നിതേഷ് തിവാരിയുടെ സംവിധാനത്തിൽ ഒരുങ്ങിയ ബ്രഹ്മാണ്ഡ ചിത്രം ‘രാമായണ’ ആഗോള ബോക്സ് ഓഫീസിൽ വമ്പൻ മുന്നേറ്റം തുടരുന്നു. റിലീസ് ചെയ്ത് വെറും മൂന്ന് ദിവസം പിന്നിടുമ്പോൾ ലോകമെമ്പാടുമായി 415 കോടി രൂപയാണ് ചിത്രം സ്വന്തമാക്കിയിരിക്കുന്നത്. ഇന്ത്യൻ സിനിമയിലെ ഏറ്റവും വലിയ പ്രൊജക്ടുകളിലൊന്നായി ഒരുങ്ങിയ ചിത്രത്തിന് ലഭിക്കുന്ന ഈ സ്വീകാര്യത സിനിമാലോകത്തും വലിയ ചർച്ചയായിരിക്കുകയാണ്.രൺബീർ കപൂർ ശ്രീരാമനായും യഷ് രാവണനായും എത്തുന്ന ചിത്രത്തിൽ സായ് പല്ലവിയാണ് സീതയുടെ വേഷം അവതരിപ്പിക്കുന്നത്. നമിത് മൽഹോത്രയുടെ പ്രൈം ഫോക്കസ് സ്റ്റുഡിയോസ്, എട്ട് തവണ ഓസ്കർ പുരസ്കാരം നേടിയ വിഷ്വൽ എഫക്ട്സ് സ്ഥാപനമായ ഡിഎൻഇജി, യഷിന്റെ മോൺസ്റ്റർ മൈൻഡ് ക്രിയേഷൻസ് എന്നിവർ ചേർന്നാണ് ചിത്രം നിർമ്മിക്കുന്നത്. മലയാളം, ഹിന്ദി, തമിഴ്, തെലുങ്ക്, കന്നഡ എന്നീ അഞ്ച് ഭാഷകളിലാണ് ചിത്രം പുറത്തിറങ്ങിയിരിക്കുന്നത്.
ചിത്രത്തിന്റെ അന്താരാഷ്ട്ര വിതരണാവകാശം സോണി പിക്ചേഴ്സിനാണ്. ഉത്തരേന്ത്യയിൽ ധർമ്മ പ്രൊഡക്ഷൻസാണ് ചിത്രം തിയേറ്ററുകളിലെത്തിക്കുന്നത്. ഇന്ത്യൻ സിനിമയിലെ വിവിധ തലമുറകളിലെ പ്രമുഖ താരങ്ങളെ അണിനിരത്തിയാണ് ഈ ഇതിഹാസ ചിത്രം ഒരുക്കിയിരിക്കുന്നത്. ധർമ്മത്തിന്റെയും നീതിയുടെയും പ്രതീകമായ ശ്രീരാമനായി രൺബീർ കപൂർ എത്തുമ്പോൾ കരുത്തും ലാളിത്യവും അനുകമ്പയും നിറഞ്ഞ സീതാദേവിയുടെ വേഷമാണ് സായ് പല്ലവി അവതരിപ്പിക്കുന്നത്. യഷ് രാവണനായി എത്തുന്നു എന്നതാണ് ചിത്രത്തിന്റെ മറ്റൊരു പ്രധാന ആകർഷണം. മലയാളികളുടെ പ്രിയതാരം ശോഭന കൈകേയിയായും, പഴയ ടെലിവിഷൻ രാമായണ പരമ്പരയിൽ ശ്രീരാമനായി ശ്രദ്ധ നേടിയ അരുൺ ഗോവിൽ ദശരഥ മഹാരാജാവായും വേഷമിടുന്നു.
