ബോക്‌സോഫീസിൽ റെക്കോർഡ് നേട്ടങ്ങളുമായി മുന്നേറുകയാണ് നിതേഷ് തിവാരി സംവിധാനം ചെയ്ത രൺബീർ കപൂർ ചിത്രം ‘രാമായണ’. റിലീസ് ചെയ്ത് ആദ്യ ദിവസങ്ങളിൽ തന്നെ വമ്പൻ കളക്ഷൻ സ്വന്തമാക്കിയ ചിത്രം ആഗോള ബോക്‌സോഫീസിൽ ആയിരം കോടി ക്ലബ്ബിലും ഇടംപിടിച്ചു. എന്നാൽ ഇത്ര വലിയ നേട്ടം സ്വന്തമാക്കിയിട്ടും നിർമാതാക്കൾക്ക് പ്രതീക്ഷിച്ച ലാഭം ലഭിക്കാൻ ഇനിയും ഏറെ ദൂരം സഞ്ചരിക്കേണ്ടിവരുമെന്നാണ് പുറത്തുവരുന്ന റിപ്പോർട്ടുകൾ. ചിത്രത്തിന്റെ വൻ നിർമാണച്ചെലവാണ് ഇതിന് പ്രധാന കാരണം.
റിപ്പോർട്ടുകൾ പ്രകാരം റിലീസ് ചെയ്ത് വെറും എട്ട് ദിവസത്തിനുള്ളിൽ 1000 കോടി രൂപയുടെ ആഗോള ഗ്രോസ് കളക്ഷനാണ് ചിത്രം നേടിയത്. പത്താം ദിവസമായപ്പോഴേക്കും കളക്ഷൻ 1033.55 കോടി രൂപയിലെത്തി. ഒരു ഇന്ത്യൻ സിനിമയെ സംബന്ധിച്ച് ഇത് വലിയ ബോക്‌സോഫീസ് നേട്ടമാണെങ്കിലും ചിത്രത്തിന്റെ ആകെ ബജറ്റുമായി താരതമ്യം ചെയ്യുമ്പോൾ ഈ വരുമാനം മതിയാകില്ലെന്നാണ് വിലയിരുത്തൽ.
രണ്ട് ഭാഗങ്ങളിലായി ഒരുങ്ങുന്ന രാമായണയുടെ ആകെ നിർമാണ ബജറ്റ് ഏകദേശം 500 ദശലക്ഷം ഡോളറാണ്. ഇന്ത്യൻ രൂപയിൽ ഇത് ഏകദേശം 4700 കോടി വരും. അതായത് ഓരോ ഭാഗത്തിനും ശരാശരി 2350 കോടി രൂപ ചെലവ് പ്രതീക്ഷിക്കുന്നു. ഈ കണക്കുകൾ പരിഗണിക്കുമ്പോൾ ആദ്യ ഭാഗത്തിന്റെ ബോക്‌സോഫീസ് വരുമാനം കൊണ്ട് മാത്രം നിർമാണച്ചെലവ് തിരിച്ചുപിടിക്കുക എളുപ്പമല്ല.
എന്നാൽ തിയേറ്റർ കളക്ഷൻ മാത്രമല്ല ചിത്രത്തിന്റെ വരുമാനമാർഗം. ഒടിടി, സാറ്റലൈറ്റ്, സംഗീത അവകാശങ്ങളുടെ വിൽപ്പനയിലൂടെയും വലിയ തുക ലഭിക്കും. സ്ട്രീമിങ്, സാറ്റലൈറ്റ് അവകാശങ്ങൾ വിറ്റതിലൂടെ ഇതിനകം 450 മുതൽ 550 കോടി രൂപ വരെ ലഭിച്ചിട്ടുണ്ടെന്നാണ് റിപ്പോർട്ടുകൾ. സാക്നിൽക് പുറത്തുവിട്ട വിവരങ്ങൾ പ്രകാരം അവകാശങ്ങൾ സ്റ്റാർ നെറ്റ്‌വർക്കിനാണ് വിറ്റിരിക്കുന്നത്. ജിയോ ഹോട്ട്സ്റ്റാറിൽ പേ-പെർ-വ്യൂ മാതൃകയിലും ചിത്രം ലഭ്യമാകുമെന്നാണ് സൂചന.
