ലിജോ ജോസ് പെല്ലിശേരിയുടെ മലൈക്കോട്ടൈ വാലിബൻ കഴിഞ്ഞ മാസമാണ് തിയേറ്ററുകളിലെത്തിയത്. വമ്പൻ ഹൈപ്പോടെ വന്ന ചിത്രത്തിന് ആദ്യ ഷോ കഴിഞ്ഞതോടെ സമ്മിശ്ര പ്രതികരണങ്ങളാണ് വന്നത്. മാസ് പ്രതീക്ഷിച്ച് പോയവരെല്ലാം ചിത്രം നിരാശയാണ് നൽകുന്നതെന്നാണ് സോഷ്യൽ മീഡിയയിൽ കുറിച്ചത്. എന്നാൽ, പതിയെ പതിയെ ചിത്രത്തിന് പൊസിറ്റീവ് അഭിപ്രായങ്ങൾ വന്നു തുടങ്ങി. ലിജോ ഒരുക്കി വച്ച മാജിക്കിനെ ഇഷ്ടപ്പെട്ട് ഒരുപാട് പ്രതികരണങ്ങൾ സാമൂഹ്യ മാധ്യമങ്ങളിൽ നിറഞ്ഞു. ഇപ്പോള്‍ ചിത്രത്തെ കുറിച്ച് വന്ന ഒരു കുറിപ്പ് വലിയ രീതിയിൽ ചര്‍ച്ച ചെയ്യപ്പെടുന്നുണ്ട്. മലയാളത്തില്‍ ഇന്നേ വരെ കണ്ടിട്ടില്ലാത്ത തരം ഒരു ക്ലാസ്സിക്‌ സിനിമ എടുത്ത്‌ വച്ചിട്ട്‌ അത്‌ മനസിലാക്കാന്‍ പോലും കഴിയാത്ത ഭൂരിഭാഗം ഓഡിയന്‍സ്‌ കാരണം വിശദീകരണങ്ങള്‍ നടത്തേണ്ടി വന്നതില്‍ ഒരു നാള്‍ എല്ലാവരും ലിജോ ജോസിനോട്‌ ക്ഷമ ചോദിക്കുമെന്ന് വിഷ്ണു എൻ എസ് കുറിച്ചിരിക്കുന്നത്.
കുറിപ്പ് വായിക്കാം
മലയാളത്തില്‍ ഇന്നേ വരെ കണ്ടിട്ടില്ലാത്ത തരം ഒരു ക്ലാസ്സിക്‌ സിനിമഎടുത്ത്‌ വച്ചിട്ട്‌ അത്‌ മനസിലാക്കാന്‍ പോലും കഴിയാത്ത ഭൂരിഭാഗം ഓഡിയന്‍സ്‌ കാരണം വിശദീകരണങ്ങള്‍ നടത്തേണ്ടി വന്നതില്‍ ഒരു നാള്‍ എല്ലാവരും ലിജോ ജോസിനോട്‌ ക്ഷമ ചോദിക്കും. പണ്ട്‌ തിയേറ്ററില്‍ പരാജയപ്പെട്ടിട്ട്‌ പിന്നീട്‌ വാഴ്ത്തി പാടിയ മോഹന്‍ലാല്‍ സിനിമകളുടെ ലിസ്റ്റിലേക്‌ (ദേവദൂതന്‍, തൂവാന തുമ്പികള്‍) ഒരു സിനിമ കുടി വരാതിരിക്കാന്‍ ഇപ്പോഴും എല്ലാവര്‍ക്കും അവസരം ഉണ്ട്‌. തീയേറ്ററില്‍ തന്നെ കണ്ടിരിക്കേണ്ട ഓരോ ഫ്രേമുകളും ഓരോ കാവ്യങ്ങള്‍ പോലെ എടുത്തുവച്ചിരിക്കുന്ന ഒരു ചിത്രം. ലൂസിഫറിനു ശേഷം ലാലേട്ടന്റെ ഏറ്റവും മികച്ച പെര്‍ഫോമന്‍സ്‌. മറ്റാര്‍ക്കും ചെയ്യാനാകാത്ത റോള്‍. മികച്ച ക്യാമറ, ഡിയറക്ഷന്‍, ആര്‍ട്ട്‌, മ്യൂസിക്‌.
