കൊച്ചി: പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന നിവിൻ പോളി-ഗിരീഷ് എ.ഡി ചിത്രം ‘ബെത്ലഹേം കുടുംബ യൂണിറ്റിന്റെ’ ചിത്രീകരണം കൊച്ചിയിൽ ആരംഭിച്ചു. ‘പ്രേമലു’ എന്ന മെഗാ ഹിറ്റിന് ശേഷം ഗിരീഷ് എ.ഡി സംവിധാനം ചെയ്യുന്ന ചിത്രമെന്ന പ്രത്യേകതയും ഇതിനുണ്ട്. ഒരു കംപ്ലീറ്റ് കോമഡി എന്റർടെയ്നറായാണ് ചിത്രം ഒരുങ്ങുന്നത്.
നിവിൻ പോളിക്കൊപ്പം നസ്ലെൻ, മമിത ബൈജു എന്നിവരും പ്രധാന വേഷങ്ങളിൽ എത്തുന്നുണ്ട്. തണ്ണീർമത്തൻ ദിനങ്ങൾ, പ്രേമലു എന്നീ ചിത്രങ്ങളിലൂടെ മലയാളികളെ ചിരിപ്പിച്ച ഗിരീഷ് എ.ഡി, നിവിൻ പോളിയുടെ തനത് ഹാസ്യശൈലി കൂടി ചേർത്താണ് ഈ സിനിമ ഒരുക്കുന്നത്. നിവിൻ പോളിയുടെ തിരിച്ചുവരവ് കാത്തിരിക്കുന്ന ആരാധകർക്ക് ഈ ചിത്രം വലിയൊരു വിരുന്നായിരിക്കുമെന്നാണ് സൂചന.
ഭാവന സ്റ്റുഡിയോസിന്റെ ബാനറിൽ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്നാണ് ചിത്രം നിർമ്മിക്കുന്നത്. ഒരു സാധാരണ കുടുംബ പശ്ചാത്തലത്തിൽ നടക്കുന്ന രസകരമായ സംഭവങ്ങളാണ് സിനിമയുടെ ഇതിവൃത്തം. കൊച്ചിയിലും പരിസരപ്രദേശങ്ങളിലുമായി സിനിമയുടെ ചിത്രീകരണം പുരോഗമിക്കുന്നു.
