പ്രശസ്ത തെന്നിന്ത്യന് താരം രശ്മിക മന്ദാന തന്റെ ആരാധകരുമായി സോഷ്യല് മീഡിയയിലെ ചോദ്യോത്തര വേളയില് മലയാള സിനിമയോടുള്ള തന്റെ ആരാധന വെളിപ്പെടുത്തി. നടിക്ക് മലയാളം സിനിമ കാണാന് താല്പ്പര്യമുണ്ടോ എന്ന ചോദ്യത്തിന് മലയാള സിനിമ ‘അത്ര ശുദ്ധമാണ്’ എന്നായിരുന്നു മറുപടി. ”നിങ്ങള് തമാശ പറയുകയാണോ.. ലവ് മലയാളം സിനിമ.. മലയാളം സിനിമകള് വളരെ ശുദ്ധമാണ്, ആളുകള് വളരെ സ്നേഹമുള്ളവരാണ്,” താരം കുറിച്ചു.
അതേസമയം താന് ഇനി മുതല് സ്റ്റേജുകളില് പുഷ്പയിലെ ‘സാമി സാമി’ ഗാനത്തിന് നൃത്തം ചെയ്യില്ലെന്നാണ് താരം പറയുന്നത്. ട്വിറ്ററിലെ ‘റഷ് അവര്’ പരിപാടിയില് ആരാധകരുമായി സംസാരിക്കുകയായിരുന്നു താരം. അതിലെ ചോദ്യോത്തരവേളയിലാണ് രശ്മിക ആരാധകനോട് തന്റെ തീരുമാനം വ്യക്തമാക്കിയത്. ഇതിനോടകം തന്നെ താന് നിരവധി വേദികളില് സാമി സാമിയ്ക്ക് നൃത്തം ചെയ്തുകഴിഞ്ഞിട്ടുണ്ട്. ഇനിയും നൃത്തം ചെയ്താല് പ്രായമാവുമ്പോള് നടുവേദന വരുമെന്നും താരം പറയുന്നു.
‘ഒരുപാട് തവണ സാമി സാമിയ്ക്ക് നൃത്തം ചെയ്തുകഴിഞ്ഞു. കുറച്ചുകൂടി പ്രായമാവുമ്പോള് പുറംവേദന വരുമെന്നാണ് തോന്നുന്നത്. എനിക്കുവേണ്ടി നിങ്ങള്ക്ക് ഈ ഗാനത്തിന് എന്തുകൊണ്ട് ചുവടുവെച്ചുകൂടാ?’ എന്നാണ് രശ്മിക ആരാധകന് നല്കിയ മറുപടി. പുഷ്പയുടെ രണ്ടാം ഭാഗമായ ‘പുഷ്പ: ദ റൂള്’ ചിത്രീകരണം പുരോഗമിക്കുകയാണ്. ഫഹദ് ഫാസില് ആണ് ചിത്രത്തില് അല്ലു അര്ജുന്റെ വില്ലനായി എത്തുന്നത്. തെന്നിന്ത്യന് താരം സായ് പല്ലവിയും പുഷ്പ 2വിലുണ്ടാകുമെന്ന് റിപ്പോര്ട്ടുകളുണ്ട്. ഒരു അതിഥി വേഷത്തിലാകും നടി അഭിനയിക്കുക.