കെജിഎഫ് സീരിസിലൂടെ പാന്‍ ഇന്ത്യന്‍ സൂപ്പര്‍താരമായി ആരാധകരെ സ്വന്തമാക്കിയ താരമാണ് യാഷ്. 2022 ല്‍ റിലീസ് ചെയ്ത കെ.ജി.എഫ് രണ്ടാം ഭാഗത്തിന് ശേഷം യാഷിന്റെ അപ്‌ഡേറ്റുകളൊന്നും പുറത്തുവന്നില്ല. ആരാധകലോകം ഒന്നടങ്കം നിരാശയിലായിരുന്നു. അതിനിടെ ഗീതു മോഹന്‍ദാസും യാഷും ഒന്നിക്കുന്നെന്നും റിപ്പോര്‍ട്ടുകളും വന്നിരുന്നു.
ഇപ്പോഴിതാ അക്കാര്യത്തില്‍ സ്ഥിരീകരണം വന്നിരിക്കുകയാണ്. ഒന്നര വര്‍ഷത്തെ നിശബ്ദതയ്ക്ക് ശേഷം ആരാധകരെ ആവേശത്തിലാഴ്ത്തി യാഷിന്റെ പുതിയ ചിത്രം പ്രഖാപിച്ചിരിക്കുകയാണ്. ടോക്‌സിക് എ ഫെയറി ടെയില്‍ ഫോര്‍ ഗ്രോണ്‍-അപ്‌സ് എന്നാണ് ചിത്രത്തിന്റെ പേര്. ഗീതു മോഹന്‍ദാസാണ് ചിത്രം സംവിധാനം ചെയ്യുന്നത്.
എക്കാലത്തെയും രസകരമായ ഒരു സഹകരണം പ്രതീക്ഷിക്കപ്പെടുന്ന ഈ ചിത്രം, രാജ്യാന്തര തലത്തില്‍ പ്രശസ്തയായ സംവിധായിക ഗീതു മോഹന്‍ദാസും റോക്കിംഗ് സ്റ്റാറും ഒന്നിക്കുമ്പോള്‍ പ്രതീക്ഷയും ഏറുകയാണ്.
‘ഞാന്‍ എപ്പോഴും എന്റെ ആഖ്യാന ശൈലിയില്‍ പരീക്ഷണം നടത്തിയിട്ടുണ്ട്. ലയേഴ്സ് ഡൈസിനും മൂത്തോനും അന്താരാഷ്ട്ര തലത്തില്‍ നല്ല സ്വീകാര്യത ലഭിച്ചെങ്കിലും, എന്റെ രാജ്യത്ത് എന്റെ സ്വന്തം പ്രേക്ഷകരെ കണ്ടെത്താന്‍ ഞാന്‍ എപ്പോഴും കൊതിച്ചിരുന്നു. ആ ചിന്തയില്‍ നിന്നാണ് ഈ പദ്ധതി ഉടലെടുത്തത്. ഈ സിനിമ രണ്ട് വിപരീത ലോകങ്ങളുടെ സംയോജനമാണ്, കഥ പറയുന്നതിലെ സൗന്ദര്യശാസ്ത്രം കൂടിച്ചേര്‍ന്ന് ഞാന്‍ യാഷിനെ കണ്ടെത്തി. ഞാന്‍ മനസ്സില്‍ കണ്ട ഏറ്റവും മിടുക്കനായ ഒരാള്‍ ആണ് യാഷ്, ഞങ്ങളുടെ ടീം ഈ മാന്ത്രിക യാത്ര ആരംഭിക്കുന്നതില്‍ ഞാന്‍ ആവേശത്തിലാണ് എന്നാണ് ചിത്രം പ്രഖ്യാപിച്ചുകൊണ്ട് ഗീതു മോഹന്‍ദാസ് പറഞ്ഞത്.
ഗീതു മോഹന്‍ദാസാണ് ടോക്‌സിക് എ ഫെയറി ടെയില്‍ ഫോര്‍ ഗ്രൗണ്‍ അപ്‌സിന്റെ രചനയും സംവിധാനവും നിര്‍വ്വഹിക്കുന്നത്. കെവിഎന്‍ പ്രൊഡക്ഷന്‍സും മോണ്‍സ്റ്റര്‍ മൈന്‍ഡ് ക്രിയേഷന്‍സും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രം 2025 ഏപ്രില്‍ 10 ന് ലോകമെമ്പാടും തിയ്യേറ്ററിലെത്തും.
