പാ രഞ്ജിത്ത് സംവിധാനം ചെയ്ത സിനിമയായിരുന്ന സാർപട്ടാ പരമ്പരൈ. ചിത്രം 2021 ൽ ഒടിടി റിലീസായി എത്തിയിരുന്നു.സാർപട്ടാ പരമ്പരൈ ആമസോൺ പ്രൈം വഴിയാണ് റിലീസായത്. ചിത്രത്തിൽ ആര്യയായിരുന്നു നായകനായി എത്തിയത്. ചിത്രത്തിൽ ആര്യ അവതരിപ്പിച്ച കബിലൻ എന്ന റോൾ ആര്യയുടെ കരിയറിലെ തന്നെ ഏറ്റവും മികച്ച വേഷങ്ങളിൽ ഒന്നായിരുന്നു.
ഇപ്പോഴിതാ ചിത്രത്തിൻറെ രണ്ടാം ഭാഗം പ്രഖ്യാപിച്ചിരിക്കുകയാണ് സംവിധായകൻ പാ രഞ്ജിത്ത്. ആര്യയാണ് ഇതിൻറെ പോസ്റ്റർ സോഷ്യൽ മീഡിയയിൽ പങ്കുവച്ചത്. സാർപട്ടാ പരമ്പരൈ റൌണ്ട് 2 എന്നാണ് സിനിമയ്ക്ക് പേര് നൽകിയിരിക്കുന്നത്. ദുഷാര വിജയൻ, പശുപതി, ജോൺ വിജയ്, കലൈയരസൻ, ജോൺ കോക്കൻ തുടങ്ങിയവരായിരുന്നു സാർപട്ടാ പരമ്പരൈയിലെ താരങ്ങൾ.അതേ സമയം സാർപട്ടാ പരമ്പരൈയിലെ മറ്റ് അഭിനേതാക്കളും അണിയറപ്രവർത്തകരും പുതിയ ചിത്രത്തിൽ തിരിച്ചുവരുമോ എന്നത് സംബന്ധിച്ച വിവരങ്ങൾ ഒന്നും തന്നെ പ്രഖ്യാപിച്ചിട്ടില്ല.
സന്തോഷ് നാരായണൻ സംഗീതം നൽകിയ സാർപട്ടാ പരമ്പരൈയുടെ നിർമ്മാണം സംവിധായകൻ പാ രഞ്ജിത്ത് തന്നെയായിരുന്നു. സാർപട്ടാ പരമ്പരൈ റൌണ്ട് 2 പാ രഞ്ജിത്തിന്റെ സ്വന്തം ബാനറായ നീലം പ്രൊഡക്ഷൻസും ആര്യയുടെ ഹോം ബാനറായ ദി ഷോ പീപ്പിൾ, ജതിൻ സേത്തിയുടെ നാട് സ്റ്റുഡിയോസ് എന്നിവർ ചേർന്നാണ് നിർമ്മിക്കുന്നത്. വടക്കൻ ചെന്നൈയിലെ ബോക്‌സിംഗ് ടീമുകളുടെ തമ്മിലുള്ള പോരാട്ടവും, കുടിപ്പകയുമായിരുന്നു സാർപട്ടാ പരമ്പരൈ പ്രമേയം
