ന്യൂഡല്ഹി: ശബരിമലയില് യുവതീപ്രവേശനം അനുവദിച്ച ഉത്തരവിനെതിരേ സമര്പ്പിച്ച പുനഃപരിശോധനാ ഹര്ജികള് സുപ്രീംകോടതി പരിഗണിച്ചു. ചൊവ്വാഴ്ച ഉച്ചകഴിഞ്ഞ് മൂന്നിനു ചീഫ് ജസ്റ്റീസ് രഞ്ജന് ഗൊഗോയിയുടെ ചേംബറിലാണ് റിവ്യു ഹര്ജികള് പരിഗണിച്ചത്. തീരുമാനം അല്പസമയത്തിനകം സുപ്രീംകോടതിയുടെ വെബ്സൈറ്റില് പ്രസിദ്ധീകരിക്കുമെന്നാണ് വിവരം.
ഭരണഘടനാ ബെഞ്ചിന്റെ വിധിക്കെതിരേ 49 റിവ്യൂ ഹര്ജികളാണ് സുപ്രീംകോടതിക്ക് മുന്പാകെ എത്തിയത്. കോടതി നടപടികള് 20 മിനിറ്റിനുള്ളില് പൂര്ത്തിയാക്കിയ ശേഷം ചീഫ് ജസ്റ്റീസ് ചേംബറിന് പുറത്തേക്ക് പോയി. റിവ്യൂ ഹര്ജികള് പരിഗണിച്ച ചേംബറില് അഭിഭാഷകരടക്കം ആര്ക്കും പ്രവേശനം അനുവദിച്ചിരുന്നില്ല.
പുനഃപരിശോധനാ ഹര്ജികള് പരിഗണിച്ച ശേഷം നാല് റിട്ട് ഹര്ജികള് പരിഗണിക്കുമെന്നാണ് ചീഫ് ജസ്റ്റീസ് അധ്യക്ഷനായ മൂന്നംഗ ബെഞ്ച് അറിയിച്ചിരിക്കുന്നത്. റിട്ട് ഹര്ജികള് ചീഫ് ജസ്റ്റീസിന്റെ കോടതിയിലാണ് പരിഗണിക്കുന്നത്. റിവ്യൂ ഹര്ജികള് തുറന്ന കോടതിയില് കേള്ക്കണമെന്ന ആവശ്യം സുപ്രീംകോടതി തള്ളിയിരുന്നു. ന്യായമില്ലാത്തതാണെന്ന് ചീഫ് ജസ്റ്റിസ് വിമര്ശിച്ചിരുന്നു.