കൊച്ചി: ഓരോ സിനിമയിലും വ്യത്യസ്തമായ കഥാപാത്രങ്ങളെ തിരഞ്ഞെുടുക്കുന്ന പാർവതി തിരുവോത്ത് വീണ്ടും ഒരു പോലീസ് വേഷത്തിൽ എത്തുന്നു. നവാഗതനായ സിദ്ധാർത്ഥ് ഭരതൻ സംവിധാനം ചെയ്യുന്ന ‘പ്രഥമദൃഷ്ട്യാ കുറ്റക്കാർ’ എന്ന ചിത്രത്തിന്റെ ഷൂട്ടിംഗ് കൊച്ചിയിൽ ആരംഭിച്ചു. ഒരു ക്രൈം ത്രില്ലർ ഗണത്തിൽപ്പെടുന്ന ചിത്രമാണിതെന്നാണ് സൂചന.
അന്വേഷണ ഉദ്യോഗസ്ഥയുടെ വേഷത്തിലാണ് പാർവതി ചിത്രത്തിൽ അഭിനയിക്കുന്നത്. വമ്പൻ താരനിര അണിനിരക്കുന്ന ഈ ചിത്രത്തിൽ റോഷൻ മാത്യുവും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ‘വർത്തമാനം’ എന്ന സിനിമയ്ക്ക് ശേഷം പാർവതിയും റോഷനും ഒന്നിക്കുന്ന ചിത്രം കൂടിയാണിത്. സ്ക്രിപ്റ്റ് ബോക്സ് ഫിലിംസിന്റെ ബാനറിൽ നിർമ്മിക്കുന്ന ഈ സിനിമയുടെ തിരക്കഥ ഒരുക്കിയിരിക്കുന്നത് ബിപിൻ ചന്ദ്രനാണ്.
ചിത്രത്തിന്റെ പൂജ ചടങ്ങുകൾ കഴിഞ്ഞ ദിവസം നടന്നു. ഗൗരവമേറിയ ഒരു ഇൻവെസ്റ്റിഗേഷൻ ത്രില്ലറായിരിക്കും ഇതെന്ന സൂചനയാണ് അണിയറപ്രവർത്തകർ നൽകുന്നത്. പാർവതിയുടെ പ്രകടനം തന്നെയാകും ചിത്രത്തിന്റെ പ്രധാന ആകർഷണം. കൊച്ചിയിലും പരിസരപ്രദേശങ്ങളിലുമായി ചിത്രീകരണം പുരോഗമിക്കുകയാണ്.
