പ്രധാനമന്ത്രി നരേന്ദ്ര മോഡിയെ പുകഴ്ത്തിയ നടി ശോഭനയ്‌ക്കെതിരെ സോഷ്യല്‍മീഡിയയില്‍ വലിയ വിമര്‍ശനമാണ് നിറയുന്നത്. ഫാന്‍ മൊമന്റ് എന്ന് പറഞ്ഞ് ശോഭന മോഡിയ്‌ക്കൊപ്പമുള്ള ചിത്രങ്ങള്‍ പങ്കുവച്ചതും വൈറലായിരുന്നു. ശോഭനയെ പിന്തുണച്ചും വിമര്‍ശിച്ചും രൂക്ഷമായ പ്രതികരണങ്ങളാണ് നിറയുന്നത്. കഴിഞ്ഞ ദിവസം തൃശൂര്‍ തേക്കിന്‍കാട് മൈതാനത്ത് നടന്ന ബിജെപിയുടെ മഹിളാ സമ്മേളനത്തിലായിരുന്നു ശോഭന പങ്കെടുത്തത്.
ഇത്രയധികം സ്ത്രീകള്‍ പങ്കെടുക്കുന്ന പരിപാടി ജീവിതത്തില്‍ ആദ്യമായിട്ടാണ് കാണുന്നത്, പ്രധാനമന്ത്രിക്കൊപ്പം വേദി പങ്കിടാന്‍ കഴിഞ്ഞതിന് താരം സംഘാടകര്‍ക്ക് നന്ദിയും പറഞ്ഞിരുന്നു. പിന്നാലെയാണ് താരത്തിനെതിരേ സോഷ്യല്‍ മീഡിയയില്‍ വ്യാപക പ്രതിഷേധം ഉയര്‍ന്നത്. അതേസമയം ശോഭന പിണറായി സര്‍ക്കാരിന്റെ കേരളീയം പരിപാടിയില്‍ മമ്മൂട്ടി, മോഹന്‍ലാല്‍, കമല്‍ഹാസന്‍ എന്നിവര്‍ക്കൊപ്പം പങ്കെടുത്തിരുന്നു.
ഇപ്പോഴിതാ ട്രാന്‍സ്‌ജെന്‍ഡര്‍ ആക്ടിവിസ്റ്റും നടിയുമായ ശീതള്‍ ശ്യാമിന്റെ പോസ്റ്റ് ശ്രദ്ധേയമാകുകയാണ്. ഫേസ്ബുക്കില്‍ പങ്കുവച്ച പോസ്റ്റാണ് വൈറലാകുന്നത്. ”ഒരാളും ഇനി എന്നെ കാണുമ്പോള്‍ ശോഭനയെ പോലുണ്ടെന്ന് പറയരുത്’ എന്നാണ് ശീതള്‍ ശ്യാം പോസ്റ്റ് ചെയ്തത്. നിരവധി പേരാണ് പോസ്റ്റില്‍ കമന്റ് ചെയ്യുന്നത്. ട്രോളന്മാരും ശീതളിന്റെ പോസ്റ്റ് ഏറ്റെടുത്തിരിക്കുകയാണ്.
