സിനിമകളില് മാത്രമല്ല, സിനിമയ്ക്ക് പുറത്തും വ്യക്തിപ്രഭാവം നിലനിർത്തുന്ന താരമാണ് സുരേഷ് ഗോപി. സ്റ്റേജ് ഷോകളിലും അദ്ദേഹം തിളങ്ങാറുണ്ട്.സിനിമയ്ക്ക് അപ്പുറം ജീവിതത്തിലും അടുത്ത സൗഹൃദം പുലര്ത്തുന്നവരാണ് നടൻ ജയറാമും സുരേഷ് ഗോപിയും. ജയറാമിന്റെ ജീവിതപങ്കാളിയും നടിയുമായ പാര്വതി തനിക്ക് സഹോദരിയെ പോലെയാണെന്ന് പലപ്പോഴും അഭിമുഖങ്ങളില് സുരേഷ് ഗോപി പറയാറുമുണ്ട്. ദത്ത് പെങ്ങള് എന്നാണ് പാര്വതിയെ സുരേഷ് ഗോപി വിശേഷിപ്പിക്കാറുള്ളത്. പരസ്പരം ട്രോളാൻ മാത്രമുള്ള സ്വാതന്ത്ര്യവും ജയറാമിനും സുരേഷ് ഗോപിയ്ക്കും ഇടയിലുണ്ട്. ജയറാമിന്റെ മിമിക്രികളും തമാശകളും ട്രോളുകളുമൊക്കെ ഏറെ ആസ്വദിക്കുന്ന ആള് കൂടിയാണ് സുരേഷ് ഗോപി. ഇപ്പോഴിതാ, സുരേഷ് ഗോപിയെ ട്രോളി കൊണ്ട് ജയറാം ഷെയര് ചെയ്ത ഒരു വീഡിയോ ആണ് ശ്രദ്ധ നേടുന്നത്. ഇന്സ്റ്റഗ്രാമിലൂടെയാണ് ജയറാം വീഡിയോ പുറത്തിറക്കിയിരിക്കുന്നത്. സുരേഷ് ഗോപിയെ ടാഗ് ചെയ്തുകൊണ്ടായിരുന്നു പോസ്റ്റ്. അടുത്തിടെ ഒരു ടെലിവിഷൻ പരിപാടിയ്ക്കിടയില് ‘അലവൈകുണ്ഠപുരം’ എന്ന തെലുങ്ക് ചിത്രത്തിലെ ‘സാമജവരഗമന’ എന്ന ഗാനം പാടുന്ന സുരേഷ് ഗോപിയുടെ വീഡിയോ സാമൂഹിക മാധ്യമങ്ങളിലടക്കം വൈറലായിരുന്നു. സുരേഷ് ഗോപി പാടുന്ന പാട്ടിന്റെ വരികളില് തെറ്റുകളുണ്ടെങ്കിലും അതൊന്നും നോക്കാതെ അപാരമായ ആത്മവിശ്വാസത്തോടെ ‘സാമജവരഗമന’ ആലപിക്കുന്ന സുരേഷ് ഗോപിയെ ആണ് ആ വീഡിയോയില് കാണാൻ സാധിക്കുക. സുരേഷ് ഗോപിയുടെ ആ വൈറല് വീഡിയോ അനുകരിക്കുകയാണ് ജയറാം ഇപ്പോള്. സുരേഷ് ഗോപിയുടെ ചിത്രങ്ങളിലെ ഐക്കോണിക് മാനറിസങ്ങളും ആക്ഷനുകളുമെല്ലാം ഗാനത്തിനിടയില് ജയറാം അനുകരിക്കുന്നതും വീഡിയോയില് കാണാം. വീഡിയോ കണ്ട് കമന്റുമായി സുരേഷ് ഗോപിയും എത്തിയിട്ടുണ്ട്.
പൊട്ടിച്ചിരിയുടെ സ്മൈലികളാണ് അദ്ദേഹം കമന്റ് ആയി ഇട്ടിരിക്കുന്നത്.ഏതായാലും രസകരമായ ഈ വീഡിയോ ആരാധകർ ഏറ്റെടുത്തു കഴിഞ്ഞു. ഈ വീഡിയോ പോസ്റ്റ് ചെയ്ത് രണ്ട് ദിവസത്തിനുള്ളിൽ തന്നെ ഏഴ് ദശലക്ഷത്തോളം പേരാണ് ഈ വീഡിയോ കണ്ടിരിക്കുന്നത്. മാത്രമല്ല ഇരുപതിനായിരത്തിലധികം കമന്റുകളുമാണ് വീഡിയോയ്ക്ക് ലഭിച്ചിരിക്കുന്നത്. സുരേഷ് ഗോപിയുടെയും ജയറാമിന്റെയും സിനിമകളിലെ ഡയലോഗുകളും കഥാപാത്രങ്ങളുടെ പേരും ഒക്കെ സമന്വയിപ്പിച്ച് രസകരമായ കമെന്റുകളാണ് ഇരുവരുടെയും ആരാധകർ കുറിക്കുന്നത്. സിനിമാ രംഗത്തെ നിരവധി പ്രമുഖരും ഈ വീഡിയോയ്ക്ക് താഴെ രസകരമായ കമെന്റുകൾ കുറിക്കുന്നുണ്ട്.അതേസമയം മിഥുന് മാനുവല് തോമസ് സംവിധാനം ചെയ്യുന്ന അബ്രഹാം ഓസ്ലര് ആണ് ജയറാമിന്റെ പുതിയ മലയാള ചിത്രം. അഞ്ചാം പാതിരാ എന്ന സൂപ്പര്ഹിറ്റ് ചിത്രത്തിനു ശേഷം മിഥുന് സംവിധാനം ചെയ്യുന്ന ചിത്രമാണിത്. മലയാളത്തില് സമീപകാലത്ത് ഏറെ ശ്രദ്ധയോടെയാണ് ജയറാം പുതിയ പ്രോജക്റ്റുകള് തെരഞ്ഞെടുക്കുന്നത്. അതേസമയം ഇതര ഭാഷകളില് നിരവധി വലിയ പ്രോജക്റ്റുകളുടെ ഭാഗവുമാണ് അദ്ദേഹം. പൊന്നിയിന് സെല്വനും അല വൈകുണ്ഠപുരമുലോയുമടക്കം നിരവധി ചിത്രങ്ങള് സമീപ കാലത്ത് തിയറ്ററുകളില് എത്തിയിരുന്നു. ഇനിയുമേറെ ചിത്രങ്ങള് ആ നിരയില് വരാനിരിക്കുന്നുമുണ്ട്. അതേസമയം പുതിയ ചിത്രം ജയറാമിന് മലയാളത്തില് അടുത്ത ബ്രേക്ക് ആവുമെന്ന പ്രതീക്ഷയിലാണ് സിനിമാ ആരാധകർ. അതേസമയം ഒറ്റക്കൊമ്പന്, ഗരുഡന്, ഹൈവേ 2 തുടങ്ങി ഒട്ടേറെ പ്രോജക്റ്റുകളാണ് സുരേഷ് ഗോപിയുടേതായി പുറത്തെത്താനിരിക്കുന്നത്.