തിരുവനന്തപുരം: നടൻ പ്രേംകുമാറിനെ പുതിയ കെ.എസ്.എഫ്.ഡി.സി (KSFDC) ചെയർമാനായി നിയമിച്ചതിലും അദ്ദേഹത്തിന് രാഷ്ട്രീയ പരിഗണനകൾ നൽകുന്നതിലും വിമർശനവുമായി കേരള ഫിലിം ചേംബർ ഓഫ് കൊമേഴ്സ് പ്രസിഡന്റും സാംസ്കാരിക പ്രവർത്തകനുമായ അനിൽ തോമസ്. ഇടത് സർക്കാരുമായി തെറ്റിപ്പിരിഞ്ഞു വന്നയുടൻ പ്രേംകുമാറിന് ഉന്നത പരിഗണന നൽകുന്നത്, വർഷങ്ങളായി കോൺഗ്രസിനും യു.ഡി.എഫിനും വേണ്ടി സാംസ്കാരിക രംഗത്ത് നിലകൊണ്ടവരെ അവഹേളിക്കുന്നതിന് തുല്യമാണെന്ന് അദ്ദേഹം ആരോപിച്ചു.
പാർട്ടിയോടും കോൺഗ്രസ് ആശയങ്ങളോടും എന്നും വിശ്വസ്തത പുലർത്തിപ്പോരുന്ന നിരവധി കലാകാരന്മാരും പ്രമുഖരും സാംസ്കാരിക രംഗത്തുണ്ട്. എന്നാൽ എൽ.ഡി.എഫ് സർക്കാരിൽ നിന്ന് ഭാരവാഹിത്വങ്ങൾ നഷ്ടപ്പെട്ടതിന് ശേഷം മാത്രം നിലപാടുകൾ മാറ്റുന്നവർക്ക് ഇത്തരം പ്രധാന തസ്തികകളും വേദികളും നൽകുന്നത് പാർട്ടി പ്രവർത്തകരിൽ നിരാശയുണ്ടാക്കുമെന്നും അനിൽ തോമസ് ചൂണ്ടിക്കാട്ടി.
ഇടത് ഭരണസമിതികളിൽ നിന്ന് പുറത്താക്കപ്പെടുമ്പോൾ മാത്രം പ്രതിപക്ഷ പാളയങ്ങളിലേക്ക് എത്തുന്നവരുടെ അവസരവാദ നിലപാടുകളെ പിന്തുണയ്ക്കുന്നത് ശരിയായ രാഷ്ട്രീയ നീക്കമല്ലെന്ന് അദ്ദേഹം പറഞ്ഞു. ഇത്തരം തീരുമാനങ്ങൾ യു.ഡി.എഫിന്റെ സാംസ്കാരിക മേഖലയിലെ അടിത്തറയെ ശക്തിപ്പെടുത്താൻ സഹായിക്കില്ലെന്നും അദ്ദേഹം കൂട്ടിച്ചേർത്തു.
