ഇറാനിലെ യുദ്ധസാഹചര്യങ്ങളും സമാധാന ചർച്ചകളും തുടരുന്ന പശ്ചാത്തലത്തിൽ, തന്റെ മൂത്ത മകൻ ഡോണൾഡ് ട്രംപ് ജൂനിയറിന്റെ വിവാഹച്ചടങ്ങിൽ പങ്കെടുക്കാൻ സാധിക്കുമോ എന്ന കാര്യത്തിൽ സംശയമുണ്ടെന്ന് യുഎസ് പ്രസിഡന്റ് ഡോണൾഡ് ട്രംപ്. ബഹാമാസിൽ വച്ച് നടക്കുന്ന ലളിതവും സ്വകാര്യവുമായ ചടങ്ങിൽ പങ്കെടുക്കാൻ താൻ പരമാവധി ശ്രമിക്കുമെന്നും, എന്നാൽ ഇറാൻ വിഷയം ഉൾപ്പെടെയുള്ള അന്താരാഷ്ട്ര പ്രതിസന്ധികൾ നിലനിൽക്കുന്നതിനാൽ ഇത് ഒട്ടും അനുയോജ്യമായ സമയമല്ലെന്നും വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെ അദ്ദേഹം വ്യക്തമാക്കി.
താൻ വിവാഹത്തിൽ പങ്കെടുത്താലും ഇല്ലെങ്കിലും മാധ്യമങ്ങൾ അതിനെ തെറ്റായ രീതിയിൽ മാത്രമേ ചിത്രീകരിക്കൂ എന്ന് ട്രംപ് പരിഹസിച്ചു. ചടങ്ങിന് പോയാലും പോയില്ലെങ്കിലും ‘വ്യാജ വാർത്തകൾ’ നൽകുന്ന മാധ്യമങ്ങൾ തന്നെ ക്രൂശിക്കുമെന്നും, അതിനാൽ ഇതൊരു തോൽക്കാൻ മാത്രം സാധ്യതയുള്ള കളിയാണെന്നും അദ്ദേഹം കൂട്ടിച്ചേർത്തു. ഈ ആഴ്ചാവസാനമാണ് 48 കാരനായ ട്രംപ് ജൂനിയറും പ്രമുഖ റിയൽ എസ്റ്റേറ്റ് ശൃംഖലയായ ‘ദി ട്രംപ് ഓർഗനൈസേഷന്റെ’ എക്സിക്യൂട്ടീവ് വൈസ് പ്രസിഡന്റുമായ ട്രംപ് ജൂനിയറും മോഡലായ ബെറ്റിന ആൻഡേഴ്സനും തമ്മിലുള്ള വിവാഹം നിശ്ചയിച്ചിരിക്കുന്നത്.
