പൊലീസ് ഉദ്യോഗസ്ഥർ മാധ്യമങ്ങൾക്ക് കേസ് വിവരം കൈമാറുന്നതിന് വിലക്ക്. അന്വേഷണ വിവരങ്ങൾ മാധ്യമങ്ങൾക്ക് നൽകരുതെന്ന് സംസ്ഥാന പോലീസ് മേധാവി (ഡിജിപി ) റവാഡ ചന്ദ്രശേഖർ ഉത്തരവിറക്കി.
പ്രോസിക്യൂഷൻ ഡയറക്ടർ ജനറലിന്റെ കത്തിന്റെ അടിസ്ഥാനത്തിലാണ് ഇത്തരമൊരു നടപടിയെന്നാണ് ഉത്തരവിൽ പറയുന്നത്. കേസുകളിലെ കുറ്റസമ്മത മൊഴി കോടതിയുടെ മുന്നിൽ പ്രധാന തെളിവല്ലെന്നും, പ്രതികളുടെ കുറ്റസമ്മത മൊഴിയെന്ന രീതിയിൽ മാധ്യമങ്ങൾക്ക് വിവരങ്ങൾ കൈമാറുന്നത് പൊതു ജനങ്ങൾക്കിടയിൽ തെറ്റിദ്ധാരണയ്ക്ക് ഇടയാക്കുമെന്നും ഉത്തരവിൽ പറയുന്നു. പ്രതികളുടെ കുറ്റസമ്മത മൊഴി വിവരങ്ങൾ കൈമാറരുതെന്നാണ് കർശന നിർദേശം.
കേസുകളുടെ പ്രധാന അന്വേഷണ പുരോഗതി സംബന്ധിച്ച വിവരങ്ങളും മാധ്യമങ്ങൾക്ക് കൈമാറരുതെന്നും നിർദേശമുണ്ട്. ഇക്കാര്യത്തിൽ മേലുദ്യോഗസ്ഥർ കൃത്യമായ നിരീക്ഷണം നടത്തണമെന്നും ഡിജിപി സർക്കുലറിൽ പറയുന്നു. ശബരിമല സ്വർണക്കവർച്ച കേസ് ഉൾപ്പടെ ഉള്ള കേസുകൾ അതീവരഹസ്യ സ്വഭാവത്തിൽ അന്വേഷിക്കണമെന്ന് നേരത്തെ തന്നെ ഹൈക്കോടതി നിർദേശം നൽകിയിരുന്നു.
