മോഹൻലാൽ – ജീത്തു ജോസഫ് കോംബോയിൽ എത്തിയ നേര് തീയറ്ററിൽ വിജയം തീർക്കുമ്പോൾ ആരാധകർ ആവേശത്തിലാണ്. ഞങ്ങളുടെ മോഹൻലാലിനെ തിരിച്ച് കിട്ടിയെന്നാണ് ആരാധകർ പ്രതികരിക്കുന്നത്. നേരിന്റെ വിജയത്തിൽ ജീത്തു ജോസഫിനെ പ്രശംസിച്ചുകൊണ്ട് രംഗത്തെത്തിയിരിക്കുകയാണ് സംവിധായകൻ പ്രിയദർശൻ. മോഹൻലാലിന്റെ കഴിവിനെ ജീത്തു ജോസഫ് ശരിയായി ഉപയോഗിച്ചുവെന്നാണ് പ്രിയദർശൻ കുറിച്ചത്.
പ്രതിഭ ഒരിക്കലും മങ്ങില്ല, മോഹൻലാലിന്റെ കഴിവ് ജീത്തു ശരിയായി ഉപയോഗിച്ചു! നേരിന്റെ വിജയത്തിന് നിങ്ങൾക്ക് ഹാറ്റ്സ് ഓഫ്!- പ്രിയദർശൻ കുറിച്ചു. പ്രിയദർശനും മോഹൻലാലും തമ്മിലുള്ള സൗഹൃദം വളരെ ആഴത്തിലുള്ളതാണ്. തന്റെ സുഹൃത്ത് വീണ്ടും തീയറ്ററിൽ തരംഗം തീർക്കുമ്പോൾ ആരാധകർക്കുള്ള ആവേശം തന്നെയാണ് പ്രിയദർശനും പങ്കുവയ്ക്കുന്നത്. പ്രിയദർശന് നന്ദി പറഞ്ഞുകൊണ്ട് ജീത്തു ജോസഫും രംഗത്തെത്തി. നേരിന്റെ വിജയം ആഘോഷിക്കുകയാണ് മോഹൻലാൽ ആരാധകർ. ഇമോഷണൽ കോർട്ട് ഡ്രാമയായി എത്തിയ ചിത്രത്തിൽ അഭിഭാഷകന്റെ റോളിലാണ് മോഹൻലാൽ എത്തിയത്. അനശ്വര രാജൻ, സിദ്ദിഖ് തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്.
