ഒരുപാട് പ്രതീക്ഷകളുമായി നാളെ തീയറ്ററിൽ എത്തുന്ന മോഹൻലാൽ ചിത്രം നേരിന് ആശംസയുമായി നടൻ മമ്മൂട്ടി. ‘പ്രിയ സഹോദരൻ ലാലിന് എല്ലാവിധ ആശംസകളും നേരുന്നു’ എന്നാണ് മമ്മൂട്ടി സാമൂഹ്യ മാധ്യമ അക്കൗണ്ടുകളിൽ ആശംസകൾ അറിയിച്ചത്. ഒപ്പം മോഹൻലാലിന്റെ നേര് ലുക്കും പങ്കുവച്ചിട്ടുണ്ട്. എന്തായാലും മമ്മൂട്ടി പോസ്റ്റ് അതിവേഗം വൈറലായിട്ടുണ്ട്. നിരവധി പേരാണ് കമന്റുകളുമായി എത്തുന്നത്. ‘ഇതിലും വലിയ പ്രമോഷൻ സ്വപ്നങ്ങളിൽ മാത്രം, തമ്മിൽ ചെളിവാരി എറിയുന്ന ഫാൻസുകാർ അറിയുന്നില്ല ഇവർ തമ്മിൽ ഉള്ള സ്നേഹ ബന്ധത്തിൻ്റെ ആഴം, ഇവരുടെ പേരിൽ തല്ലു പിടിക്കുന്ന ഫാൻസുകാർ ഇത് കാണൂ, ഇച്ചാക്കന്റെ സ്വന്തം ലാലു എന്നിങ്ങനെയാണ് കമന്റുകൾ.
ഏറെ നാളത്തെ കാത്തിരിപ്പുകൾക്ക് ഒടുവിലാണ് ഒരു മോഹൻലാൽ ചിത്രം തീയറ്ററിൽ എത്തുന്നത്. ഇതിനിടെ സിനിമയുടെ കഥ തന്റേതാണെന്ന ആരോപണവുമായി എഴുത്തുകാരൻ ദീപക് ഉണ്ണി രംഗത്ത് എത്തിയത് വിവാദങ്ങൾക്ക് കാരണണായിരുന്നു. ഹൈക്കോടതിയിൽ ചിത്രത്തിന്റെ റിലീസ് തടയണമെന്നുള്ള ഹർജി തള്ളിയതോടെയാണ് ആരാധകർക്ക് ആശ്വാസം ലഭിച്ചത്. എന്നാൽ ജീത്തു ജോസഫ്, സഹ തിരക്കഥാകൃത്ത് ശാന്തി മായാദേവി, ആന്റണി പെരുമ്പാവൂർ തുടങ്ങിയവർക്ക് നോട്ടീസ് അയച്ചിട്ടുണ്ട്.
ചിത്രത്തിന് എതിരെ ഉയരുന്ന ആരോപണങ്ങളിൽ എത്രമാത്രം കഴമ്പ് ഉണ്ടെന്ന് പ്രേക്ഷകർ സിനിമ കണ്ട് വിലയിരുത്തട്ടെ എന്നാണ് ജീത്തു ഇതിനോട് പ്രതികരിച്ചിരിക്കുന്നത്. മോഹൻലാലിന് ഒപ്പം പ്രിയാമണി, ശാന്തി മായാ ദേവി, സിദ്ധിഖ്, അനശ്വര രാജൻ, ജഗദീഷ്, ശ്രീധന്യ തുടങ്ങി നിരവധി താരങ്ങളും അണിനിരക്കുന്നുണ്ട്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മാണം.