ഇതിന് പുറമെ ചിത്രത്തിന്റെ രണ്ട് ഭാഗങ്ങളുടെയും സംഗീതാവകാശങ്ങൾക്കായി ടി-സീരീസുമായി 75 മുതൽ 100 കോടി രൂപ വരെയുള്ള കരാറിലും നിർമാതാക്കൾ എത്തിയതായി റിപ്പോർട്ടുകളുണ്ട്. ഈ വരുമാനങ്ങളെല്ലാം കൂട്ടിയാലും 2350 കോടി രൂപ എന്ന ശരാശരി ബജറ്റിനോട് അടുക്കാൻ ഇനിയും 600-700 കോടി രൂപയുടെ കുറവുണ്ടെന്നാണ് കണക്കുകൂട്ടൽ.
രണ്ടാം ഭാഗം കൂടി പുറത്തിറങ്ങുന്നതോടെ മാത്രമേ നിർമാതാക്കൾക്ക് വലിയ സാമ്പത്തിക നേട്ടം പ്രതീക്ഷിക്കാനാകൂ. എന്നാൽ രണ്ടാം ഭാഗത്തിനായി 2028 വരെ കാത്തിരിക്കേണ്ടിവരുമെന്നാണ് റിപ്പോർട്ടുകൾ. അതിനാൽ ആദ്യ ഭാഗത്തിന്റെ വരും ദിവസങ്ങളിലെ ബോക്‌സോഫീസ് പ്രകടനം ഏറെ നിർണായകമാണ്.
വിദേശ വിപണികളിലാണ് നിർമാതാക്കളുടെ പ്രധാന പ്രതീക്ഷ. പ്രത്യേകിച്ച് ചൈനീസ് വിപണിയിൽ ചിത്രം മികച്ച പ്രകടനം കാഴ്ചവെക്കുമെന്നാണ് വിലയിരുത്തൽ. ആമിർ ഖാന്റെ ‘ദംഗൽ’ ചൈനയിൽ നിന്ന് മാത്രം ഏകദേശം 1305 കോടി രൂപ നേടിയിരുന്നു. ഇന്തോനേഷ്യ, വിയറ്റ്നാം, മലേഷ്യ തുടങ്ങിയ തെക്കുകിഴക്കൻ ഏഷ്യൻ രാജ്യങ്ങളിൽ നവംബർ 11ന് രാമായണ റിലീസ് ചെയ്തതും ചിത്രത്തിന് പ്രതീക്ഷ നൽകുന്നുണ്ട്.
നവംബർ 27 വരെ ഹിന്ദി വിപണിയിൽ വലിയ റിലീസുകൾ ഇല്ലാത്തതും രാമായണയ്ക്ക് അനുകൂല ഘടകമാണ്. സൂരജ് ബർജാത്യയുടെ ‘യേ പ്രേം മോൾ ലിയ’, ആദിത്യ ദത്തിന്റെ ‘ഗൺമാസ്റ്റർ ജി9’ എന്നീ ചിത്രങ്ങൾ റിലീസ് ചെയ്യുന്നതോടെയാകും പ്രധാന മത്സരം ശക്തമാകുക. ഈ ഇടവേള പരമാവധി പ്രയോജനപ്പെടുത്തി ബോക്‌സോഫീസിൽ കൂടുതൽ നേട്ടമുണ്ടാക്കാനാണ് അണിയറപ്രവർത്തകരുടെ ശ്രമം.
