെ മനസിലുണ്ടാകും. പ്രിയങ്ക വയനാട്ടിൽ മത്സരിക്കും. ഞാനും ഇടവേളകളിൽ വയനാട്ടിലെത്തും. വയനാടിനായി ലക്ഷ്യമിട്ട പദ്ധതികൾ പൂർത്തിയാക്കും. റായ്ബറേലിയുമായി പഴയ ബന്ധമാണുള്ളത്. അവരെ വീണ്ടും ലോക്സഭയിൽ പ്രതിനിധീകരിക്കുന്നതിൽ സന്തോഷമുണ്ട്‘‘ – രാഹുൽ പറഞ്ഞു.
‘‘വയനാട് ഒഴിയുകയെന്നത് എളുപ്പത്തിൽ എടുക്കാൻ കഴിയുന്ന തീരുമാനമായിരുന്നില്ല. പ്രയാസകരമായ തീരുമാനമായിരുന്നു. രണ്ട് മണ്ഡലവുമായും വ്യക്തി ബന്ധമുണ്ട്. അഞ്ച് വർഷത്തെ വയനാട് ബന്ധം സന്തോഷകരമായിരുന്നു. വയനാട്ടിലെ ജനങ്ങൾ പാർട്ടി നോക്കാതെ എനിക്ക് പിന്തുണ നൽകി. പ്രയാസമുള്ള ഘട്ടങ്ങളിൽ അവർ നൽകിയ പിന്തുണ മറക്കാനാകില്ല. പ്രിയങ്ക മത്സരിച്ചാലും ഞാൻ വയനാട്ടിലെത്തും. ജനങ്ങൾക്ക് മുന്നിൽ ഞാനുണ്ടാകും. അവർക്ക് നൽകിയ വാഗ്ദാനം പാലിക്കും. പ്രിയങ്ക വയനാട്ടിൽ ജയിക്കും. ഒരു നല്ല എംപിയായിരിക്കും. വയനാടിന് രണ്ട് എംപിമാരുണ്ടാകും. ഞാനും എന്റെ സഹോദരിയും’’– രാഹുൽ കൂട്ടിച്ചേർത്തു.
