തമിഴ് സിനിമാ ലോകത്ത് നടനായും ഗായകനായും ശ്രദ്ധേയനായ കെൻ കരുണാസ് ആദ്യമായി സംവിധാന കുപ്പായമണിയുന്ന ‘യൂത്ത്’ എന്ന ചിത്രത്തിന്റെ ട്രെയ്ലർ പുറത്തിറങ്ങി. നടൻ കരുണാസിന്റെ മകനായ കെൻ തന്നെയാണ് ചിത്രത്തിൽ നായകനായി വേഷമിടുന്നത്. ഒരു സ്കൂൾ പശ്ചാത്തലത്തിൽ ഒരുക്കിയിരിക്കുന്ന ഈ ടീനേജ് റൊമാന്റിക് കോമഡി ചിത്രം, 15 വയസ്സുകാരനായ പ്രവീൺ എന്ന നായകൻ തന്റെ സ്കൂൾ ജീവിതം അവസാനിക്കുന്നതിന് മുൻപ് യഥാർത്ഥ പ്രണയം കണ്ടെത്താൻ നടത്തുന്ന രസകരമായ ശ്രമങ്ങളാണ് പ്രമേയമാക്കിയിരിക്കുന്നത്.
ചിത്രത്തിൽ ശ്രദ്ധേയമായ ഒരു വേഷത്തിൽ മലയാളത്തിന്റെ പ്രിയ താരം സുരാജ് വെഞ്ഞാറമൂടും എത്തുന്നുണ്ട്. കെൻ അവതരിപ്പിക്കുന്ന കഥാപാത്രത്തിന്റെ പിതാവിന്റെ വേഷത്തിലാണ് സുരാജ് അഭിനയിക്കുന്നത്. കൂടാതെ മലയാള നടിമാരായ അനിഷ്മ അനിൽകുമാർ, മീനാക്ഷി ദിനേശ് എന്നിവരും ചിത്രത്തിൽ പ്രധാന വേഷങ്ങളിൽ അണിനിരക്കുന്നു. തമിഴ് സിനിമയിലെ നടിമാരാരും തന്റെ നായികയാകാൻ തയ്യാറാകാത്ത സമയത്ത് മലയാളി താരങ്ങളാണ് തനിക്ക് പിന്തുണ നൽകിയതെന്ന് കെൻ കരുണാസ് ഒരു അഭിമുഖത്തിൽ വെളിപ്പെടുത്തിയത് സോഷ്യൽ മീഡിയയിൽ വലിയ ചർച്ചയായിരുന്നു.
ദുൽഖർ സൽമാന്റെ ഉടമസ്ഥതയിലുള്ള വേഫറെർ ഫിലിംസ് ആണ് ചിത്രം കേരളത്തിൽ വിതരണത്തിനെത്തിക്കുന്നത്. ദേശീയ പുരസ്കാര ജേതാവ് ജി.വി. പ്രകാശ് കുമാറാണ് ചിത്രത്തിന് സംഗീതം നൽകിയിരിക്കുന്നത്. കൗമാരപ്രായത്തിലെ പ്രണയവും സൗഹൃദവും വൈകാരിക നിമിഷങ്ങളും കോർത്തിണക്കിയ ചിത്രം മാർച്ച് 19-ന് തിയേറ്ററുകളിൽ പ്രദർശനത്തിനെത്തും.
