പുതുവർഷ ദിനത്തിൽ തന്റെ ജീവിതത്തിലെ ഏറെ പ്രധാനപ്പെട്ട ഒരാൾക്കൊപ്പം ചെലവഴിച്ചതിന്റെ വിശേഷങ്ങൾ പങ്കുവച്ച് മലയാളത്തിന്റെ പ്രിയ താരം ഉണ്ണി മുകുന്ദൻ. ബിജെപി നേതാവും തമിഴ്നാട് ബിജെപി മുൻ അധ്യക്ഷനുമായ കെ അണ്ണാമലൈയെ കണ്ടതിന്റെ സന്തോഷമാണ് ഉണ്ണി മുകുന്ദൻ പങ്കുവച്ചത്. തങ്ങൾക്കിടയിലുള്ള സൗഹൃദത്തെക്കുറിച്ചും അണ്ണാമലൈ എന്ന വ്യക്തി തനിക്ക് നൽകുന്ന പ്രചോദനത്തെക്കുറിച്ചും ഉണ്ണി മുകുന്ദൻ കുറിച്ചു. അണ്ണാമലൈയുടെ കുടുംബം സ്നേഹത്തോടെ തന്നെ സത്ക്കാരിച്ചതിനെക്കുറിച്ചും ഉണ്ണി മുകുന്ദൻ പങ്കുവച്ചു.
ബിജെപി നേതാവും തമിഴ്നാട് ബിജെപി മുൻ അധ്യക്ഷനുമായ കെ. അണ്ണാമലൈയ്ക്കൊപ്പമുള്ള ഹൃദ്യമായ നിമിഷങ്ങളും ചിത്രങ്ങളുമാണ് താരം സോഷ്യൽ മീഡിയയിലൂടെ ആരാധകരുമായി പങ്കുവച്ചത്. രാഷ്ട്രീയ വേഷപ്പകർച്ചകൾക്കപ്പുറം തങ്ങൾക്കിടയിലുള്ള ആഴത്തിലുള്ള സൗഹൃദത്തെക്കുറിച്ചും അണ്ണാമലൈ എന്ന വ്യക്തി തനിക്ക് നൽകുന്ന പ്രചോദനത്തെക്കുറിച്ചും ഉണ്ണി മുകുന്ദൻ കുറിപ്പിൽ മനസ്സ് തുറന്നു.
ആഡംബരങ്ങളില്ലാത്ത, സ്നേഹം നിറഞ്ഞ ആ വീടിന്റെ അകത്തളങ്ങളിൽ നടന്ന സൗഹൃദ സംഭാഷണങ്ങളെയും അണ്ണാമലൈയുടെ കുടുംബം സ്നേഹത്തോടെ നൽകിയ സൽക്കാരത്തെക്കുറിച്ചും ഉണ്ണി മുകുന്ദൻ വാചാലനായി. തനിക്ക് പ്രചോദനമായ ഒരു മനുഷ്യനെ കാണാൻ സാധിച്ചു, അതിലുപരി അദ്ദേഹം ഇപ്പോൾ എന്റെ പ്രിയ സുഹൃത്തായി മാറിയിരിക്കുന്നു എന്നും ഉണ്ണി മുകുന്ദൻ കുറിച്ചു
2026 ന്റെ പ്രഭാതത്തിൽ, എന്നെയും എന്നെപ്പോലെ ഒരുപാട് പേരെയും ഏറെ സ്വാധീനിച്ചിട്ടുള്ള ഒരാളോടൊപ്പം ഉച്ചഭക്ഷണം പങ്കിടാൻ എനിക്ക് അവസരം ലഭിച്ചു. മുതിർന്ന ബിജെപി നേതാവും തമിഴ്നാട് ബിജെപി മുൻ അധ്യക്ഷനുമായ കെ അണ്ണാമലൈ. അദ്ദേഹം എന്റെ പ്രിയ സുഹൃത്താണ്, അതുപോലെ തന്നെ ഇന്നത്തെ തലമുറയ്ക്ക് മാതൃകയാക്കാവുന്ന ഒരു വ്യക്തിത്വവും. ലളിതമായൊരു ഭക്ഷണത്തിൽ തുടങ്ങിയ ഞങ്ങളുടെ ആ സംസാരം പിന്നീട് ജീവിതത്തെയും രാഷ്ട്രീയത്തെയും സിനിമയെയും കായികവിനോദങ്ങളെയും കുറിച്ചുള്ള ഹൃദയം തുറന്ന സംഭാഷണമായി മാറി. ഇത്രയധികം കഠിനാധ്വാനവും അച്ചടക്കവും നിറഞ്ഞ ജീവിതം നയിച്ചിട്ടും അദ്ദേഹം കാണിക്കുന്ന ആ ലാളിത്യം എന്നെ ശരിക്കും അത്ഭുതപ്പെടുത്തി.
