പ്രഭാസ് ചിത്രം ‘രാജാ സാബ്’ തിയറ്ററുകളിൽ എത്തിയ ജനുവരി 9-ന്, സിനിമയുടെ പ്രമോഷനിടെ തനിക്ക് നേരിടേണ്ടി വന്ന ദുരനുഭവത്തെക്കുറിച്ച് മനസ്സ് തുറന്നിരിക്കുകയാണ് നടി നിധി അഗർവാൾ. കഴിഞ്ഞ മാസം ഹൈദരാബാദിലെ ലുലു മാളിൽ നടന്ന സംഭവത്തിൽ താൻ അതീവ അസ്വസ്ഥയായിരുന്നുവെന്നും അതൊരു ‘നിർഭാഗ്യകരമായ സംഭവം’ ആയിരുന്നുവെന്നും താരം ഒരു അഭിമുഖത്തിൽ വെളിപ്പെടുത്തി. ചിത്രത്തിലെ ‘സഹാന സഹാന’ എന്ന ഗാനത്തിന്റെ ലോഞ്ചിനായി എത്തിയപ്പോഴാണ് ആയിരക്കണക്കിന് വരുന്ന ആൾക്കൂട്ടം താരത്തെ വളഞ്ഞത്.
സുരക്ഷാ ഉദ്യോഗസ്ഥരുടെ വലയം ഭേദിച്ച് ആളുകൾ താരത്തെ സ്പർശിക്കാനും സെൽഫിയെടുക്കാനും ശ്രമിക്കുന്ന വീഡിയോകൾ അന്ന് സോഷ്യൽ മീഡിയയിൽ വൈറലായിരുന്നു. വസ്ത്രത്തിൽ പിടിച്ച് വലിച്ചും ഉന്തും തള്ളും ഉണ്ടാക്കിയും ആരാധകർ പരിധി ലംഘിച്ചപ്പോൾ നിധി ഭയചകിതയാകുന്നത് വീഡിയോയിൽ വ്യക്തമായിരുന്നു. “ആ ദിവസത്തെക്കുറിച്ച് എനിക്ക് ഒരുപാട് കാര്യങ്ങൾ സംസാരിക്കാനുണ്ട്, എന്നാൽ ഇതൊരു വളരെ സെൻസിറ്റീവ് ആയ വിഷയമായതിനാൽ ശരിയായ സമയത്ത് മാത്രമേ കൂടുതൽ വെളിപ്പെടുത്തലുകൾ നടത്തൂ” എന്നാണ് താരം ഇപ്പോൾ പ്രതികരിച്ചത്.
ഈ സംഭവത്തിന് പിന്നാലെ അനുവാദമില്ലാതെ പരിപാടി സംഘടിപ്പിച്ചതിനും ആൾക്കൂട്ടത്തെ നിയന്ത്രിക്കുന്നതിൽ പരാജയപ്പെട്ടതിനും മാൾ മാനേജ്‌മെന്റിനും പരിപാടിയുടെ സംഘാടകർക്കുമെതിരെ ഹൈദരാബാദ് പോലീസ് സ്വമേധയാ (Suo Motu) കേസെടുത്തിരുന്നു. ഗായിക ചിന്മയി ശ്രീപദ ഉൾപ്പെടെയുള്ള പ്രമുഖർ ആൾക്കൂട്ടത്തിന്റെ പെരുമാറ്റത്തെ അതിരൂക്ഷമായി വിമർശിക്കുകയും സിനിമാ മേഖലയിലെ സ്ത്രീകളുടെ സുരക്ഷയെക്കുറിച്ച് ആശങ്ക പ്രകടിപ്പിക്കുകയും ചെയ്തിരുന്നു.
നടിയുടെ പുതിയ വെളിപ്പെടുത്തലോടെ സിനിമാ പ്രമോഷനുകളിലെ സുരക്ഷാ ക്രമീകരണങ്ങൾ വീണ്ടും ചർച്ചയാവുകയാണ്. ‘രാജാ സാബ്’ എന്ന ഹൊറർ-കോമഡി ചിത്രം തിയറ്ററുകളിൽ മികച്ച പ്രതികരണം നേടുമ്പോഴും, ഇത്തരം സംഭവങ്ങൾ താരങ്ങളുടെ സ്വകാര്യതയെയും സുരക്ഷയെയും എങ്ങനെ ബാധിക്കുന്നു എന്നത് ഗൗരവകരമായ ചോദ്യങ്ങൾ ഉയർത്തുന്നു. തമിഴ്‌നാട്, തെലങ്കാന സംസ്ഥാനങ്ങളിലെ ആരാധകരുടെ സ്നേഹം വലുതാണെങ്കിലും അത് പരിധി ലംഘിക്കരുതെന്ന് നിധിയുടെ സഹതാരം റിദ്ധി കുമാറും അഭിപ്രായപ്പെട്ടു.
