മുഖ്യതെരഞ്ഞെടുപ്പ് കമ്മീഷണർക്കെതിരെയുള്ള പ്രതിഷേധങ്ങളുടെ ഭാഗമായി ദില്ലിയിൽ പ്രമുഖ നേതാക്കളെയും പ്രവർത്തകരെയും പൊലീസ് കസ്റ്റഡിയിലെടുത്ത സംഭവത്തിൽ കേന്ദ്ര സർക്കാരിനെതിരെ ആഞ്ഞടിച്ച് പ്രശസ്ത ചലച്ചിത്ര താരം പ്രകാശ് രാജ്. ജനങ്ങളുടെ ശബ്ദത്തെ അടിച്ചമർത്താൻ ഭരണകൂടം നടത്തുന്ന ഇത്തരം നടപടികൾ ഭയത്തിന്റെ ലക്ഷണമാണെന്ന് അദ്ദേഹം വിമർശിച്ചു. സോഷ്യൽ മീഡിയയിലൂടെയാണ് താരം തന്റെ ശക്തമായ പ്രതികരണം അറിയിച്ചത്.
സമാധാനപരമായ പ്രതിഷേധങ്ങളെ പോലും ഭയത്തോടെ നോക്കിക്കാണുന്ന സർക്കാരിന്റെ നടപടി ജനാധിപത്യത്തിന് അപായസൂചനയാണെന്ന് പ്രകാശ് രാജ് ചൂണ്ടിക്കാണിച്ചു. “നിങ്ങൾ ഭയപ്പെട്ടു തുടങ്ങിയല്ലേ, ഗെയിം ഓൺ” എന്ന വെല്ലുവിളി നിറഞ്ഞ വാക്കുകളോടെയാണ് അദ്ദേഹം പ്രതിഷേധക്കാർക്ക് പിന്തുണയറിയിച്ചത്. ജനാധിപത്യപരമായ വിയോജിപ്പുകളെയും അവകാശങ്ങളെയും കസ്റ്റഡിയിലെടുത്ത് നിശബ്ദമാക്കാൻ കഴിയില്ലെന്നും ജനങ്ങൾ ഇതിനെതിരെ ഒറ്റക്കെട്ടായി മുന്നോട്ടുവരുമെന്നും അദ്ദേഹം വ്യക്തമാക്കി.
തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് സിജെപിയുടെ നേതൃത്വത്തിൽ ദില്ലിയിൽ നടന്ന മാർച്ചും തുടർന്നുണ്ടായ കൂട്ട അറസ്റ്റുകളും വലിയ രാഷ്ട്രീയ വിവാദങ്ങൾക്ക് വഴിവെച്ചിരിക്കുകയാണ്. ഇതിനിടയിലാണ് പ്രമുഖ സിനിമാതാരവും സാമൂഹിക പ്രവർത്തകനുമായ പ്രകാശ് രാജ് സർക്കാരിന്റെ ഏകാധിപത്യ പ്രവണതകൾക്കെതിരെ പരസ്യമായി രംഗത്തെത്തിയിരിക്കുന്നത്. താരത്തിന്റെ പ്രതികരണം ഇതിനോടകം തന്നെ സമൂഹ മാധ്യമങ്ങളിൽ വലിയ ചർച്ചയായിക്കഴിഞ്ഞു.