ലക്ഷ്മണനായി രവി ദുബെയും വിശ്വാമിത്ര മഹർഷിയായി അജിങ്ക്യ ദേവും ഇന്ദ്രദേവനായി കുനാൽ കപൂറും എത്തുന്നു. രാകുൽ പ്രീത് സിങ്ങാണ് ശൂർപ്പണഖയുടെ വേഷം കൈകാര്യം ചെയ്യുന്നത്. വമ്പൻ താരനിരയ്ക്കൊപ്പം ചിത്രത്തിന്റെ സാങ്കേതിക മികവും വലിയ പ്രതീക്ഷയാണ് സൃഷ്ടിക്കുന്നത്.’ദംഗൽ’ എന്ന ചിത്രത്തിലൂടെ ആഗോളതലത്തിൽ ശ്രദ്ധ നേടിയ സംവിധായകൻ നിതേഷ് തിവാരിയാണ് ‘രാമായണ’ ഒരുക്കുന്നത്. ഇന്ത്യൻ സംസ്കാരത്തിലും പാരമ്പര്യത്തിലും ആഴത്തിൽ വേരൂന്നിയ ഇതിഹാസത്തെ ലോകസിനിമയുടെ നിലവാരത്തിൽ അവതരിപ്പിക്കുകയാണ് അണിയറപ്രവർത്തകരുടെ ലക്ഷ്യം. ശ്രീധർ രാഘവനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
ചിത്രത്തിന്റെ സംഗീതവും പശ്ചാത്തല സംഗീതവും മറ്റൊരു പ്രധാന ആകർഷണമാണ്. ഓസ്കർ ജേതാക്കളായ ഹാൻസ് സിമ്മറും എ.ആർ. റഹ്മാനും ആദ്യമായി ഒന്നിക്കുന്നു എന്ന പ്രത്യേകതയും ‘രാമായണ’യ്ക്കുണ്ട്. ലോകോത്തര സംഗീതവും അത്യാധുനിക സാങ്കേതിക വിദ്യയും സംയോജിപ്പിച്ചാണ് ചിത്രം ഒരുക്കിയിരിക്കുന്നത്. എട്ട് തവണ അക്കാദമി അവാർഡ് നേടിയ ഡിഎൻഇജിയാണ് ചിത്രത്തിന്റെ ദൃശ്യവിസ്മയങ്ങൾക്ക് പിന്നിൽ. വമ്പൻ വിഷ്വൽ എഫക്ട്സും വലിയ നിർമ്മാണച്ചെലവും ചിത്രത്തെ ഇന്ത്യൻ സിനിമയിലെ ഏറ്റവും ശ്രദ്ധേയമായ പ്രോജക്ടുകളിലൊന്നാക്കി മാറ്റുന്നു.
‘രാമായണം കേവലം ഒരു കഥയല്ല, മറിച്ച് നമ്മുടെ ജീവിതത്തിന്റെയും സംസ്കാരത്തിന്റെയും ഭാഗമാണ്. ഇന്ത്യയുടെ ഏറ്റവും വലിയ ഇതിഹാസത്തെ അതിന്റെ എല്ലാ മഹത്വത്തോടെയും ലോകത്തിന് മുന്നിൽ അവതരിപ്പിക്കുകയാണ് ലക്ഷ്യം’ എന്നാണ് നിർമ്മാതാവ് നമിത് മൽഹോത്ര നേരത്തെ വ്യക്തമാക്കിയത്. രണ്ട് ഭാഗങ്ങളായാണ് ‘രാമായണ’ സിനിമാപരമ്പര ഒരുങ്ങുന്നത്. ഇതിലെ ആദ്യ ഭാഗം ഇന്ത്യൻ സിനിമയിലെ ഏറ്റവും വലിയ ബജറ്റിലുള്ള ചിത്രങ്ങളിലൊന്നായാണ് വിലയിരുത്തപ്പെടുന്നത്. മൂന്ന് ദിവസം കൊണ്ട് 415 കോടി രൂപയുടെ ആഗോള കളക്ഷൻ നേടിയെന്ന റിപ്പോർട്ടുകൾ പുറത്തുവരുമ്പോൾ വരും ദിവസങ്ങളിലും ചിത്രം ബോക്സ് ഓഫീസിൽ വലിയ മുന്നേറ്റം നടത്തുമെന്നാണ് ആരാധകരുടെ പ്രതീക്ഷ.
