‘ജയിലർ 2’ സിനിമയിൽ മോഹൻലാലിന്റെ രംഗങ്ങൾ വെട്ടിച്ചുറച്ചതുമായി ബന്ധപ്പെട്ട് താൻ നടത്തിയ പരാമർശങ്ങളിൽ വിശദീകരണവുമായി കോസ്റ്റ്യൂം ഡിസൈനറും മോഹൻലാലിന്റെ സ്റ്റൈലിസ്റ്റുമായ ജിഷാദ് ഷംസുദ്ദീൻ. താൻ പങ്കുവെച്ച വാക്കുകൾ പെട്ടെന്നുണ്ടായ വികാരം കൊണ്ട് സംഭവിച്ചുപോയതാണെന്നും, ഒരു സിനിമയുടെ അന്തിമ കട്ട് തീരുമാനിക്കുന്നതിൽ സംവിധായകന്റെയും അണിയറപ്രവർത്തകരുടെയും സർഗ്ഗാത്മക സ്വാതന്ത്ര്യത്തെ താൻ പൂർണ്ണമായും മാനിക്കുന്നുവെന്നും അദ്ദേഹം വ്യക്തമാക്കി.
മോഹൻലാൽ കഥാപാത്രത്തിനായി അത്രയധികം കഷ്ടപ്പെട്ട് തയ്യാറാക്കിയ കോസ്റ്റ്യൂമുകൾ തിയേറ്റർ പതിപ്പിൽ കാണാതിരുന്നപ്പോഴുള്ള നിരാശയാണ് അന്ന് പ്രതികരണത്തിന് കാരണമായതെന്ന് അദ്ദേഹം വ്യക്തമാക്കുന്നു. എന്നാൽ സിനിമയുടെ സംവിധായകനെയോ മറ്റ് അണിയറപ്രവർത്തകരെയോ വ്യക്തിപരമായി അനാദരിക്കാനോ കുറ്റപ്പെടുത്താനോ അല്ല ആ വാക്കുകൾ ഉപയോഗിച്ചതെന്നും, തങ്ങളുടെ ഭാഗത്തുനിന്നുള്ള സ്‌നേഹക്കൂടുതൽ കൊണ്ടാണ് അങ്ങനെ പ്രതികരിക്കേണ്ടി വന്നതെന്നും അദ്ദേഹം കൂട്ടിച്ചേർത്തു.
ചിത്രത്തിന്റെ റിലീസിന് പിന്നാലെ സോഷ്യൽ മീഡിയയിൽ വലിയ ചർച്ചയായ ഈ വിവാദത്തിന്മേലാണ് ഇപ്പോൾ ജിഷാദ് പുതിയ വിശദീകരണവുമായി രംഗത്തെത്തിയിരിക്കുന്നത്. ‘ജയിലർ 2’ വൻ വിജയമായി തിയേറ്ററുകളിൽ പ്രദർശനം തുടരുന്നതിനിടയിൽ, ഉണ്ടായ തെറ്റിധാരണകൾ ഒഴിവാക്കാനും സിനിമയുടെ വിജയത്തിനൊപ്പം നിൽക്കാനുമാണ് കോസ്റ്റ്യൂം ഡിസൈനറുടെ ഈ പുതിയ പ്രതികരണം സഹായിച്ചിരിക്കുന്നത്.
