സുബി സുരേഷ് യാത്രയായത് വിവാഹ സ്വപ്നങ്ങള് സഫലമാകാതെയാണ്. തീരാ നൊമ്പരമായിരിക്കുകയാണ് സുബിയുടെ അകാല വിയോഗം. ആദ്യമായി സുബി വിവാഹത്തെ കുറിച്ച് പൊതുവേദിയില് സംസാരിച്ച് ഫ്ളവേഴ്സ് ഒരുകോടിയുടെ ഫ്ളോറില് വച്ചായിരുന്നു. തന്നെ ഇഷ്ടമാണെന്ന് പറഞ്ഞ് ഒരാള് വന്നിട്ടുണ്ടെന്നും രാഹുല് ഫെബ്രുവരിയില് വിവാഹം നടത്തണമെന്ന് പറഞ്ഞ് ഇരിക്കുകയാണെന്നും സുബി സുരേഷ് ആര് ശ്രീകണ്ഠന് നായരോട് പറഞ്ഞിരുന്നു. കാത്തിരുന്ന ഫെബ്രുവരിയില് തന്നെ സുമംഗലിയാവാന് കാത്തുനില്ക്കാതെയാണ് സുബി യാത്രയായത്.
സുബിയുടെ അവസാന നിമിഷങ്ങളെ കുറിച്ച് പങ്കുവച്ചിരിക്കുകയാണ് പ്രതിശ്രുത വരന്. സുബി കഴിഞ്ഞ 25 ദിവസമായി ആശുപത്രിയിലായിരുന്നു. സ്റ്റോണ് ഉണ്ടെന്നാണ് ആദ്യം കണ്ടെത്തിയത്. തുടര്ന്നാണ് ആശുപത്രിയില് പ്രവേശിപ്പിച്ചതെന്ന് അദ്ദേഹം പറയുന്നു. പക്ഷേ, രക്തസമ്മര്ദ്ദത്തിലുണ്ടായ വ്യതിയാനം ആദ്യം മുതല് പ്രശ്നമായിരുന്നു. അതിനാല് ചികിത്സകളോട് ഒന്നും ശരീരം ശരിയായ വിധം പ്രതികരിച്ചില്ലായിരുന്നു.
തനിക്ക് അറേഞ്ചേഡ് മാരേജിന് താത്പര്യമില്ല. പ്രണയിച്ച് തന്നെ കല്യാണം കഴിക്കാനാണ് താന് ആഗ്രഹിക്കുന്നത്. ഒരാള് തന്നെ വിവാഹം കഴിക്കണമെന്ന പറഞ്ഞ് കൂടെ കൂടെ കൂടിയിട്ടുണ്ട്. പുള്ളിക്കാരന് ഫെബ്രുവരിയില് വിവാഹം കഴിക്കണം എന്ന് പറഞ്ഞുകൊണ്ടാണ് നടക്കുന്നത്. ഏഴുപവന്റെ താലി മാല വരെ ബുക്ക് ചെയ്തിട്ടുണ്ടെന്നും സുബി പരിപാടിയില് പറഞ്ഞിരുന്നു.
തങ്ങള് കാനഡയില് ഒരുമിച്ച് പരിപാടി ചെയ്തപ്പോഴാണ് അദ്ദേഹത്തിന് അങ്ങനൊരു ഇഷ്ടം തോന്നിയത്. പിന്നെ വീട്ടില് വന്ന് സംസാരിച്ചിട്ടൊക്കെയുണ്ടെന്നും സുബി പറഞ്ഞിരുന്നു.
കരള് രോഗത്തെ തുടര്ന്ന് കൊച്ചിയിലെ സ്വകാര്യ ആശുപത്രിയില് ഇന്നു രാവിലെയായിരുന്നു സുബി മരണത്തിന് കീഴടങ്ങിയത്. കരള് മാറ്റിവയ്ക്കാനുള്ള ശസ്ത്രക്രിയയുടെ ഒരുക്കങ്ങള്ക്കിടെയായിരുന്നു താരത്തിന്റെ വിയോഗം.