എൽസിയു ആരാധകരെ നിരാശപ്പെടുത്തുന്നൊരു വാർത്ത പങ്കുവച്ച് സംവിധായകൻ ലോകേഷ് കനകരാജ്. അടുത്ത മൂന്ന് സിനിമകളോടെ ലോകേഷ് സിനിമാറ്റിക് യൂണിവേഴ്സിലുള്ള സിനിമകൾ അവസാനിക്കുമെന്ന് ലോകേഷ് വെളിപ്പെടുത്തി. വിജയ് ആരാധകരെ നിരാശപ്പെടുത്തുന്ന വാർത്തയാണ് അദ്ദേഹം പറഞ്ഞത് .
വിക്രം 2 ആയിരിക്കും ഈ യൂണിവേഴ്സിലെ അവസാന സിനിമ എന്ന് സംവിധായകൻ ലോകേഷ് അറിയിച്ചു . ഹോളിവുഡ് റിപ്പോർട്ടറിന് നൽകിയ അഭിമുഖത്തിൽ സംസാരിക്കുകയായിരുന്നു ലോകേഷ് കനകരാജ്.
എൽസിയുവിന്റെ ഭാഗമായി ഉടൻ തന്നെ കൈതി 2 ആരംഭിക്കുമെന്നും അതിന് ശേഷം റോളക്സിന്റെ സ്റ്റാൻഡ് എലോൺ സിനിമ ചെയ്യുമെന്നും ലോകേഷ് പറയുന്നു. റോളക്സിന്റെ സിനിമ ചെയ്താൽ മാത്രമേ വിക്രം 2 ചെയ്യാൻ സാധിക്കുകയുള്ളൂ. വിക്രം 2 വോടെ എൽസിയു അവസാനിക്കുമെന്നും അദ്ദേഹം വ്യക്തമാക്കി.
‘ലിയോ 2’ ചെയ്യാൻ ആഗ്രഹമുണ്ടായിരുന്നുവെന്നും പക്ഷേ വിജയ് അഭിനയം നിർത്തുന്നുവെന്ന് പ്രഖ്യാപിച്ചതോടെ അതിനി നടക്കില്ലെന്നും ലോകേഷ് പറഞ്ഞു. ‘‘വിജയ് സർ ഇനി അഭിനയിക്കുമോ എന്നറിയില്ല. തമിഴ്നാട് മുഴുവൻ അദ്ദേഹത്തിന്റെ തീരുമാനത്തിൽ ഞെട്ടിപ്പോയി. വിജയ് സാറിന്റെ ചിന്തകള് തന്നെ ഇപ്പോൾ മറ്റൊരു തലത്തിലാണ്. എന്നാൽ ആ തീരുമാനത്തെ നാം മാനിക്കണം. ഇല്ലെങ്കിൽ, ഞാൻ അദ്ദേഹത്തോടൊപ്പം ‘ലിയോ 2’ ചെയ്യുമായിരുന്നു. ഒരുപക്ഷേ ലിയോ 2 അല്ലെങ്കിൽ വിക്രം 2 എൽസിയുവിന്റെ ഗ്രാൻഡ് ഫിനാലെ ആയേനെ.’’–ലോകേഷിന്റെ വാക്കുകൾ.
2019ൽ പുറത്തിറങ്ങിയ ‘കൈതി’ എന്ന കാർത്തിയുടെ സിനിമയിലൂടെയാണ് ലോകേഷ് കനകരാജ് യൂണിവേഴ്സിന് തുടക്കമിട്ടത്. പിന്നീട് കമൽ ഹാസനെ നായകനാക്കി വിക്രം എന്ന സിനിമയിലൂടെ ഈ യൂണിവേഴ്സ് തെന്നിന്ത്യ മുഴുവൻ ചർച്ചയാവുകയും ചെയ്തു. വിക്രത്തിൽ ഫഹദ് ഫാസിലും പ്രധാന വേഷം ചെയ്തിരുന്നു. വിജയ് ചിത്രം ‘ലിയോ’ ആണ് എൽസിയുവിന്റെ ഭാഗമായി ഒടുവിൽ പുറത്തിറങ്ങിയത്.
എൽസിയുവിന്റെ ഭാഗമായി പുറത്തിറങ്ങിയ 3 ചിത്രങ്ങളും വൻ വിജയം കൈവരിച്ച് ബോക്സ് ഓഫീസ് കീഴടക്കിയിരുന്നു . അവസാനം പുറത്തിറങ്ങിയ വിജയ് ചിത്രം ലിയോ ആയിരുന്നു ഏറ്റവും കൂടുതൽ കളക്ഷൻ നേടിയത് . 600 കൂടിയായിരുന്നു ചിത്രം മൊത്തത്തിൽ നേടിയത് . രജിനികാന്തിനെ നായകനാക്കി ‘കൂലി’ യാണ് ലോകേഷിന്റേതായി ഇനി റിലീസിന് കാത്തിരിക്കുന്ന ചിത്രം .
