വിജയ് നായകനാകുന്ന ലിയോ എന്ന സിനിമയുടെ റിലീസിനായി കാത്തിരിക്കുകയാണ് ആരാധകര്. ഇനി മണിക്കൂറുകൾ മാത്രമാണ് റിലീസിനുള്ളത്. തമിഴിലെ ഏറ്റവുമധികം ആരാധകരുള്ള സംവിധായകനായി വെറും 5 സിനിമകള് കൊണ്ട് പേരെടുത്ത ലോകേഷിനൊപ്പം ഒരു ഗംഭീര സിനിമ തന്നെയാണ് വിജയ് ആരാധകര് പ്രതീക്ഷിക്കുന്നത്. വൻ ഹൈപ്പാണ് ലിയോയ്ക്കുള്ളത്. വിദേശത്തടക്കം നിരവധി ഫാൻസ് ഷോകള് സംഘടിപ്പിക്കും. എന്നാല് തമിഴ്നാട്ടില് പുലര്ച്ചെ പ്രദര്ശനം അനുവദിച്ചിട്ടില്ല. തമിഴ്നാട്ടിലും പുലര്ച്ചെ നാലിന് വിജയ് ചിത്രം പ്രദര്ശിപ്പിക്കാൻ അനുവദിക്കണം എന്ന് ആവശ്യപ്പെട്ട് നിര്മാതാവ് എസ് എസ് ലളിത് കുമാര് കഴിഞ്ഞ ദിവസം ചെന്നൈ ഹൈക്കോടതിയെ സമീപിച്ചിരുന്നു. എന്നാല് രാവിലെ നാലുമണി ഷോ എന്ന നിര്മ്മാതാവിന്റെ ആവശ്യത്തെ കോടതി ഇപ്പോള് തള്ളിയിരിക്കുകയാണ്. ലിയോയുടെ റിലീസ് ഒക്ടോബര് 19നാണ്. കേരളത്തില് പുലര്ച്ചെ നാല് മണിക്ക് ചിത്രത്തിന് പ്രദര്ശനം ആരംഭിക്കും. എന്നാല് തമിഴ്നാട്ടില് ഒമ്പത് മണിക്കാകും ചിത്രത്തിന്റെ പ്രദര്ശനം. അജിത്ത് നായകനായ തുനിവ് എന്ന ചിത്രത്തിന്റെ റിലീസിന് ഒരു ആരാധകൻ മരിച്ച സംഭവത്തെ തുടര്ന്നായിരുന്നു തമിഴ്നാട്ടില് പുലര്ച്ചെയുള്ള ഷോകള്ക്ക് വിലക്ക് ഏര്പ്പെടുത്തിയത്. ചിത്രത്തിന് രാവിലെ നാല് മണി ഷോ അനുവദിക്കാന് കഴിയില്ലെന്നാണ് കോടതി അറിയിച്ചത്. എന്നാല് ചിത്രത്തിന് രാവിലെ 7 മണി ഷോ അനുവദിക്കുന്ന കാര്യം പരിഗണിക്കാന് തമിഴ്നാട് സര്ക്കാറിനോട് കോടതി ആവശ്യപ്പെട്ടു. ഇതില് സര്ക്കാറിന്റെ മറുപടിക്കായി നിര്മ്മാതാവ് എസ് എസ് ലളിത് കുമാര് നല്കിയ ഹര്ജി കോടതി നാളത്തേക്ക് മാറ്റി. അതായത് ലിയോ ഏഴു മണി ഷോ നടക്കുമോ എന്ന കാര്യം നാളെ അറിയാന് സാധിക്കും. അതേ സമയം ചൊവ്വാഴ്ച വൈകീട്ട് എസ് എസ് ലളിത് കുമാറും, തീയറ്റര് ഓണേഴ്സ് അസോസിയേഷന് ഭാരവാഹികളും തമിഴ്നാട് സര്ക്കാര് വൃത്തങ്ങളുമായി കൂടികാഴ്ച നടത്തും എന്നാണ് വിവരം. ഇതിന്റെ അടിസ്ഥാനത്തിലായിരിക്കും സര്ക്കാര് നാളെ കോടതിയില് മറുപടി നല്കുക. അതിന് പിന്നാലെ 7 മണിക്കെങ്കിലും ലിയോ കാണാന് കഴിയും എന്ന പ്രതീക്ഷയിലാണ് തമിഴ്നാട്ടിലെ വിജയ് ആരാധകര്.
അതേ സമയം പുതുച്ചേരിയില് ലിയോ ഷോകള് രാവിലെ 7 മണി മുതലാണ് ആരംഭിക്കുന്നത് എന്ന കാര്യം എസ് എസ് ലളിത് കുമാറും സംഘവും സര്ക്കാറിന്റെ ശ്രദ്ധയില് പെടുത്തും എന്നാണ് വിവരം. 9 മണിക്ക് തമിഴ്നാട്ടില് ഷോ ആരംഭിക്കുന്നത് കേരളത്തിലും മറ്റും 4മണിക്ക് ഷോ ആരംഭിക്കുന്നതിനാല് ചിത്രത്തെ നെഗറ്റീവായി ബാധിക്കുമോ എന്ന ആശങ്കയും നേരത്തെ ഹൈക്കോടതിയില് നല്കിയ ഹര്ജിയില് നിര്മ്മാതാവ് ഉന്നയിച്ചിരുന്നു. കേരളത്തില് ആദ്യ പ്രദര്ശനം 4 മണിക്ക് തുടങ്ങും എന്ന് ഉറപ്പായതോടെ തിരുവനന്തപുരം, കൊല്ലം. ഇടുക്കി, പാലക്കാട് തുടങ്ങിയ അതിര്ത്തി ജില്ലകളിലേക്ക് ഫസ്റ്റ് ഡേ ഫസ്റ്റ് ഷോ കാണാന് തമിഴ്നാട്ടില് നിന്ന് നിരവധി ആരാധകര് എത്തും. ആദ്യ ഷോയുടെ ടിക്കറ്റുകള് ചൂടപ്പം പോലെ വിറ്റുപോയിരുന്നു. കേരളത്തിലെ പ്രീ സെയിൽ മാത്രം 9 കോടി രൂപയിലേക്ക് കുതിക്കുകയാണ്. വിദേശ രാജ്യങ്ങളിലും റെക്കോർഡുകൾ തിരുത്തിക്കുറിച്ച് ലിയോ അഡ്വാൻസ് ബുക്കിങ് കുതിക്കുകയാണ്. പ്രീ-സെയിൽസ് ബിസിനസിൽ കെജിഎഫ് 2 ഓപ്പണിംഗ് ഡേ കളക്ഷൻ ലിയോ മറികടക്കുമെന്നാണ് പ്രതീക്ഷിക്കുന്നത്