ആരാധകലോകം ഏറെ നാളായി കാത്തിരുന്ന ചിത്രം ആടുജീവിതം തിയ്യേറ്ററിലേക്ക് എത്തുകയാണ്. ചിത്രത്തിന്റെ എല്ലാ അപ്‌ഡേറ്റുകളും ആരാധകര്‍ ഹൃദയത്തിലേറ്റിയിരുന്നു. ആവേശം പകര്‍ന്ന് കഴിഞ്ഞ ദിവസം ചിത്രത്തിന്റെ ട്രെയിലര്‍ എത്തിയിരുന്നു. നജീബായുള്ള പൃഥ്വിയുടെ പകര്‍ന്നാട്ടത്തിന് കൈയ്യടിയ്ക്കുകയാണ് ആരാധകലോകം ഒന്നടങ്കം.
ഇപ്പോഴിതാ പൃഥ്വിരാജിനെ പ്രശംസിച്ചെത്തിയിരിക്കുകയാണ് തെന്നിന്ത്യയുടെ സൂപ്പര്‍സ്റ്റാര്‍ പ്രഭാസ്. ആടുജീവിതത്തിന്റെ ട്രെയിലര്‍ പങ്കുവച്ചാണ് പ്രഭാസിന്റെ കുറിപ്പ്. വരദരാജ മന്നാറായി എത്തിയ അതേ ആളാണ് ഇതെന്ന് വിശ്വസിക്കാനാവുന്നില്ല എന്നാണ് പ്രഭാസ് കുറിച്ചത്.
എന്റെ സഹോദരാ, നിങ്ങള്‍ എന്താണ് ചെയ്തുവച്ചിരിക്കുന്നത്. വരദരാജ മന്നാറായ അതേ ആള് തന്നെയാണ് ഇതെന്ന് എനിക്ക് വിശ്വസിക്കാനാവുന്നില്ല. ആശംസകള്‍ സഹോദരാ. ആടുജീവിതത്തിനായി കാത്തിരിക്കുന്നു. ഒരുപാട് സ്നേഹം. ബ്ലോക്ബസ്റ്റര്‍ ലോഡിങ്.- എന്നാണ് പ്രഭാസ് കുറിച്ചത്.
അതേസമയം പ്രഭാസിന് നന്ദി പറഞ്ഞ് പൃഥ്വിരാജും എത്തി. താങ്ക്യു ദേവ, വൈകാതെ പോര്‍കളത്തില്‍ കാണാം.- എന്നാണ് മറുപടിയായി പൃഥ്വിരാജ് കുറിച്ചു. പ്രശാന്ത് നീല്‍ ഒരുക്കിയ സൂപ്പര്‍ഹിറ്റ് ചിത്രം സലാറില്‍ പ്രഭാസിനൊപ്പം പൃഥ്വിരാജും പ്രധാന വേഷത്തിലെത്തിയിരുന്നു.
മലയാളത്തിലെ ടോപ്പ് സെല്ലറായിരുന്ന ബന്യാമിന്റെ പ്രശസ്തമായ ആടുജീവിതം നോവലാണ് ബ്ലസി സ്‌ക്രീനിലെത്തിക്കുന്നത്. 2024ല്‍ സിനിമാപ്രേമികള്‍ ഏറ്റവും പ്രതീക്ഷയോടെ കാത്തിരിക്കുന്ന ബ്രഹ്‌മാണ്ഡ ചിത്രമാണ് ആടുജീവിതം. മാര്‍ച്ച് 28നാണ് ചിത്രം തിയറ്ററിലേക്ക് എത്തുന്നത്.
