കലാഭവൻ മാണിയുടെ ജീവിതം സിനിമയായപ്പോൾ അതിൽ നായകനായി എത്തിയത് സെന്തിൽ കൃഷ്ണകുമാർ ആയിരുന്നു. ആ ഒരു ചിത്രത്തിലൂടെ മലയാളി മനസ്സിൽ ഇടം നേടിയ താരമാണ് സെന്തിൽ കൃഷ്ണ. ചിത്രത്തിലെ താരത്തിന്റെ കഥാപാത്രം ശ്രദ്ധിക്കപ്പെട്ടതോടെ തുടർന്ന് ഒട്ടേറെ കഥാപാത്രങ്ങൾക്ക് ജീവൻ നല്കാൻ താരത്തിന് സാധിച്ചു. കോഴിക്കോട് സ്വദേശി അഖിലയാണ് താരത്തിന്റെ ഭാര്യ. അഖിലയെ പരിചയപ്പെട്ടതും വിവാഹം കഴിച്ചതുമായുള്ള സംഭവത്തെ കുറിച്ച് ഒരു അഭിമുഖത്തിൽ താരം പറഞ്ഞ വാക്കുകളാണ് വൈറലായിരിക്കുന്നത്. “ആഷിക് അബുവിന്റെ വൈറസ് എന്ന സിനിമയുടെ ചിത്രീകരണം കോഴിക്കോട് ബേബി മെമ്മോറിയല് ആശുപത്രിയില് നടക്കുകയാണ്. സിനിമയില് എക്സൈസ് മന്ത്രിയായി അഭിനയിച്ചത് ഞാൻ. ഇതേ ആശുപത്രില് നഴ്സായി ജോലി ചെയ്യുന്ന അഖിലയെ ഷോട്ട് കഴിഞ്ഞുള്ള സമയത്താണ് പരിചയപ്പെടുന്നത്. പിന്നീട് പല ദിവസവും പാസിംഗ് ഷോട്ട് പോലെ അഖില കടന്ന് പോയി. സിനിമയിലാണെങ്കില് ഉറപ്പായും ഒരു പാട്ട് വരേണ്ട സമയമാണ്. ഒരു നടനോട് തോന്നുന്ന ഇഷ്ടവും ആരാധനയും സൗഹൃദമായി വളര്ന്നു. പിന്നെ സൗഹൃദം പ്രണയമായി മാറി. അത് വിവാഹത്തില് എത്തി. പ്രതീക്ഷിക്കാതെ ആണ് ജീവിതത്തില് പലതും സംഭവിക്കുന്നത്. യാദൃശ്ചികമായി കാണുകയും പരസ്പരം മനസിലാക്കിയും സംസാരിച്ചും മുന്നോട്ട് പോകുമ്പോള് തന്നെ വീട്ടുകാരോടും പറഞ്ഞിരുന്നു.അഖിലയുടെ വീട്ടുകാര് എന്നെ കുറിച്ച് അന്വേഷിച്ചത് വിനയന് സാറിനോട് ആയിരുന്നു. ചാലക്കുടിക്കാരന് ചങ്ങാതി എന്ന സിനിമയിലൂടെ വിനയന് സാര് എന്റെ ജീവിതം കൈപിടിച്ച് ഉയര്ത്തി. എല്ലാവരുടെയും ജീവിതത്തിലെ പ്രധാന മുഹൂര്ത്തമാണ് വിവാഹം. എന്റെ വിവാഹത്തിലും പ്രധാന പങ്കുവഹിച്ചത് വിനയന് സാര് തന്നെയാണ്. ഒരു സിനിമ നടനെ വിവാഹം കഴിക്കണമെന്ന് ഒരിക്കലും കരുതിയിരുന്നില്ലെന്നാണ് സെന്തിലിന്റെ ഭാര്യ അഖില പറയുന്നത്. ഒന്ന് രണ്ട് വര്ഷം കഴിഞ്ഞ് വിദേശത്തേക്ക് ജോലിയ്ക്ക് പോവണം എന്നൊക്കെ ആഗ്രഹിച്ചിരുന്നു.” എന്നായിരുന്നു സെന്തിൽ പറഞ്ഞത്.