മലയാള സിനിമയിലെ എക്കാലത്തെയും മികച്ച തിരക്കഥാകൃത്തുക്കളിൽ ഒരാളും നടനുമായ ശ്രീനിവാസന്റെ വിയോഗത്തിൽ അനുശോചനവുമായി പ്രശസ്ത സംവിധായകൻ ഭദ്രൻ. തന്റെ സോഷ്യൽ മീഡിയ പേജിലൂടെയാണ് അദ്ദേഹം പ്രിയ സഹപ്രവർത്തകന് ആദരാഞ്ജലികൾ അർപ്പിച്ചത്.
ശ്രീനിവാസന്റെ അതുല്യമായ എഴുത്തുശൈലിയെയും നർമ്മബോധത്തെയും ഭദ്രൻ കുറിപ്പിൽ അനുസ്മരിച്ചു. സാധാരണക്കാരന്റെ ജീവിതത്തിലെ കയ്പും മധുരവും ഒരുപോലെ പകർത്തിയെഴുതാൻ ശ്രീനിവാസനോളം കഴിവുള്ള മറ്റൊരാൾ മലയാള സിനിമയിൽ ഇല്ലെന്ന് അദ്ദേഹം അഭിപ്രായപ്പെട്ടു. മലയാളിയുടെ ചിന്താഗതികളെയും സാമൂഹിക വ്യവസ്ഥിതിയെയും ഇത്രത്തോളം പരിഹസിക്കുകയും അതേസമയം തന്നെ ചിന്തിപ്പിക്കുകയും ചെയ്ത മറ്റൊരു പ്രതിഭയില്ലെന്നും ഭദ്രൻ ഓർമ്മിപ്പിച്ചു.
Sreenivasan The Legend
തങ്ങൾ ഒന്നിച്ചു പ്രവർത്തിച്ച നിമിഷങ്ങളെയും ശ്രീനിവാസൻ എന്ന മനുഷ്യന്റെ ലാളിത്യത്തെയും കുറിച്ചും ഭദ്രൻ വികാരാധീനനായി. മലയാള സിനിമയ്ക്ക് വലിയൊരു ശൂന്യതയാണ് ഈ വിയോഗം സൃഷ്ടിച്ചിരിക്കുന്നത്. തിരക്കഥയിലെ ‘ചാണക്യൻ’ എന്ന് വിശേഷിപ്പിക്കാവുന്ന വ്യക്തിയായിരുന്നു ശ്രീനിവാസനെന്നും ഭദ്രൻ തന്റെ അനുസ്മരണ കുറിപ്പിൽ കുറിച്ചു.
ശ്രീനിവാസന്റെ വേർപാടിൽ കുടുംബാംഗങ്ങളുടെയും സിനിമാ പ്രേമികളുടെയും ദുഃഖത്തിൽ പങ്കുചേരുന്നതായും അദ്ദേഹം അറിയിച്ചു.
