മലയാള സിനിമാ പ്രേക്ഷകർ ഏറെ സ്വീകാര്യതയോടെ നോക്കി കണ്ട നടിയാണ് മാധവി. ആന്ധ്രാക്കാരിയായ മാധവിക്ക് മലയാളത്തിൽ അനശ്വരമായ ഒരുപിടി കഥാപാത്രങ്ങൾ അവതരിപ്പിക്കാൻ കഴിഞ്ഞു. ആകാശദൂത്, ഒരു വടക്കൻ വീരഗാഥ തുടങ്ങിയ സിനിമകൾ ഇതിന് ഉദാഹരണമാണ്. തെലുങ്കിലും തമിഴിലും ഹിന്ദിയിലും കന്നഡയിലുമായി മാധവി 300 സിനിമകളിലോളം അഭിനയിച്ചിട്ടുണ്ട്. എൺപതുകളിലെ തിരക്കേറിയ നടിയായിരുന്ന മാധവി ഏറെക്കാലമായി അഭിനയ രംഗത്ത് നിന്നും മാറി നിൽക്കുകയാണ് താരം. ഭർത്താവിനും മക്കൾക്കുമൊപ്പം അമേരിക്കയിലാണ് മാധവി താമസിക്കുന്നത്. റാൾഫ് ശർമ്മയെന്നാണ് മാധവിയുടെ ഭർത്താവിന്റെ പേര്. മാധവിയുടെ ജീവിതത്തെക്കുറിച്ച് മുമ്പൊരിക്കൽ സംവിധായകൻ ശാന്തിവിള ദിനേശ് പങ്കുവെച്ച വിവരങ്ങളാണിപ്പോൾവീണ്ടും ശ്രദ്ധ നേടുന്നത്. ആംഡബര ജീവിതമാണ് അമേരിക്കയിൽ മാധവി നയിക്കുന്നതെന്ന് ശാന്തിവിള ദിനേശ് അന്ന് ചൂണ്ടിക്കാട്ടി. പറഞ്ഞാാൽ എത്ര പേർ വിശ്വസിക്കുമെന്ന് അറിയില്ല. 44 ഏക്കർ സ്ഥലത്ത് കൊട്ടാരം പോലെയുള്ള വീട്ടിലാണ് മാധവി കഴിയുന്നത്.
വിമാനം പറത്താനുള്ള ലൈസൻസ് മാധവി എടുത്തിട്ടുണ്ട്. ഭർത്താവിന് വിമാനമുണ്ട്. മാധവി വിമാനമോടിക്കുന്ന വീഡിയോ കണ്ടാൽ ഞെട്ടിപ്പോകും. ഇവിടെ ശതകോടീശ്വരൻമാരായ ഒരുപാട് സിനിമാക്കാർ ഉണ്ടെങ്കിലും മാധവിക്ക് എല്ലാ സൗഭാഗ്യങ്ങളും ദൈവം കൊടുത്തു. നല്ലൊരു ഭർത്താവിനെയും മൂന്ന് പെൺകുട്ടികളെയും കൊടുത്തു. കോടികൾ ആസ്തി. ഭർത്താവിന്റെ ബിസിനസും മൂന്ന് പെൺകുട്ടികളെയും നോക്കി സുഖമായി അമേരിക്കയിൽ ജീവിക്കുന്നു. കണ്ണ് കൊണ്ടാണ് മാധവി അഭിനയിച്ചത്. കണ്ണ് ഏറ്റവും നന്നായി അഭിനയത്തിൽ ഉപയോഗിച്ച നടിയാണ് മാധവിയെന്നും ശാന്തിവിള ദിനേശ് അഭിപ്രായപ്പെട്ടു. വടക്കൻ വീരഗാഥയിലെ ഉണ്ണിയാർച്ചയാകാനായി മലയാളത്തിലെ ഏതൊക്കെയോ നായികമാരെ കണ്ടിരുന്നു. പക്ഷെ മുലക്കച്ച കെട്ടി അഭിനയിക്കണമെന്ന് പറഞ്ഞപ്പോൾ പലരും പല കാരണങ്ങൾ പറഞ്ഞ് പിന്മാറി. അവരെല്ലാം പിന്മാറിയത് നന്നായെന്ന് ഞാൻ പറയും. അവരുടെ ഉണ്ടക്കണ്ണ് വെച്ചുള്ള പ്രകടനം കണ്ട് ചന്തുവല്ല ആരായാലും വീണ് പോകുമെന്നും ശാന്തിവിള ദിനേശ് പറഞ്ഞു. ആകാശദൂത് എന്ന സിനിമ ചെയ്തപ്പോൾ ഡെന്നിസ് ജോസഫും സിബിമലയിലും ആരെ ഈ വേഷം ചെയ്യിക്കാമെന്ന് നോക്കി. ആരും ആ വേഷം ചെയ്യാൻ തയ്യാറായില്ല. നായകൻമാർ പോലും മക്കളുണ്ട് എന്ന് പറഞ്ഞാൽ പോടോ എന്ന് പറയും. നാല് കുട്ടികളുടെ അമ്മയായി മാധവി അഭിനയിച്ചു.
സിനിമ ഹിറ്റായെന്നും ശാന്തിവിള ദിനേശ് ചൂണ്ടിക്കാട്ടി. ആയിരം നാവുള്ള അനന്തൻ എന്ന മലയാള സിനിമയിലാണ് അവസാനമായി മാധവി അഭിനയിച്ചത്. ഈ സിനിമ റിലീസ് ചെയ്ത വർഷം തന്നെ മാധവിയുടെ വിവാഹവും നടന്നു. നാല് തവണ മാധവി വിവാഹിതയായെന്നും ശാന്തിവിള ദിനേശ് ചൂണ്ടിക്കാട്ടി. ബിസിനസുകാരനായ റാൽഫ് ശർമ്മയെയാണ് മാധവി വിവാഹം ചെയ്തത്. പാതി ഇന്ത്യക്കാരനും പാതി ജർമ്മൻകാരനും. സ്വാമി രാമയുടെ ഭക്തനായിരുന്നു ഇദ്ദേഹം. മാധവി ഈ സ്വാമിയുടെ ശിഷ്യയും. സ്വാമിയുടെ ഉപദേശ പ്രകാരമാണ് രണ്ട് പേരുടെയും വിവാഹം നടന്നത്. മാധവിയുടെ വിവാഹം നാല് പ്രാവശ്യം നടത്തേണ്ടി വന്നു. അമേരിക്കയിൽ വെച്ച് ആദ്യം കല്യാണം നടത്തി. പിന്നീട് അമേരിക്കയിലുള്ള അമ്പലത്തിൽ വെച്ച് താലി കെട്ടി. ഇത് കഴിഞ്ഞ് നിന്റെ കല്യാണം തിരുപ്പതിയിൽ വെച്ച് നടത്തണമെന്ന് കുട്ടിക്കാലം മുതൽ ആഗ്രഹിച്ചതാണെന്ന് മാധവിയുടെ അച്ഛനും അമ്മയും പറഞ്ഞു. അങ്ങനെ തിരുപ്പതിയിൽ വെച്ച് കല്യാണം നടത്തി. പിന്നീട് റാൽഫിന്റെ ആഗ്രഹ പ്രകാരം ഗുരുവിന്റെ ആശ്രമത്തിൽ വെച്ച് നാലാമതും വിവാഹ ചടങ്ങ് നടന്നെന്നും ശാന്തിവിള ദിനേശ് ചൂണ്ടിക്കാട്ടി.
