ആരാധകര് ആകാംക്ഷയോടെ കാത്തിരിക്കുന്ന മോഹൻലാല് ചിത്രമാണ് മലൈക്കോട്ടൈ വാലിബൻ. ലിജോ ജോസ് പെല്ലിശ്ശേരിയുടെ സംവിധാനത്തില് ആദ്യമായി മോഹൻലാല് നായകനാകുന്നു എന്നതാണ് ആ ഹൈപ്പിന്റെ കാരണം. മലൈക്കോട്ടൈ വാലിബന്റെ പ്രതീക്ഷകളെ കുറിച്ചുള്ള ചോദ്യങ്ങള്ക്ക് മോഹൻലാല് നല്കിയ മറുപടി ഇപ്പോൾ ചര്ച്ചയാകുകയാണ്. നേരിന്റെ പ്രമോഷനെത്തിയപ്പോഴായിരുന്നു മോഹൻലാലിന്റെ പ്രതികരണം. മലൈക്കോട്ടൈ വാലിബനെത്തുമ്പോള് തിയറ്ററില് തീ പാറുമോ എന്നായിരുന്നു നേരിന്റെ പ്രമോഷന്റെ ഭാഗമായുള്ള വാര്ത്താ സമ്മേളനത്തില് ഒരാള് ചോദിച്ചത്. ആദ്യം നേര് കഴിയട്ടേ എന്നായിരുന്നു മോഹൻലാലിന്റെ ആദ്യ മറുപടി. പിന്നീട് വലിബൻ ഒരു വ്യത്യസ്തമായ ഒരു സിനിമയായിരിക്കുമെന്നും മോഹൻലാൽ കൂട്ടിച്ചേർത്തു. സിനിമകള് മികച്ച ഒന്നാകണമെന്ന് വിചാരിച്ച് തുടങ്ങുന്നതാണ് എല്ലാവരും. സിനിമയ്ക്ക് ഓരോന്നിനും ഓരോ ജാതകമുണ്ട്. നിങ്ങള്ക്ക് തോന്നിയ വികാരം ആ സിനിമയ്ക്ക് ഉണ്ടെങ്കില് അതാണ് പ്രതീക്ഷ എന്ന് പറയുന്നത്. സിനിമ കണ്ടിട്ടേ അത് നമുക്ക് പറയാൻ കഴിയുകയുള്ളൂ. നമുക്ക് കിട്ടിയിരിക്കുന്ന ജോലി ചെയ്യുന്നു. കൂടെയുള്ളവര്ക്കൊപ്പ സഞ്ചരിക്കുന്നു എന്നും മോഹൻലാൽ പറഞ്ഞു . സിനിമ പുറത്തിറങ്ങിയിട്ടാണല്ലോ വിചാരിച്ചതുപോലെയില്ലെന്നൊക്കെ സിനിമയെ കുറിച്ച് തോന്നുന്നത്. എന്താണ് വിചാരിച്ചത് എന്ന് അറിയാനുമാകില്ല. സിനിമയുടേത് ഒരു സീക്രട്ട് റെസിപ്പിയാണ് എന്നും അതുകൊണ്ട് തീ പാറട്ടേ എന്നും മോഹൻലാല് പറയുന്നു.
സംവിധായകൻ ജീത്തു ജോസഫിന്റെ പുതിയ ചിത്രമായ നേര് മോഹൻലാല് നായകനായി ഡിസംബര് 21ന് പ്രദര്ശനത്തിനെത്തുന്നതിനാല് കേരളത്തില് വിവിധ ഇടങ്ങളില് ഫാൻസ് ഷോകള് ചാര്ട്ട് ചെയ്തിട്ടുണ്ട്. കേരളത്തില് തിരുവനന്തപുരം ന്യൂ, കോട്ടയം അഭിലാഷ്, തൃശൂര് എന്നിവടങ്ങളിലായി ഫാൻസ് ഷോ സംഘടിപ്പിക്കുന്നു. ഛായാഗ്രാഹണം നിര്വഹിക്കുന്നത് സതീഷ് കുറുപ്പമാണ്. വിഷ്ണു ശ്യാമാണ് നേരിന്റെ സംഗീത സംവിധാനം നിര്വഹിക്കുന്നത്. മോഹൻലാലിന്റേതായി പാൻ ഇന്ത്യൻ ആക്ഷൻ ചിത്രം ‘വൃഷഭ’യും പൂര്ത്തിയായിക്കൊണ്ടിരിക്കുകയാണ് . സംവിധാനം നന്ദ കിഷോര് ആണ്. സഹ്റ എസ് ഖാന് നായികയായുണ്ടാകും. ദേവിശ്രീ പ്രസാദാണ് സംഗീതം സംവിധാനം. എവിഎസ് സ്റ്റുഡിയോസ്, ഫസ്റ്റ് സ്റ്റെപ്പ് മൂവീസ്, ബാലാജി ടെലിഫിലിംസ്, കണക്റ്റ് മീഡിയ എന്നീ ബാനറുകളില് അഭിഷേക് വ്യാസ്, വിശാല് ഗുര്നാനി, ജൂഹി പരേഖ് മെഹ്ത, ശ്യാം സുന്ദര്, ഏക്ത കപൂര്, ശോഭ കപൂര്, വരുണ് മാതൂര് എന്നിവര് ചേര്ന്നാണ് ചിത്രത്തിന്റെ നിര്മ്മാണം. റോഷന് മെക, ഷനയ കപൂര്, രാഗിണി ദ്വിവേദി, ശ്രീകാന്ത് മെക തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. മോഹൻലാലിന്റെ ‘വൃഷഭ’ തലമുറകളിലൂടെ കഥ പറയുന്ന ഒന്നാണ്. എന്തായാലും ഒരു മലയാള സിനിമയ്ക്ക് ലഭിക്കാവുന്നതില് വച്ചേറ്റവും വലിയ ഹൈപ്പ് ആണ് പ്രഖ്യാപനം മുതല് ‘മലൈക്കോട്ടൈ വാലിബന്’ സിനിമയ്ക്ക് ലഭിക്കുന്നത്. മോഹന്ലാലിനൊപ്പം ലിജോ ജോസ് പെല്ലിശേരി ചേരുമ്പോള് ബ്ലോക്ബസ്റ്റര് സംഭവിക്കും എന്ന പ്രതീക്ഷയിലാണ് ആരാധകര്.