ശരീരത്തിന്റെ വളര്ച്ചയിലും ഉപാപചയ പ്രവര്ത്തനങ്ങളിലും നിര്ണ്ണായക പങ്ക് വഹിക്കുന്ന ഒരു ഗ്രന്ഥിയാണ് തൈറോയ്ഡ്. ഇത് തകരാറിലാകുമ്പോൾ ചില ശാരീരിക സൂചനകൾ കാണിക്കാറുണ്ട്. തൈറോയ്ഡ് ഹോര്മോണിന്റെ ഉല്പാദനം കൂടുന്നതാണ് ഹൈപ്പര് തൈറോയ്ഡിസം. തൈറോയ്ഡ് ഹോര്മോണിന്റെ ഉല്പാദനം കുറയുന്നത് ഹൈപ്പോ തൈറോയ്ഡിസം.
ഹൈപ്പോതൈറോയിഡിസത്തിന്റെ പ്രാരംഭ ലക്ഷണങ്ങൾ
ശരീരത്തിന് ആവശ്യമായ അളവിൽ തൈറോയ്ഡ് ഹോർമോണുകൾ ഉത്പാദിപ്പിക്കാൻ തൈറോയ്ഡ് ഗ്രന്ഥിക്ക് കഴിയാതെ വരുമ്പോഴാണ് ഹൈപ്പോതൈറോയിഡിസം അഥവാ അണ്ടർ ആക്റ്റീവ് തൈറോയ്ഡ് എന്ന് പറയുന്നത്. ഒരു രാത്രി മുഴുവൻ ഉറങ്ങിയാലും തോന്നുന്ന ക്ഷീണം, തലമുടി കൊഴിച്ചില്, പതിവ് പരിചരണം നൽകിയാലും ചർമ്മം വരണ്ടതായി മാറിയേക്കാം, പേശിവലിവ്, സന്ധി വേദന, മലബന്ധം പോലുള്ള ദഹന പ്രശ്നങ്ങൾ, അമിതമായ ഉറക്കം മുതൽ ഉറക്കക്കുറവ് വരെ ചിലരില് ഉണ്ടാകാം, ശരീരഭാരം കൂടുക, വിഷാദം തുടങ്ങിയവയൊക്കെ ഹൈപ്പോ തൈറോയിഡിസത്തിന്റെ സൂചനകളാകാം.
ഹൈപ്പർതൈറോയിഡിസത്തിന്റെ പ്രാരംഭ ലക്ഷണങ്ങൾ
ഹൈപ്പർതൈറോയിഡിസം അല്ലെങ്കിൽ അമിത പ്രവർത്തനക്ഷമതയുള്ള തൈറോയ്ഡ് എന്നത് ശരീരത്തിന് ആവശ്യമുള്ളതിനേക്കാൾ കൂടുതൽ തൈറോയ്ഡ് ഹോർമോൺ തൈറോയ്ഡ് ഗ്രന്ഥി ഉത്പാദിപ്പിക്കുന്ന അവസ്ഥയെയാണ് സൂചിപ്പിക്കുന്നത്. വിശപ്പ് ഉണ്ടെങ്കില് പോലും ശരീരഭാരം കുറയുക, അമിതമായ വിയർപ്പ്, വൈകുന്നേരങ്ങളിൽ അസാധാരണമായി ചൂട് അനുഭവപ്പെടാം, ഉത്കണ്ഠ, ക്ഷോഭം, ഇടയ്ക്കിടെയുള്ള മലവിസർജ്ജനം, ചിലർക്ക് കൈകളിൽ നേരിയ വിറയൽ അനുഭവപ്പെടാം, എന്നിവയ്ക്കൊപ്പം വേഗത്തിലുള്ളതോ ക്രമരഹിതമായതോ ആയ ഹൃദയമിടിപ്പ് തുടങ്ങിയവയൊക്കെ ഹൈപ്പർതൈറോയിഡിസത്തിന്റെ സൂചനകളാകാം.