ഒരു പൊലീസ് ഉദ്യോഗസ്ഥന്റെ സുരക്ഷിതമായ ജോലി ഉപേക്ഷിച്ച്, തന്റെ ഉറച്ച വിശ്വാസത്തിന്റെ കരുത്തിൽ രാഷ്ട്രീയത്തിന്റെ വലിയ ലോകത്തേക്ക് ഇറങ്ങിവന്ന അദ്ദേഹത്തിന്റെ യാത്ര എത്രത്തോളം പ്രചോദനമാണെന്ന് ഞാൻ പറഞ്ഞു. അദ്ദേഹത്തിന്റെ ‘ബിയോണ്ട് ഖാക്കി’ എന്ന പുസ്തകം വായിച്ചപ്പോൾ എനിക്ക് തോന്നിയത്, ലക്ഷ്യബോധമാണ് നമ്മുടെ ജീവിതത്തിന് അർത്ഥമുണ്ടാക്കുന്നത് എന്നാണ്.
അണ്ണാമലൈയ്ക്കും കുടുംബത്തിനും അവരുടെ സ്നേഹത്തിനും ആ സ്വാദിഷ്ടമായ തനത് ഭക്ഷണത്തിനും ഞാൻ ഹൃദയപൂർവ്വം നന്ദി പറയുന്നു. കുറേക്കാലമായി പ്ലാൻ ചെയ്ത ഈ കൂടിക്കാഴ്ചയ്ക്ക് എന്തുകൊണ്ടും അനുയോജ്യമായ ദിവസം ഈ പുതുവർഷ പുലരി തന്നെയായിരുന്നു. പ്രിയ സുഹൃത്തേ, ആ നല്ല നിമിഷങ്ങൾക്കും സ്നേഹത്തിനും നന്ദി. എല്ലാ നന്മകളും നേരുന്നു. ഒപ്പം, നമുക്ക് കളിക്കാനുള്ള ആ ക്രിക്കറ്റ് മാച്ചിനായി ഞാൻ കാത്തിരിക്കുന്നു! എനിക്ക് പ്രചോദനമായ ഒരു മനുഷ്യനെ കാണാൻ സാധിച്ചു, അതിലുപരി അദ്ദേഹം ഇപ്പോൾ എന്റെ പ്രിയ സുഹൃത്തായി മാറിയിരിക്കുന്നു എന്നും ഉണ്ണി മുകുന്ദൻ കുറിച്ചു.
ഉണ്ണി മുകുന്ദന് മറുപടിയുമായി അണ്ണാമലൈയുമെത്തി.‘പ്രിയ സഹോദരൻ ഉണ്ണി മുകുന്ദൻ, ഇന്ന് താങ്കൾക്ക് ആതിഥേയത്വം വഹിക്കാൻ കഴിഞ്ഞതിൽ അതിയായ സന്തോഷമുണ്ട്. താങ്കളോടൊപ്പം ചെലവഴിച്ച സമയം ഞാൻ ശരിക്കും വിലമതിക്കുന്നു. താങ്കളുടെ സിനിമാ യാത്രയിൽ തുടർന്നും വിജയങ്ങളും വലിയ നാഴികക്കല്ലുകളും ഉണ്ടാകട്ടെ എന്ന് ആശംസിക്കുന്നു. പിന്നെ, നമ്മൾ സംസാരിച്ച ആ ക്രിക്കറ്റ് മത്സരം തീർച്ചയായും നടക്കും, നമ്മൾ കരുതുന്നതിലും വേഗത്തിൽ.’’- അണ്ണാമലൈ കുറിച്ചു.
