ആദ്യമായി മകള്‍ ആയിഷയ്‌ക്കൊപ്പം വേദി പങ്കിട്ട സന്തോഷം പങ്കുവച്ച് നടനും സംവിധായകനും ഗായകനുമായ നാദിര്‍ഷ. അദ്ദേഹം തന്നെയാണ് സന്തോഷ നിമിഷം സമൂഹമാധ്യമങ്ങളില്‍ പങ്കുവച്ചത്. മകള്‍ക്കൊപ്പം വേദിയില്‍ നിന്നുള്ള ചിത്രങ്ങളും നാദിര്‍ഷ പങ്കുവച്ചിട്ടുണ്ട്.
‘എന്റെ മകള്‍ ആയിഷ ജീവിതത്തില്‍ ആദ്യമായി എന്നോടൊപ്പം ഒരു വേദിയില്‍ പാടിയപ്പോള്‍’ എന്ന് കുറിച്ചാണ് നാദിര്‍ഷ ജീവിതത്തിലെ സ്വപ്‌ന നിമിഷം പങ്കുവച്ചത്. മകളെ ചേര്‍ത്തുപിടിച്ച് സ്‌നേഹപൂര്‍വം ചുംബിക്കുന്ന നാദിര്‍ഷയുടെ ചിത്രം വൈറലായിക്കഴിഞ്ഞു. മസ്‌കത്തിലെ വേദിയിലാണ് ഇരുവരും ഒരുമിച്ച് പാട്ട് പാടിയത്.
നാദിര്‍ഷയ്ക്ക്രണ്ട് പെണ്‍മക്കളാണ്. ആയിഷയും ഖദീജയും. കഴിഞ്ഞ വര്‍ഷം ഫെബ്രുവരിയില്‍ ആയിരുന്നു വ്യവസായി ലത്തീഫ് ഉപ്ലയുടെ മകന്‍ ബിലാലുമായി ആയിഷയുടെ വിവാഹം.
മിമിക്രി വേദികളിലൂടെയെത്തി മലയാള സിനിമയിലെ ശ്രദ്ധേയനായ നടനും സംവിധായകനും ഗായകനുമൊക്കെയായി തിളങ്ങുന്ന താരമാണ് നാദിര്‍ഷ. നടന്‍ ദിലീപുമായി അടുത്ത സൗഹൃദം കാത്ത് സൂക്ഷിക്കുന്നയാളാണ് നാദിര്‍ഷ. നാദിര്‍ഷ സംവിധാനം ചെയ്ത കേശു ഈ വീടിന്റെ നാഥന്‍ സിനിമയില്‍ ദിലീപ് ആയിരുന്നു നായകന്‍.
