തമിഴ് സൂപ്പർ താരം സൂര്യയുടെ കരിയറിലെ 46-ാം ചിത്രമായ ‘വിശ്വനാഥ് ആൻഡ് സൺസ്’ സോഷ്യൽ മീഡിയയിൽ വലിയ ചർച്ചകൾക്കാണ് വഴിതുറന്നിരിക്കുന്നത്. ‘ലക്കി ഭാസ്കർ’ എന്ന ഹിറ്റ് ചിത്രത്തിന് ശേഷം വെങ്കി അറ്റ്ലൂരി സംവിധാനം ചെയ്യുന്ന ഈ സിനിമയുടെ ഫസ്റ്റ് ലുക്ക് പോസ്റ്റർ പുറത്തുവന്നതിന് പിന്നാലെയാണ് ചിത്രം ഒരു മലയാള സിനിമയുടെ റീമേക്കാണെന്ന അഭ്യൂഹങ്ങൾ പടർന്നത്. സൂര്യ ഒരു കുഞ്ഞിനെ കയ്യിലേന്തി നിൽക്കുന്ന പോസ്റ്റർ കണ്ടതോടെ, 2007-ൽ പുറത്തിറങ്ങിയ പൃഥ്വിരാജ് ചിത്രം ‘കങ്കാരു’വുമായി ഇതിന് സാമ്യമുണ്ടെന്നായിരുന്നു ആരാധകരുടെ കണ്ടെത്തൽ.
എന്നാൽ ഈ പ്രചരണങ്ങൾക്കൊന്നും അടിസ്ഥാനമില്ലെന്നും ചിത്രം റീമേക്കല്ലെന്നുമാണ് ഏറ്റവും പുതിയ റിപ്പോർട്ടുകൾ വ്യക്തമാക്കുന്നത്. സിനിമയുടെ പോസ്റ്ററിൽ മാത്രമാണ് ആ സാമ്യമുള്ളതെന്നും വെങ്കി അറ്റ്ലൂരി തന്നെ രചിച്ച തികച്ചും മൗലികമായ ഒരു തിരക്കഥയാണ് ചിത്രത്തിന്റേതെന്നും അണിയറ പ്രവർത്തകർ അറിയിച്ചു. കുടുംബ പശ്ചാത്തലത്തിലുള്ള ഒരു ഇമോഷണൽ ഡ്രാമയായാണ് സൂര്യയുടെ ഈ പുതിയ ചിത്രം ഒരുങ്ങുന്നത്.
മമിത ബൈജു നായികയാകുന്ന ഈ ബിഗ് ബജറ്റ് ചിത്രത്തിൽ രവീണ ടണ്ടൻ, രാധിക ശരത്കുമാർ എന്നിവരും പ്രധാന വേഷങ്ങളിൽ എത്തുന്നുണ്ട്. സൂര്യയ്ക്ക് വലിയൊരു തിരിച്ചുവരവ് നൽകുമെന്ന് പ്രതീക്ഷിക്കപ്പെടുന്ന ചിത്രം സിതാര എന്റർടൈൻമെന്റ്സിന്റെ ബാനറിലാണ് നിർമ്മിക്കുന്നത്. 2026 ജൂലൈ മാസത്തോടെ സിനിമ തിയേറ്ററുകളിൽ എത്തുമെന്നാണ് സൂചന.
