നടി ശ്രീരഞ്ജിനി അമ്മയായി, താരത്തിന്റെ സഹോദരൻ ബിലാ ഹരിയാണ് സന്തോഷ വാർത്ത ആരാധകരുമായി പങ്കുവെച്ചത്, ‘പോരാട്ടം’,’അള്ള് രാമേന്ദ്രന്‍’ തുടങ്ങിയ ചിത്രങ്ങളുടെ സംവിധായകൻ ആണ് ബിലാ ഹരി, ഗർഭിണി ആയിരിക്കുന്ന സമയത്ത് ശ്രീരഞ്ജിനിക്ക് കോവിഡ് വന്നുവെന്നും, അതിനെ തോൽപ്പിച്ചാണ് അവൾ ഒരു ആൺകുഞ്ഞിന് ജന്മം നൽകിയത് എന്നും ബിലാഹരി പറയുന്നു, ‘മൂക്കുത്തി’, ‘ദേവിക പ്ലസ് ടു ബയോളജി’ തുടങ്ങിയ ഹ്രസ്വചിത്രങ്ങളിലൂടെ ശ്രദ്ധ നേടിയ ശ്രീരഞ്ജിനി തണ്ണീർ മത്തൻ ദിനങ്ങൾ സിനിയിൽ കൂടിയാണ് ഏറെ ശ്രദ്ധിക്കപ്പെട്ടത്, കഴിഞ്ഞ വർഷം ജനുവരിയിലായിരുന്നു ശ്രീരഞ്ജിനിയും പെരുമ്പാവൂർ സ്വദേശിയായ രഞ്ജിത് പി രവീന്ദ്രനും തമ്മിലുള്ള വിവാഹം.
ബിലാ ഹരി പങ്കുവെച്ച പോസ്റ്റ് ഇങ്ങനെ, “അനിയത്തിയ്ക്ക് കുറച്ചു ദിവസങ്ങൾ മുൻപ് കോവിഡ് പോസിറ്റീവ് ആയിരുന്നു, അവൾ ഗർഭിണിയുമായിരുന്നു. ഡോക്ടർ ഡെലിവറി ഡേറ്റ് പറഞ്ഞ തീയതിയ്ക്ക് 24 ദിവസം മുൻപാണ് അവൾ കോവിഡ് പോസിറ്റീവ് ആയത്. വീട്ടിൽ എല്ലാവരും ഭയന്നു. വാർത്തയറിഞ്ഞു കൊച്ചിയിലെ ഫ്ളാറ്റ് വിട്ട് ഞാനും അവർക്കൊപ്പം വീട്ടിൽ നിന്നു.
എന്റെ അനിയത്തിയും അവളുടെ ഭർത്താവും നല്ല സ്ട്രാങ്ങ് ആയിരുന്നു. കോവിഡ് രോഗികളെ എല്ലാ ഹോസ്പിറ്റലുകളും ഡെലിവറിയ്ക്ക് അഡ്മിറ്റ് ചെയ്യില്ല എന്നൊരു ടെൻഷൻ കിടക്കുമ്പോഴും അവൾക്ക് ആ ടൈമിൽ പെയിൻ വന്നാൽ അമൃത പോലുള്ള ആശുപത്രികളിൽ ഒരു സേഫ്റ്റിക്ക് കൊണ്ടുപോവാനുള്ള പ്ലാൻ ബിയും റെഡിയാക്കിയിരുന്നു. ഉള്ളിലെ കുഞ്ഞിന് ഇൻഫെക്ഷൻ ഉണ്ടാവാതിരിക്കാൻ അവളുടെ ഭർത്താവ് എല്ലാ ദിവസവും അവൾക്ക് ഇൻജെക്ഷൻ എടുത്തിരുന്നു. ഞങ്ങൾ വീടിനകത്ത് മാസ്ക് വച്ച്, ചിട്ടയായി മരുന്നുകളും മറ്റു ക്രമീകരണങ്ങളും പിന്തുടർന്നു. സാനിറ്റയ്സറിൽ എല്ലാത്തിനെയും മുക്കി. അനിയത്തിയ്ക്ക് ഒരു മുറിയിൽ ക്വാറന്റൈൻ സ്പേസ് നൽകി, എല്ലാ ആവശ്യങ്ങളും നടത്തികൊടുത്തു.
ഇടയ്ക്കൊരു ദിവസത്തെ വൊമിറ്റിംഗ് ഒഴിച്ചാൽ അങ്ങനെ വേറെ പ്രശ്നങ്ങളൊന്നും അവൾക്കുണ്ടായില്ല. ഞങ്ങൾക്കാർക്കും വേറെ ബുദ്ധിമുട്ടുകളും ഉണ്ടായില്ല. അങ്ങനെ ഒടുവിൽ അനിയത്തിയും അളിയനുമൊക്കെ കോവിഡ് നെഗറ്റീവായി. ഇന്നലെ വൈകിട്ട് അവൾ പ്രസവിച്ചു, നോർമൽ ഡെലിവറി ആയിരുന്നു. മിടുക്കനായി അവൻ ഈ ലോകത്തേക്കു കൺതുറന്നു. ഞാനൊരു അമ്മാവനായിരിക്കുന്നു. കോവിഡ് വന്നു എന്ന ഭീതിയിൽ ടെൻഷനടിച്ചു നിൽക്കരുത്. ധൈര്യത്തോടെ നേരിടുക. എന്നാണ് ബിലഹരി കുറിച്ചത്. നിരവധി പേരാണ് താരത്തിന് ആശംസ നേർന്ന് എത്തുന്നത്.
