ബോളിവുഡിന്റെ പ്രിയനടിയെ യാത്രയാക്കാനുള്ള തയ്യാറെടുപ്പിലാണ് ഇന്ത്യന്‍ സിനിമാ ലോകം. ശ്രീദേവിയെ അവസാനമായി ഒരു നോക്ക് കാണാനായി മുംബൈയില്‍ ആരാധകരുടെ തിരക്കാണ്. നടിയുടെ മൃതശരീരം പൊതു ദര്‍ശനത്തിന് വെച്ചിരിക്കുകയാണ്. അന്ധേരിയിലെ സെലിബ്രേഷന്‍ സ്‌പോര്‍സ് ക്ലബ്ബിലാണ് പൊതുദര്‍ശനം ആരംഭിച്ചിരിക്കുന്നത്.
ശ്രീദേവിയെ കാണാനായി ബോളിവുഡില്‍ നിന്നും നിരവധി താരങ്ങളായിരുന്നു എത്തിയിരുന്നത്. മാത്രമല്ല ശ്രീദേവിയോടുള്ള ആദര സൂചകമായി ഇന്ന് റിലീസ് ചെയ്യാനിരുന്ന സിനിമയുടെ റിലീസും മാറ്റി വെച്ചിരിക്കുകയാണ്. ഒപ്പം മകള്‍ ജാന്‍വിയുടെ സിനിമയും താമസിക്കും..
കഴിഞ്ഞ വര്‍ഷം ചിത്രീകരണം ആരംഭിച്ച ജാന്‍വിയുടെ സിനിമയും വൈകുമെന്നാണ് റിപ്പോര്‍ട്ടുകള്‍. സിനിമയുടെ ഷൂട്ടിംഗ് അവസാന ഘട്ടത്തിലെത്തി നില്‍ക്കുമ്പോഴായിരുന്നു ശ്രീദേവിയുടെ മരണം. തത്കാലം ചിത്രീകരണം അണിയറ പ്രവര്‍ത്തകര്‍ നിര്‍ത്തി വെച്ചിരിക്കുകയാണ്.
ശ്രീദേവിയുടെ ആഗ്രഹങ്ങളില്‍ ഒന്നായിരുന്നു മകളെ നായികയായി കാണുന്നത്. അതിന് വേണ്ടി ചെറിയ ചെറിയ ഓഫറുകളെല്ലാം ശ്രീദേവി വേണ്ടെന്ന് വെച്ചിരുന്നു. കര്‍ണ്‍ ജോഹര്‍ നിര്‍മ്മിക്കുന്ന ധടക് എന്ന സിനിമ ശാശങ്ക് ഖൈതാന്‍ ആണ് സംവിധാനം ചെയ്യുന്നത്.