നടൻ ദിലീപിന്റെ എറണാകുളം ആലുവയിലെ വീട്ടിൽ അർദ്ധരാത്രിയിൽ അതിക്രമിച്ച് കയറിയ ഒരാൾ പൊലീസ് കസ്റ്റഡിയിൽ. മലപ്പുറം സ്വദേശിയായ അഭിജിത് എന്ന യുവാവിനെയാണ് ആലുവ പൊലീസ് അറസ്റ്റ് ചെയ്തത്.
ഇന്നലെ രാത്രി ഏകദേശം 12 മണിയോടെയായിരുന്നു സംഭവം. സുരക്ഷാ ജീവനക്കാരുടെ ശ്രദ്ധ ഒഴിഞ്ഞ അവസരത്തിലാണ് ഇയാൾ കൊട്ടാരക്കടവിലെ വീട്ടുവളപ്പിൽ കയറിയത്. പിന്നാലെ വീട്ടുകാർക്ക് അന്യനായി വീട്ടിനുള്ളിൽ ആളുണ്ടെന്ന് തിരിച്ചറിഞ്ഞതോടെ, സുരക്ഷാ ജീവനക്കാരും കുടുംബാംഗങ്ങളും ചേർന്ന് ഇയാളെ പിടികൂടി പൊലീസ് അധികൃതർക്ക് കൈമാറുകയായിരുന്നു.
ദിലീപിന്റെ കുടുംബം നൽകിയ പരാതിയെ തുടർന്ന് ആലുവ പൊലീസ് കേസെടുത്ത് അന്വേഷണം ആരംഭിച്ചു. പ്രാഥമിക പരിശോധനയിൽ, അഭിജിത് മദ്യലഹരിയിലായിരുന്നുവെന്നും മോഷണ ഉദ്ദേശമൊന്നും ഇല്ലായിരുന്നുവെന്നും പൊലീസ് വ്യക്തമാക്കി.
ഇത് കുറച്ച് മാസങ്ങൾക്ക് മുമ്പ് നടൻ സൈഫ് അലി ഖാന്റെ വീട്ടിലുണ്ടായ സമാനമായ അതിക്രമ സംഭവത്തെ ഓർമ്മിപ്പിക്കുന്നതാണെന്ന് സോഷ്യൽ മീഡിയയിലും ചർച്ചകൾ ഉയരുന്നുണ്ട്.
