തമിഴ് സിനിമയില്‍ ഇന്ന് ഏറ്റവുമധികം ആരാധകരുള്ള നടനാര് എന്ന ചോദ്യത്തിന് ആദ്യമെത്തുന്ന പേരുകളിലൊന്ന് വിജയ് ആയിരിക്കും. തമിഴ് നാട്ടിൽ മാത്രമല്ല ഇവിടെ കേരളത്തിലും ഉണ്ട് ഒരുപാട് വിജയ് ആരാധകർ. ഇപ്പോഴിതാ വിജയ് ആരാധകരെ ആവേശഭരിതരാക്കുന്ന ഒരു പുതുവര്‍ഷ സമ്മാനം എത്തിയിരിക്കുന്നു. ലിയോയ്ക്ക് ശേഷമുള്ള വിജയ് ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തു വിട്ടിരിക്കുകയാണ് ഇപ്പോള്‍. ചിത്രത്തിന്റെ ടെെറ്റിലിനെക്കുറിച്ച് കുറച്ച് നാളുകളായി സോഷ്യൽ മീഡിയയിൽ ചർച്ചകൾ ഉയർന്നു വരുന്നുണ്ടായിരുന്നു എന്നാലിപ്പോൾ അതിനും ഉത്തരമായിരിക്കുന്നു. ദ ഗ്രേറ്റസ്റ്റ് ഓഫ് ഓള്‍ ടൈം അഥവാ ദ ഗോട്ട് എന്നാണ് ചിത്രത്തിന്റെ പേര്. ടെെം ട്രാവൽ ചിത്രമായിരിക്കും ദ ഗോട്ട് എന്നാണ് സൂചനകൾ. ദളപതി 68 എന്ന് താല്‍ക്കാലികമായി നാമകരണം ചെയ്തിരിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്നലെ വൈകിട്ട് 6 മണിക്കാണ് നിര്‍മ്മാതാക്കളായ എജിഎസ് എന്‍റര്‍ടെയ്ന്‍‍മെന്‍റ് പുറത്തു വിട്ടത്. വിജയ് യുടെ കരിയറിലെ 68-ാമത് ചിത്രം വെങ്കട് പ്രഭുവാണ് സംവിധാനം ചെയ്യുന്നത്. വെങ്കട് പ്രഭുവും വിജയ്‍യും ആദ്യമായി ഒന്നിക്കുന്ന ചിത്രം ആയതിനാല്‍ തന്നെ ഈ പ്രോജക്റ്റിന്മേലുള്ള പ്രേക്ഷക പ്രതീക്ഷയും അത്രയും വലുതാണ്.
അജിത് നായകൻ ആയെത്തിയ മങ്കാത്ത എന്ന ചിത്രം സംവിധാനം ചെയ്തതും വെങ്കട്ട് പ്രഭു. രണ്ട് ജനറേഷനിൽ ഉള്ള വിജയിയെ പോസ്റ്ററില്‍ കാണാം. ഒരു പാരച്യൂട്ട് ലാന്‍റിന് ശേഷം എന്ന രീതിയിലാണ് പോസ്റ്റര്‍. ചിത്രത്തില്‍ വിജയ് ഇരട്ട റോളിലാണ് എത്തുന്നത് എന്ന സൂചനയാണ് ഇത് നല്‍കുന്നത്. ചിത്രത്തിന്റെ ആദ്യ ഷെഡ്യൂൾ ചിത്രീകരണം തായിലൻഡിൽ വെച്ച് നടന്നിരുന്നു. രണ്ടാഴ്ചത്തെ ഷൂട്ടിങ്ങിനെ ശേഷം അടുത്തിടെ വിജയ് ചെന്നൈയിൽ തിരിച്ചെത്തും. ചെന്നൈയിലെ ഷെഡ്യൂൾ ഉടൻ ആരംഭിക്കും. മീനാക്ഷി ചൗധരി നായികയാവുന്ന ചിത്രത്തില്‍ പ്രഭുദേവ, പ്രശാന്ത്, ലൈല, സ്നേഹ, ജയറാം, അജ്മല്‍ അമീർ , യോഗി ബാബു, വി ടി വി ഗണേഷ് എന്നിവർക്കൊപ്പം വെങ്കട് പ്രഭു ചിത്രങ്ങളിലെ സ്ഥിരം സാന്നിധ്യമായ വൈഭവ്, പ്രേംജി അമരൻ, അരവിന്ദ്, അജയ് രാജ് എന്നിവരും ചിത്രത്തിൽ വേഷമിടുന്നു. ജയറാം ചിത്രത്തിലുണ്ട് എന്നത് മലയാളികളെ സംബന്ധിച്ച് ആവേശം പകരുന്ന ഒന്നാണ്. തുപ്പാക്കിക്ക് ശേഷം ജയറാമും വിജയിയും വീണ്ടുമൊന്നിക്കുന്ന ചിത്രമെന്ന പ്രത്യേകതയും ഗോട്ടിനുണ്ട്. യുവൻ ശങ്കർ രാജയാണ് സംഗീത സംവിധാനം നിർവഹിക്കുന്നത്.
സിദ്ധാർത്ഥ് നൂനി ഛായാഗ്രഹണവും വെങ്കട് രാജൻ എഡിറ്റിങ്ങും നിർവഹിക്കുന്നു. രാജീവൻ ആണ് പ്രൊഡക്ഷൻ ഡിസൈൻ കൈകാര്യം ചെയുന്നത്. ദിലീപ് സുബ്ബരായനാണ് സംഘട്ടനസംവിധാനം. എ.ജി.എസ് എന്റർടെയിൻമെന്റാണ് ചിത്രം നിർമിക്കുന്നത്. എ.ജി.എസ് എന്റർടെയിൻമെന്റിന്റെ 25-ാം ചിത്രം കൂടിയാണ് ഗോട്ട്. സമീപകാല തമിഴ് സിനിമയില്‍ നിര്‍മ്മാതാക്കള്‍ക്ക് ഏറ്റവും മിനിമം ഗ്യാരന്‍റി നല്‍കുന്ന നടനാണ് വിജയ് . കരിയറിലെ ഏറ്റവും വലിയ വിജയമാണ് കഴിഞ്ഞ ചിത്രം ലിയോയിലൂടെ വിജയ് സ്വന്തമാക്കിയത്. 2023 ലെ ഏറ്റവും വലിയ തമിഴ് ഹിറ്റും ഇതുതന്നെയായിരുന്നു. ലിയോയുടെ വന്‍ വിജയത്തിന് ശേഷമുള്ള വിജയ് ചിത്രമെന്ന നിലയിലും കോളിവുഡ് നിലവില്‍ ഏറ്റവും പ്രതീക്ഷയര്‍പ്പിക്കുന്ന സിനിമകളിലൊന്നാണ് ദ ഗോട്ട്. കൂടാതെ ഗോട്ടിന്റെ തെന്നിന്ത്യൻ ഭാഷകളിലെ ഒടിടി റൈറ്റ്സ് വിറ്റുപോയിരിക്കുന്നുവെന്ന വാർത്തയും നേരത്തെ വന്നിരുന്നു. കോടികളുടെ തുകയ്‍ക്കാണ് ചിത്രത്തിന്റെ ഒടിടി റൈറ്റ്സ് വിറ്റുപോയിരിക്കുന്നതെന്നാണ് വിവരം. ഡിജിറ്റൽ അവകാശം സ്വന്തമാക്കിയിരിക്കുന്നത് നെറ്റ്ഫ്ലിക്സ് ആണെന്നുമാണ് റിപ്പോർട്ട്. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണം ഉണ്ടായിട്ടില്ല.