ഇതിനിടെ രാമായണയെ മൂന്ന് ഭാഗങ്ങളുള്ള സിനിമാ പരമ്പരയാക്കാനുള്ള സാധ്യതയും സഹനിർമാതാവ് നമിത് മൽഹോത്ര പരിഗണിക്കുന്നതായാണ് റിപ്പോർട്ടുകൾ. നിലവിലുള്ള ബജറ്റിൽ തന്നെ മൂന്നാം ഭാഗം ഒരുക്കാൻ സാധിച്ചാൽ കൂടുതൽ വരുമാനം നേടാനുള്ള അവസരമുണ്ടാകും. മൂന്നാം ഭാഗത്തിലൂടെ ഫ്രാഞ്ചൈസിയുടെ സാമ്പത്തിക നേട്ടം വർധിപ്പിക്കാനാകുമെന്ന പ്രതീക്ഷയും ഇതിന് പിന്നിലുണ്ട്.
അതേസമയം, രാമായണയുടെ ബോക്‌സോഫീസ് പ്രകടനവുമായി താരതമ്യം ചെയ്യുമ്പോൾ വലിയ ലാഭം സ്വന്തമാക്കിയ മറ്റൊരു ചിത്രമാണ് രൺവീർ സിംഗ് നായകനായ ആദിത്യ ധർ ചിത്രം ‘ധുരന്ധർ’. ഏകദേശം 255 കോടി രൂപ ബജറ്റിൽ നിർമിച്ച ചിത്രത്തിന്റെ രണ്ട് ഭാഗങ്ങളും 2025 ഡിസംബറിലും 2026 മാർച്ചിലുമായി റിലീസ് ചെയ്തുവെന്നാണ് റിപ്പോർട്ടുകൾ.
ആദ്യ ഭാഗം ആഭ്യന്തര ബോക്‌സോഫീസിൽ നിന്ന് 895.96 കോടി രൂപയും ആഗോളതലത്തിൽ 1356 കോടി രൂപയും സ്വന്തമാക്കി. രണ്ടാം ഭാഗമായ ‘ധുരന്ധർ 2: ദ റിവഞ്ച്’ എത്തുന്നതിന് മുമ്പ് ആദ്യ ഭാഗം നെറ്റ്ഫ്ലിക്സിലും റിലീസ് ചെയ്തിരുന്നു. ഇത് രണ്ടാം ഭാഗത്തിന് വലിയ പ്രചാരണം നൽകുകയും പ്രേക്ഷകരിൽ ആവേശം വർധിപ്പിക്കുകയും ചെയ്തു.
ഇതിന്റെ ഫലമായി രണ്ടാം ഭാഗം ആഭ്യന്തര ബോക്‌സോഫീസിൽ 1375 കോടി രൂപയും ആഗോളതലത്തിൽ 1852 കോടി രൂപയും നേടിയെന്നാണ് റിപ്പോർട്ടുകൾ. രണ്ട് ഭാഗങ്ങളുടെയും നേട്ടം കൂടി കണക്കിലെടുക്കുമ്പോൾ ധുരന്ധർ ഫ്രാഞ്ചൈസിയുടെ ആകെ ആഗോള ബോക്‌സോഫീസ് കളക്ഷൻ 3280 കോടി രൂപയിലെത്തി.
ആയിരക്കണക്കിന് കോടി രൂപയുടെ കളക്ഷൻ നേടിയിട്ടും നിർമാണച്ചെലവ് കാരണം ലാഭത്തിന്റെ കാര്യത്തിൽ വെല്ലുവിളി നേരിടുന്ന രാമായണയ്ക്ക് ധുരന്ധറിനെപ്പോലെ വലിയൊരു വിജയഫ്രാഞ്ചൈസിയാകാൻ സാധിക്കുമോ എന്നതാണ് ഇനി അറിയേണ്ടത്. മൂന്നാം ഭാഗം കൂടി എത്തുമോ, അതോ രണ്ടാം ഭാഗത്തിലൂടെ തന്നെ നിർമാതാക്കൾ ലക്ഷ്യമിടുന്ന നേട്ടം സ്വന്തമാക്കുമോ എന്നറിയാൻ കാത്തിരിക്കുകയാണ് സിനിമാപ്രേമികൾ.
