മലയാളികൾക്ക് ഏറെ പ്രിയങ്കരനായ ആളാണ് നാദിർഷ. മിമിക്രിയിലൂടെ കലാജീവിതം ഒന്നിച്ച്‌ ആരംഭിച്ച്‌ അടുത്ത സുഹൃത്തുക്കളായി മാറിയ താരങ്ങളാണ് ദിലീപും നാദിര്‍ഷയും. ഇരുവരും ഒന്നിക്കുന്നൊരു സിനിമ വരുന്നതിന്റെ സന്തോഷത്തിലാണ് ആരാധകര്‍. കേശു ഈ വീടിന്റെ നാഥന്‍ എന്ന് പേരിട്ടിരിക്കുന്ന സിനിമയുടെ ഷൂട്ടിങ് ആരംഭിച്ചിരിക്കുകയാണ്. ഫാമിലി എന്റര്‍ടെയിനറായി ഒരുക്കുന്ന ചിത്രം അടുത്ത വര്‍ഷത്തെ വിഷുവിന് മുന്നോടിയായി തിയറ്ററുകളിലേക്ക് എത്തിക്കാനാണ് അണിയറ പ്രവര്‍ത്തകരുടെ തീരുമാനം.
ഷൂട്ടിങ് പൂര്‍ത്തിയാക്കിയതിന് ശേഷമായിരിക്കും ഇക്കാര്യത്തില്‍ കൂടുതല്‍ വ്യക്തത വരികയുള്ളു. എന്നിരുന്നാലും വിഷുവിന് ചിത്രമെത്തുമെന്നാണ്് പ്രതീക്ഷ. ദിലീപ് 60 വയസുള്ള വ്യക്തിയായിട്ടാണ് സിനിമയില്‍ അഭിനയിക്കുന്നതെന്നതാണ് മറ്റൊരു പ്രത്യേകത. ഉര്‍വശിയാണ് ദിലീപിന്റെ നായികയായിട്ടെത്തുന്നത്. മറ്റൊരു കാര്യം ഉര്‍വശി ദിലീപിന്റെ ഭാര്യയുടെ വേഷത്തിലായിരിക്കും അഭിനയിക്കുന്നത് എന്നതാണ്.
ദേശീയ പുരസ്‌കാര ജേതാവ് സജീവ് പാഴൂര്‍ ആണ് ചിത്രത്തിന് വേണ്ടി തിരക്കഥ ഒരുക്കിയിരിക്കുന്നത്. കലാഭവന്‍ ഷാജോണ്‍, കലാഭവന്‍ ഷാജോണ്‍, ഹരീഷ് കണാരന്‍, സ്വാസിക, സലിം കുമാര്‍, കോട്ടയം നസീര്‍, അനുശ്രീ, ടിനി ടോം എന്നിങ്ങനെ വലിയൊരു താരനിര തന്നെ സിനിമയില്‍ അണിനിരക്കുന്നുണ്ട്. കുടുംബ പ്രേക്ഷകരെ ലക്ഷ്യം വെച്ചെത്തുന്ന സിനിമയാണെന്നാണ് അറിയുന്നത്.
