പ്രഭാസ് നായകനായി എത്തിയ ഏറ്റവും പുതിയ ചിത്രം ‘രാജാസാബ്’ ബോക്സ് ഓഫീസിൽ തകർപ്പൻ മുന്നേറ്റം നടത്തുന്നു. വിവിധ കോണുകളിൽ നിന്ന് വിമർശനങ്ങൾ ഉയരുന്നുണ്ടെങ്കിലും റിലീസ് ചെയ്ത ആദ്യ ദിനം തന്നെ ചിത്രം 100 കോടി ക്ലബ്ബിൽ ഇടംപിടിച്ചു. ബാഹുബലിക്ക് ശേഷം ആദ്യദിനം 100 കോടിയിലധികം രൂപ കലക്ഷൻ നേടുന്ന പ്രഭാസിന്റെ ആറാമത്തെ ചിത്രമാണിതെന്ന പ്രത്യേകതയും ഇതിനുണ്ട്. ലോകമെമ്പാടുമുള്ള തിയറ്ററുകളിൽ നിന്ന് 112 കോടിയിലധികം രൂപയാണ് ചിത്രം ആദ്യ ദിനം മാത്രം വാരിക്കൂട്ടിയത്.
അതേസമയം, ചിത്രത്തിലെ പ്രഭാസിന്റെ ചില ഗെറ്റപ്പുകളെയും വിഎഫ്എക്സിനെയും (VFX) സംബന്ധിച്ച് ആരാധകർക്കിടയിൽ സമ്മിശ്ര പ്രതികരണമാണ് ലഭിക്കുന്നത്. ആരാധകർ ഏറെ പ്രതീക്ഷിച്ചിരുന്ന പ്രഭാസിന്റെ ‘വയസ്സൻ’ ഗെറ്റപ്പ് സിനിമയിൽ നിന്ന് ഒഴിവാക്കിയത് വലിയ നിരാശയ്ക്ക് കാരണമായിരുന്നു. എന്നാൽ ഈ രംഗം തിരികെ ഉൾപ്പെടുത്തി സിനിമയുടെ പുതിയ പതിപ്പ് പുറത്തിറക്കുമെന്ന് സംവിധായകൻ മാരുതി പ്രഖ്യാപിച്ചു കഴിഞ്ഞു. സമയദൈർഘ്യം മൂലമാണ് നേരത്തെ ഈ രംഗങ്ങൾ വെട്ടിമാറ്റിയത് എന്നും ആരാധകരുടെ ആഗ്രഹം പരിഗണിച്ച് പുതിയ പതിപ്പ് ഉടൻ പ്രദർശനത്തിനെത്തുമെന്നും അദ്ദേഹം വ്യക്തമാക്കി.
ഏകദേശം 450 കോടി രൂപ ചെലവിൽ നിർമ്മിച്ച ഒരു ഹൊറർ ഫാന്റസി ചിത്രമാണ് രാജാസാബ്. മാളവിക മോഹനൻ, നിധി അഗർവാൾ, റിദ്ധി കുമാർ എന്നിവരാണ് ചിത്രത്തിലെ നായികമാർ. പ്രഭാസിനൊപ്പം സഞ്ജയ് ദത്ത്, സമുദ്രക്കനി, ബൊമ്മൻ ഇറാനി തുടങ്ങിയ വൻ താരനിരയും ചിത്രത്തിലുണ്ട്. കഥയുടെയും സാങ്കേതിക നിലവാരത്തിന്റെയും കാര്യത്തിൽ ചില വിമർശനങ്ങൾ ഉയരുന്നുണ്ടെങ്കിലും പ്രഭാസ് എന്ന താരത്തിന്റെ ജനപ്രീതി ചിത്രം ബോക്സ് ഓഫീസിൽ വലിയ വിജയമാക്കുമെന്നാണ് പ്രതീക്ഷിക്കപ്പെടുന്നത്.
