പ്രമുഖ എഡ്ടെക് സ്ഥാപനമായ ബൈജൂസിന്റെ സ്ഥാപകൻ ബൈജു രവീന്ദ്രന് യുഎസ് കോടതിയിൽ നിന്ന് വൻ തിരിച്ചടി. കമ്പനിയുടെ യുഎസ് യൂണിറ്റായ ബൈജൂസ് ആൽഫ-യുടെ വായ്പയുമായി ബന്ധപ്പെട്ട കേസിൽ, 100 കോടി ഡോളറിലധികം (ഏകദേശം 8,900 കോടി രൂപ) വ്യക്തിപരമായി തിരിച്ചടയ്ക്കാൻ യുഎസ് കോടതി ഉത്തരവിട്ടു.
ഡെലവെയർ ബാങ്കറപ്സി കോടതിയാണ് ഈ സുപ്രധാന വിധി പുറപ്പെടുവിച്ചത്. കേസുമായി ബന്ധപ്പെട്ട രേഖകൾ ഹാജരാക്കാൻ കോടതി ആവർത്തിച്ച് ആവശ്യപ്പെട്ടിട്ടും ബിജു രവീന്ദ്രൻ സഹകരിക്കാതിരിക്കുകയും കോടതി ഉത്തരവുകൾ പാലിക്കാതെ ഒഴിഞ്ഞുമാറുകയും ചെയ്തതിനെ തുടർന്നാണ് ‘ഡിഫോൾട്ട് വിധി’ (Default Judgment) പുറപ്പെടുവിച്ചത്.
വിധിയിലെ പ്രധാന കണ്ടെത്തലുകൾ:
107 കോടി ഡോളർ തിരിച്ചടയ്ക്കാൻ ബാധ്യത: വായ്പയുമായി ബന്ധപ്പെട്ട് നീക്കം ചെയ്ത 533 ദശലക്ഷം ഡോളറും മറ്റ് കൗണ്ടുകളിലായി 540 ദശലക്ഷം ഡോളറുമാണ് (മൊത്തം 1.07 ബില്യൺ ഡോളർ) ബിജു രവീന്ദ്രൻ വ്യക്തിപരമായി തിരിച്ചടയ്ക്കേണ്ടി വരിക.
കോടതിയുടെ കണ്ടെത്തൽ: വിവരങ്ങൾ നൽകാൻ വിസമ്മതിച്ചതും ഒഴിഞ്ഞുമാറിയതും ബിജു രവീന്ദ്രന്റെ വ്യക്തിപരമായ തീരുമാനമാണ് എന്ന് കോടതി വിധിയിൽ നിരീക്ഷിച്ചു. നേരത്തെ, രേഖകൾ ഹാജരാക്കാത്തതിന് പ്രതിദിനം 10,000 ഡോളർ പിഴ ചുമത്തിയിട്ടും അദ്ദേഹം അത് അടയ്ക്കാൻ തയ്യാറായിരുന്നില്ല.
ഫണ്ടിന്റെ വിശദാംശങ്ങൾ നൽകണം: ആൽഫ ഫണ്ടുകളുടെ പൂർണ്ണവും കൃത്യവുമായ കണക്കുകൾ കോടതിയിൽ സമർപ്പിക്കണമെന്നും വിധിയിൽ നിർദ്ദേശമുണ്ട്.
പശ്ചാത്തലം:
യുഎസ് ആസ്ഥാനമായുള്ള ലെൻഡർമാരിൽ നിന്ന് ബൈജൂസിന്റെ യുഎസ് യൂണിറ്റായ ബൈജൂസ് ആൽഫ ഏകദേശം 120 കോടി ഡോളർ വായ്പ എടുത്തിരുന്നു. ഇതിൽ 533 ദശലക്ഷം ഡോളർ വായ്പാദാതാക്കളുടെ അനുമതിയില്ലാതെ രാജ്യത്തിന് പുറത്തേക്ക് മാറ്റിയെന്ന് ആരോപിച്ച് ലെൻഡർമാരുടെ ഏജന്റായ ജിഎൽഎഎസ് ട്രസ്റ്റ് കമ്പനി കോടതിയെ സമീപിക്കുകയായിരുന്നു.
അപ്പീൽ നൽകുമെന്ന് ബിജു രവീന്ദ്രൻ:
അതേസമയം, യുഎസ് കോടതിയുടെ ഈ വിധിക്കെതിരെ അപ്പീൽ നൽകുമെന്ന് ബിജു രവീന്ദ്രൻ അറിയിച്ചു. തന്റെ ഭാഗം അവതരിപ്പിക്കാൻ കോടതി മതിയായ അവസരം നൽകിയില്ലെന്നും, വായ്പ തുക വ്യക്തിപരമായ ആവശ്യങ്ങൾക്കായി ഉപയോഗിച്ചിട്ടില്ലെന്നും ഇത് കമ്പനിയുടെ (തിങ്ക് ആൻഡ് ലേൺ പ്രൈവറ്റ് ലിമിറ്റഡ്) ആവശ്യങ്ങൾക്കാണ് ഉപയോഗിച്ചതെന്നും അദ്ദേഹം വ്യക്തമാക്കി. ജിഎൽഎഎസ് ട്രസ്റ്റ് കമ്പനി കോടതിയെ തെറ്റിദ്ധരിപ്പിക്കാൻ ശ്രമിക്കുകയാണ് എന്നും ബിജു രവീന്ദ്രൻ ആരോപിച്ചു.
