കേരളത്തെ ഞെട്ടിച്ച ഇലന്തൂർ ഇരട്ട നരബലി കേസ് നടന്ന് മൂന്ന് വർഷം പിന്നിടുമ്പോഴും വിചാരണ നടപടികൾ തുടങ്ങിയിട്ടില്ല. കേസിൽ പബ്ലിക് പ്രോസിക്യൂട്ടറെ നിയമിക്കുന്നതിൽ സർക്കാരിന്റെ ഭാഗത്തുനിന്നുണ്ടായ അനിശ്ചിതത്വമാണ് വിചാരണയുടെ നീണ്ടുപോകലിന് പ്രധാന കാരണം. നിലവിൽ കേസിൽ പ്രോസിക്യൂട്ടർ ഇല്ലാത്ത അവസ്ഥ തുടരുകയാണ്.
2022 ഒക്ടോബറിലാണ് അന്ധവിശ്വാസത്തിന്റെ മറവിൽ രണ്ട് സ്ത്രീകളെ കൊലപ്പെടുത്തി ബലി നൽകിയെന്ന ക്രൂരമായ സംഭവം കേരള പോലീസ് കണ്ടെത്തിയത്. കേസിലെ മുഖ്യപ്രതികളായ മുഹമ്മദ് ഷാഫി, ഭഗവൽ സിംഗ്, ഭാര്യ ലൈല എന്നിവർ ജയിലിലായിട്ട് മൂന്ന് വർഷവും ഒരു മാസവും പിന്നിട്ടു. അന്വേഷണ ഉദ്യോഗസ്ഥർ പെട്ടെന്ന് തന്നെ കുറ്റപത്രം സമർപ്പിച്ചെങ്കിലും, ഒരു വർഷത്തിലധികം നീണ്ട പ്രോസിക്യൂട്ടർ നിയമനത്തിലെ കാലതാമസം വിചാരണയ്ക്ക് തടസ്സമുണ്ടാക്കി.
കേസിൽ പ്രോസിക്യൂട്ടർമാരായി നിയമിക്കപ്പെട്ടവർ പലരും പിന്നീട് പിൻമാറിയ ചരിത്രമുണ്ട്. ആദ്യം നിയമിച്ച അഡ്വ. ഉണ്ണികൃഷ്ണൻ കൂടത്തായി കേസിന്റെ തിരക്ക് കണക്കിലെടുത്ത് ഒഴിവായി. പിന്നീട് വന്ന അഡ്വ. അനിൽകുമാറും കഴിഞ്ഞ ഓഗസ്റ്റിൽ പിൻമാറിയതോടെ കേസ് പ്രോസിക്യൂട്ടറില്ലാത്ത അവസ്ഥയിലായി. അഡ്വ. അജകുമാറിനെ നിയമിക്കാൻ സൂചനകളുണ്ടായിരുന്നെങ്കിലും ഔദ്യോഗിക ഉത്തരവ് ഇതുവരെ പുറത്തിറങ്ങിയിട്ടില്ല.
ഈ പശ്ചാത്തലത്തിൽ, കേസിൽ വിചാരണ തുടങ്ങാത്തതിനെ ചോദ്യം ചെയ്ത് പ്രതികൾ ജാമ്യാപേക്ഷയുമായി വിചാരണക്കോടതിയെ സമീപിച്ചിരിക്കുകയാണ്. അടുത്ത മാസം (ഡിസംബർ) ആറിന് കോടതി ഈ അപേക്ഷ പരിഗണിക്കും. വിചാരണ അനന്തമായി നീട്ടിക്കൊണ്ടുപോകാൻ കഴിയില്ലെന്നും, പ്രോസിക്യൂട്ടറെ നിയമിച്ചില്ലെങ്കിൽ മറ്റ് നടപടികളിലേക്ക് കടക്കേണ്ടി വരുമെന്നും കേസ് പരിഗണിച്ചപ്പോൾ കോടതി സർക്കാരിന് കഴിഞ്ഞ ദിവസം മുന്നറിയിപ്പ് നൽകിയിരുന്നു.
