മലയാളികൾക്ക് ഏറെ പ്രിയപ്പെട്ട അവതാരകയാണ് അശ്വതി ശ്രീകാന്ത്. ചക്കപ്പഴത്തിലൂടെ നടി എന്ന നിലയിൽ അശ്വതി തിളങ്ങി. സോഷ്യൽ മീഡിയയിൽ സജീവമായ അശ്വതിയുടെ പോസ്റ്റുകൾ ഏറെ ചർച്ചയാകാറുണ്ട്. ഇപ്പോൾ തന്റെ മുഖത്ത് വന്ന മാറ്റങ്ങളെ കുറിച്ച് അശ്വതി പറഞ്ഞ കാര്യങ്ങളാണ് ശ്രദ്ധനേടുന്നത്. ഒരുദിവസം അധികമായി വെയിൽ കൊണ്ട ശേഷം തന്റെ മുഖത്ത് ഒരു നിറമാറ്റം ഉണ്ടായെന്നാണ് താരം പറയുന്നത്.
“അഞ്ച് വർഷത്തിന് മേലെയായ കാര്യമാണിത്. ഒരു ദിവസം കുറച്ചധികമായി വെയിൽ കൊണ്ടു. തിരിച്ച് വീട്ടിൽ കയറി. അപ്പോഴേക്കും നമ്മുടെ മുഖത്തൊരു കരുവാളിപ്പ് ഉണ്ടാകുമല്ലോ. പൊതുവിൽ ഇങ്ങനെ വരുമ്പോൾ ഒരാഴ്ച, കൂടിപ്പോയാൽ പത്ത് ദിവസം ആകുമ്പോഴേക്കും അത് പോകും. പക്ഷേ എനിക്ക് അത് പോകുന്നില്ല. മുഖത്ത് മാത്രമായിട്ട് കരുവാളിപ്പ്. കഴുത്തിന് താഴേക്ക് ഒരു പ്രശ്നവുമില്ല. അതെന്താണ് എന്നറിയാൻ ഡോക്ടറെ കാണിച്ചു. ടാൻ വന്നതാകും ചിലപ്പോൾ ചിലർക്ക് ഇന്റൻസ് ആകുമെന്ന് അവർ പറഞ്ഞത്.
പുറമെ പുരട്ടാനുള്ള ക്രീമുകളും തന്നു. പക്ഷേ പ്രയോജനമുണ്ടായില്ല. ഇത് വെയിൽ കൊണ്ടത് കൊണ്ടാണോ എന്ന് അപ്പേഴാണ് ശരിക്കും ശ്രദ്ധിക്കുന്നത്. അങ്ങനെ കാലം കടന്ന് പോയി. പല ഡോക്ടർമാരെ കണ്ടു. ദുബൈയിലും നാട്ടിലുമൊക്കെ. പല ടെസ്റ്റുകളും നടത്തി. പക്ഷേ എന്താണ് പ്രശ്നം എന്ന് കണ്ടെത്താനായില്ല. ഒടുവിൽ ഓട്ടോ ഇമ്യൂൺ കണ്ടീഷനാണെന്നാണ് മേജോരറ്റി ഡോക്ടേഴ്സ് കൺഫോം ചെയ്തു. അത് ട്രിഗർ ചെയ്യാനുള്ള എന്തോ ഒന്ന് എന്റേൽ ഉണ്ട്. മേക്കപ്പ് ആണോന്ന് സംശയിച്ചു. പ്രൊഫഷൻ ഇതായത് കൊണ്ട് മേക്കപ്പ് ഇടണം.
ഡെയ്ലി ലൈഫിൽ മേക്കപ്പ് ഉപയോഗിക്കാത്ത ആളാണ് ഞാൻ. പക്ഷേ ഇപ്പോൾ മേക്കപ്പ് ഇല്ലാതെ പുറത്തിറങ്ങാൻ പറ്റാത്ത അവസ്ഥയായി. ഇത് ആദ്യത്തെ കുറിച്ച് കാലം എനിക്ക് ഉണ്ടാക്കിയ മാനസിക പ്രശ്നം ചില്ലറയൊന്നും ആയിരുന്നില്ല. ഫുൾ ബോഡി അങ്ങനെ ആയിരുന്നെങ്കിൽ അത് അക്സപ്റ്റ് ചെയ്യാമായിരുന്നു. ഇതുപക്ഷേ അങ്ങനെയല്ല. ഫോട്ടോ പോലും എടുക്കാൻ പറ്റാത്ത അവസ്ഥയായി. കാണുന്നവരൊക്കെ ഓരോ സൊല്യൂഷൻസ് പറയുന്നുണ്ട്. എന്നെ കൊണ്ട് പറ്റാവുന്നതെല്ലാം ചെയ്തു കഴി‍ഞ്ഞു. നിലവിൽ എന്റെ സ്കിൻ വളരെ സെൻസിറ്റീവ് ആണ്” – യൂട്യൂബ് വീഡിയോയിൽ അശ്വതി പറഞ്ഞു.
ഇങ്ങനത്തെ അവസ്ഥയുള്ള പലരും ഉണ്ടെന്ന് കാണുന്ന ഡോക്ടേഴ്സ് പറഞ്ഞ് അറിയാം. മറ്റുള്ളവർക്ക് കൂടി ഒരു പ്രചോദനം ആകട്ടെ എന്നോർത്തിട്ട് ഇതിപ്പോൾ പറഞ്ഞതെന്ന് അശ്വതി പറഞ്ഞു. പലതരത്തിലുള്ള ക്രീമുകളും മെഡിസിനും ഉപയോഗിച്ചിരുന്നു. ചില ചികിത്സകൾ ചെറിയ മാറ്റം ഉണ്ടാക്കും. എന്നാൽ വീണ്ടും പഴയപോലെ തന്നെയാകും. തന്റെ ഈ അവസ്ഥയിൽ അമ്മയ്ക്ക് വിഷമം ആണെന്നും പല അമ്പലങ്ങളിലും വഴിപാടുകൾ വരെ നേർന്നെന്നും അശ്വതി വീഡിയോയിൽ പറയുന്നുണ്ട്.
