സൂക്ഷ്മമായ കഥകൾ ലളിതമായി അവതരിപ്പിക്കുന്നതിലൂടെ ശ്രദ്ധേയനായ സംവിധായകൻ എബ്രിഡ് ഷൈൻ്റെ പുതിയ ചിത്രമായ **’സ്പാ’**യുടെ ടൈറ്റിൽ പോസ്റ്റർ പുറത്തിറങ്ങി. ആകാംഷയുണർത്തുന്ന ഈ ടൈറ്റിൽ പോസ്റ്റർ സോഷ്യൽ മീഡിയയിൽ ഇതിനോടകം ചർച്ചയായിക്കഴിഞ്ഞു.
നിവിൻ പോളി നായകനായ ‘മഹാവീര്യർ’ എന്ന ചിത്രത്തിന് ശേഷം എബ്രിഡ് ഷൈൻ സംവിധാനം ചെയ്യുന്ന പുതിയ സിനിമയാണ് ‘സ്പാ’. ‘രഹസ്യങ്ങൾ രഹസ്യങ്ങളാണ് ചില കാരണങ്ങളാൽ’ എന്ന ആകർഷകമായ ടാഗ് ലൈനാണ് പോസ്റ്ററിലുള്ളത്. നിശബ്ദത ആവശ്യപ്പെടുന്ന ഒരു സ്ത്രീയുടെ മുഖമാണ് പോസ്റ്ററിൻ്റെ പ്രധാന ആകർഷണം.
സിദ്ധാർഥ് ഭരതൻ, വിനീത് തട്ടിൽ, പ്രശാന്ത് അലക്സാണ്ടർ, മേജർ രവി, ദിനേശ് പ്രഭാകർ, ശ്രുതി മേനോൻ, രാധിക രാധാകൃഷ്ണൻ, പൂജിത മേനോൻ തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്.
സ്പാറയിൽ ക്രിയേഷൻസ്, സഞ്ജു ജെ ഫിലിംസ് എന്നീ ബാനറുകളിലായി സ്പാറയിലും സഞ്ജു ജെ.യും ചേർന്നാണ് ‘സ്പാ’ നിർമ്മിക്കുന്നത്. ചിത്രീകരണം, പോസ്റ്റ് പ്രൊഡക്ഷൻ ജോലികൾ എന്നിവ പൂർത്തിയാക്കിയ ചിത്രം ഉടൻ തന്നെ തിയറ്ററുകളിൽ എത്തുമെന്നാണ് റിപ്പോർട്ട്. സ്വരൂപ് ഫിലിപ്പാണ് ഛായാഗ്രഹണം. ഇഷാൻ ഛബ്ര സംഗീതവും മനോജ് എഡിറ്റിംഗും നിർവ്വഹിക്കുന്നു.
