കഴിഞ്ഞ കുറച്ച് നാളുകളായി നടി താര കല്യാണിന് ശബ്ദമുണ്ടായിരുന്നില്ല. മുറിഞ്ഞും ഇടറിയുമൊക്കെ ഉണ്ടാകുന്ന ശബ്ദത്തിന്റെ പ്രശ്നങ്ങൾ നേരത്തേ തന്നെ താര കല്യാൺ നേരിട്ടിരുന്നു. ചെറുപ്പം മുതൽ പാടുന്നതിന്റെയോ ഗോയിറ്ററിന്റെ പ്രശ്നമോ ആയിരിക്കാമെന്നാണ് താരകളെയാണ് കരുതിയത്. താര കല്യാണിന്റെ ശബ്ദം പൂർണമായും നഷ്ടപ്പെട്ടതായി മകൾ സൗഭാഗ്യ വെങ്കിടേഷും വെളിപ്പെടുത്തിയിരുന്നു. അമ്മയ്ക്ക് സർജറി ചെയ്തതായും വിശ്രമത്തിലാണെന്നും സൗഭാഗ്യ അറിയിച്ചിരുന്നു. മാനസിക സമ്മർദം ഉണ്ടാകുമ്പോഴും ഉറക്കെ ശബ്ദിക്കുമ്പോഴുമൊക്കെ ശബ്ദം പൂർണമായും അടയുമായിരുന്നു. കഴിഞ്ഞ വർഷം താരകല്യാണിനു തൈറോയ്ഡിന്റെ ശസ്ത്രക്രിയ നടത്തി. എന്നിട്ടും ശബ്ദത്തിന് മാറ്റമുണ്ടായില്ല. തുടർന്ന് നടത്തിയ പരിശോധനയിലാണ് സ്പാസ്മോഡിക് ഡിസ്ഫോണിയ എന്ന രോഗം താരകല്യാണിനു സ്ഥിരീകരിച്ചത്. തലച്ചോറിൽ നിന്ന് ശബ്ദപേടകത്തിലേക്ക് നൽകുന്ന നിർദേശങ്ങൾക്ക് ഏറ്റക്കുറച്ചിൽ ഉണ്ടാകുമ്പോൾ സംഭവിക്കുന്ന രോഗാവസ്ഥയെണിത്. ഇതിന് മൂന്ന് അവസ്ഥകളുണ്ട്. അഡക്ടറാണ് താരയെ ബാധിച്ചത്. തൊണ്ടയിൽ ആരോ മുറുകെ പിടിച്ചിരിക്കുന്നതുപോലെ അനുഭവപ്പെടും. ശബ്ദിക്കാൻ ബദ്ധപ്പെടുന്തോറും അത് കൂടി വരും.
ഡോക്ടറുടെ നിർദേശപ്രകാരം കുറച്ച് നാൾ മുമ്പ് ഒരു മണിക്കൂർ നീണ്ട ശസ്ത്രക്രിയ നടത്തി. മൂന്നാഴ്ച കഴിഞ്ഞാൽ താരയ്ക്ക് ശബ്ദം തിരിച്ച് കിട്ടുമെന്നാണ് അന്ന് ഡോക്ടർ പറഞ്ഞത്. നിലച്ചുപോയ ശബ്ദത്തിന്റെ തിരിച്ചുവരവിനായി നിശ്ശബ്ദമായി കാത്തിരിക്കുകയായിരുന്നു നടി താര കല്യാൺ. ഇപ്പോഴിതാ പഴയ പ്രശ്നങ്ങളെല്ലാം മാറി മനോഹരമായ ശബ്ദം താരയ്ക്ക് തിരിച്ച് കിട്ടിയിരിക്കുകയാണ്. പുതിയ വ്ലോഗിന് സ്വന്തം ശബ്ദത്തിൽ മനോഹരമായാണ് താര കല്യാൺ വോയ്സ് ഓവർ നൽകിയിരിക്കുന്നത്. പുതിയ വീഡിയോയിൽ താര അഭിനയിച്ച കാതോട് കാതോരം സീരിയലിലെ പ്രകടനത്തിന് ലഭിച്ച പുരസ്കാരം ഏറ്റുവാങ്ങാൻ പോയ വിശേഷങ്ങളാണ് ഉൾപ്പെടുത്തിയിരിക്കുന്നത്. പൂവച്ചാൽ ഖാദർ ഫിലിം, ടെലിവിഷൻ, മീഡിയ അവാർഡ് 2024ൽ മികച്ച സീരിയൽ സ്വഭാവ നടിക്കുള്ള പുരസ്കാരമാണ് താരയ്ക്ക് ലഭിച്ചത്. അമ്മയുടെ നേട്ടം കാണാൻ മകൾ സൗഭാഗ്യയും മരുമകൻ അർജുനും കൊച്ചുമകൾ സുദർശനയും എല്ലാം വന്നിരുന്നു. കൊച്ചുമകളേയും ഒക്കത്തെടുത്താണ് പുരസ്കാരം ഏറ്റുവാങ്ങാൻ താര കല്യാൺ പോയത്. താരയ്ക്കൊപ്പം സെൽഫി എടുക്കുന്നതിനേക്കാൾ ആളുകൾ തിരിക്ക് കൂട്ടിയത് സുദർശനയെ ഓമനിക്കാനും ഒപ്പം നിന്ന് ഫോട്ടോ പകർത്താനുമാണ്.
വൈലോപ്പിള്ളി സംസ്കൃത ഭവനിലായിരുന്നു ചടങ്ങ് നടന്നത്. വീഡിയോ വൈറലായതോടെ ആരാധകർ എല്ലാം സന്തോഷം അറിയിച്ചത് ശബ്ദം തിരിച്ച് കിട്ടി എന്നറിഞ്ഞതിലാണ്. നിരവധി പേരാണ് താരയുടെ ശബ്ദം തിരിച്ച് കിട്ടിയതിലെ സന്തോഷം കമന്റിലൂടെ അറിയിച്ചത്. ഒരുപാട് സന്തോഷം തോന്നി കണ്ടപ്പോൾ… ശബ്ദം തിരിച്ച് കിട്ടിയല്ലോ.., ഇന്നത്തെ താരാ കല്യാണിന്റെ സംസാരം വളരെ ഇഷ്ടപ്പെട്ടു. അവാർഡ് കിട്ടിയത് കണ്ടപ്പോഴും സന്തോഷം തോന്നി എന്നുമെല്ലാം കമന്റുകളുണ്ട്. ശബ്ദം തിരിച്ച് കിട്ടുന്നതിന് മുമ്പ് വരെ എഐ സംവിധാനം ഉപയോഗിച്ചും മകളുടെ സഹായത്തോടെയുമായിരുന്നു യുട്യൂബ് വീഡിയോകൾക്ക് താര ശബ്ദം നൽകിയിരുന്നത്. ഒരു കാലത്ത് സിനിമാ, സീരിയൽ, നൃത്ത, സംഗീത മേഖലകളിൽ അറിയപ്പെട്ട താരാ കല്യാണിന്റെ കുടുംബം ഇന്ന് സോഷ്യൽ മീഡിയാ യുഗത്തിലും നിറസാന്നിധ്യമാണ്. മരണം വരെയും അമ്മ സുബ്ബലക്ഷ്മി താരയുടെയും മകൾ സൗഭാഗ്യ വെങ്കിടേഷിന്റെയും ഒപ്പം അവരുടെ സോഷ്യൽ മീഡിയ പേജുകളിൽ നിറഞ്ഞ് നിന്നിരുന്നു. സൗഭാഗ്യയുടെ ഭർത്താവ് അർജുൻ സോമശേഖരനും അവരുടെ മകൾ സുദർശനയും വരെ ഏവർക്കും സോഷ്യൽമീഡിയ വഴി സുപരിചിതരാണ്. താരകുടുംബത്തെ കുറിച്ചുള്ള വിശേഷങ്ങളൊക്കെ അറിയാന് ആളുകള്ക്ക് ഇഷ്ടവുമാണ്. പലപ്പോഴും യൂട്യൂബ് ചാനലിലൂടെ കുടുംബം തങ്ങളുടെ വിശേഷങ്ങള് പങ്കുവയ്ക്കാറുണ്ട്.
