അന്യ ഭാഷകളിൽ മാത്രം അഭിനയിച്ച തന്നെ എന്തിനാണ് മലയാള സിനിമ നടി എന്ന് പറയുന്നതെന്ന് താരം രേവതി സമ്പത്ത്, തന്റെ ഫേസ്ബുക്ക് പോസ്റ്റിൽ കൂടിയാണ് താരം ഈ വിവരം അറിയിച്ചിരിക്കുന്നത്, രേവതിയുടെ പോസ്റ്റ് ഇങ്ങനെ
ഈ ഓൺലൈൻ ന്യൂസുകാർ വായിൽ തോന്നുന്നതൊക്കെ എഴുതി വിടുന്ന പശ്ചാത്തലത്തിൽ, ഞാൻ എന്താണ് ചെയ്യുന്നത് എന്ന് ഞാൻ തന്നെ സ്വയം പറയണമെന്ന് തോന്നുന്നതിനാൽ ഇടുന്ന ചില വിശദീകരണങ്ങൾ.. ഞാൻ മലയാള സിനിമയിൽ അഭിനയിച്ചിട്ടില്ല, ഓൺലൈൻ ന്യൂസുകാർ എന്നെ മലയാള സിനിമാനടിയാക്കിയിട്ട് കുറച്ചധികം നാളുകൾ ആയിട്ടുണ്ട്, അതൊക്കെ എന്തിനാണെന്നെനിക്കറിയാം കേട്ടോ,അതിലേക്ക് കടക്കുന്നില്ല..
ഞാൻ തെലുഗു -ഒഡിയ ദ്വിഭാഷാ ചിത്രമായ രാജേഷ് ടച്ച് റിവർ സംവിധാനംചെയ്ത പട്നഗർ (Patnagarh) എന്ന സിനിമയിലാണ് ആദ്യമായി തുടക്കം കുറിച്ചത്. അതുൽ കുൽകർണി,മനോജ്‌ മിസ്ര, പുഷ്പ പാണ്ടേയ്, തനികല ഭരണി തുടങ്ങിവരുണ്ട്. “ഇൻസ്പെക്ടർ അമൃത” എന്ന കഥാപാത്രമാണ് ചെയ്തത്. ഭുവനേശ്വറിൽ നടത്തിയ ഓഡിഷനിൽ നിന്നും തിരഞ്ഞെടുക്കപ്പെട്ടാണ് ഈ സിനിമയിലേക്കുള്ള വരവ്.തലയിൽ കയറി നിരങ്ങാൻ ശ്രമിച്ചതിനാൽ, രാജേഷും അയാളുടെ ടീമിനെയും വലിച്ചുകീറിയിട്ടുണ്ടായിരുന്നു. അതിനാൽ തന്നെ ആ സിനിമയിൽ ചെയ്ത എന്റെ കഥാപാത്രം സിനിമയിൽ ഉണ്ടാകാനും ഉണ്ടാകാതിരിക്കാനും ചാൻസുണ്ട്, അത് പിന്നെ അങ്ങനെയാണല്ലോ. എനിക്ക് കണ്ണെടുത്താൽ കണ്ടൂടാത്ത തരം അന്തരീക്ഷം കൊണ്ട് നടക്കുന്ന ആൾക്കാരായതിനാൽ കൂടുതൽ ഒന്നും അന്വേഷിക്കാൻ തോന്നിയിട്ടുമില്ല,
പോയിട്ടുമില്ല. തീയേറ്റർ റിലീസ് നടന്നിട്ടില്ല എന്റെ അറിവിൽ, ഏതൊക്കെയൊ ഫെസ്റ്റിന് പോയിരുന്നുവെന്നോ എന്തിനൊക്കെയോ അവാർഡുകൾ കിട്ടിയിരുന്നുവെന്നും കേട്ടുകേൾവി മാത്രമുണ്ട്, നിശ്ചയമില്ല. 2017 മുതൽ തീയേറ്റർ ആർടിസ്റ്റ് ആയിരുന്നു ഞാൻ. സിനിമ എന്ന കലാരൂപത്തിനെ ഞാൻ കാണുന്ന രീതിയും വേറെയാണ്. ആരുടെയും ഔദാര്യമല്ല സിനിമ എന്ന യാഥാർത്ഥ്യത്തിലാണ് ഇപ്പോഴുള്ള എന്റെ സിനിമാജീവിതത്തിലെ യാത്ര. സ്വന്തമായി സിനിമകൾ സംവിധാനം ചെയ്യാനും, കഥകളെ സൃഷ്ടിക്കുന്നതിലുമായ പാതയിലാണ് ഞാൻ. കലയെ കൊല ആക്കാത്ത എന്റെ ചില പ്രിയപ്പെട്ടവരും കൂടെ ഉണ്ട്..
അക്കാദമിക് പശ്ചാത്തലവും ഉഷാറായി നടക്കുന്നു,ഭാരതിയാർ യൂണിവേഴ്സിറ്റിയിൽ സൈക്കോളജി ഫൈനൽ ഇയർ. ഇനി എന്തെങ്കിലും അറിയണമെങ്കിൽ ചോദിക്കുക, അല്ലാതെ തോന്നുന്നത് എഴുതി വെക്കാൻ തോന്നുണ്ടേൽ നിന്നെയൊക്കെ കുറിച്ച് സ്വയം എഴുതടെ ഓൺലൈൻകാരെ…
