ചെന്നൈ:- നവജാത ശിശുക്കളെ മുപ്പത് വര്ഷത്തോളമായി അനധികൃതമായി ദത്തെടുത്ത് വിറ്റുവരുകയായിരുന്ന നേഴ്സും ഭര്ത്താവും പിടിയില്. അമുദ എന്ന സ്ത്രീയുടെ ഫോണ് സംഭാഷണത്തിലൂടെയാണ് ഇക്കാര്യങ്ങള് പുറത്ത് വന്നത്. ഇവര് നാമക്കല് ജില്ലയിലെ രാശിപുരത്തെ സര്ക്കാര് ആശുപത്രിയില് നഴ്സായി ജോലി ചെയ്തിരുന്നവരാണ്.
ഇവര് ആവശ്യക്കാരില് നിന്ന് ഈടാക്കിയിരുന്നത് പെണ്കുട്ടിക്ക് രണ്ടേമുക്കാല് ലക്ഷം രൂപയും ആണ്കുട്ടിക്ക് നാലു ലക്ഷം രൂപയുമാണ്. ബിസിനസ് നടത്താനായി സ്വയം വിരമിക്കുകയായിരുന്നുവെന്ന് അമുദ ശബ്ദ രേഖയില് പറയുന്നുണ്ട്. ജനന സര്ട്ടിഫിക്കറ്റ് ശരിയാക്കി നല്കുന്നതിനു 75000 രൂപ വേറെ നല്കണമെന്നും പറയുന്നുണ്ട്.
30,000 രൂപ അഡ്വാന്സായി തന്നാല് മാത്രമെ കച്ചവടത്തിലേക്ക് കടക്കൂ. കുട്ടികളുടെ നിറം, ശരീരപ്രകൃതം, ആണ്കുട്ടിയാണോ പെണ്കുട്ടിയാണോ എന്നത് അനുസരിച്ചാണ് വില തീരുമാനിക്കുന്നത്. ആണ്കുട്ടിയാണെങ്കില് 4.25 ലക്ഷം രൂപ മുതലാണ് വില പെണ്കുട്ടിക്ക് 2.70 ലക്ഷം രൂപയും’ – അമുദവല്ലി ഫോണില് പറയുന്നു.
കുറച്ചുകൂടി ആകര്ഷത്വമുള്ള കുട്ടിയാണെങ്കില് വില കുറച്ചുകൂടി കൂടും. 4000 കുട്ടികളെ ഇവര് വിറ്റുവെന്നാണ് തമിഴ് മാധ്യമങ്ങള് റിപ്പോര്ട്ട് ചെയ്യുന്നത്. ആരോഗ്യ സെക്രട്ടറിയുടെ നിര്ദേശത്തെത്തുടര്ന്ന് ജില്ലാ കളക്ടര് പ്രത്യേക അന്വേഷണം പ്രഖ്യാപിച്ചു.