മലയാളത്തിന്റെ പ്രിയ സംവിധായകൻ ലിജോ ജോസ് പെല്ലിശ്ശേരി ബോളിവുഡിൽ അരങ്ങേറ്റം കുറിക്കുന്നു. ‘ദിൽകാഷി’ (Dilkashi) എന്ന് പേരിട്ടിരിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. പ്രശസ്ത ബോളിവുഡ് സംവിധായകൻ ഹൻസൽ മെഹ്തയാണ് ചിത്രം നിർമ്മിക്കുന്നത് എന്ന പ്രത്യേകതയുമുണ്ട്. ഓസ്കാർ ജേതാവ് എ.ആർ. റഹ്മാൻ സംഗീതം നിർവ്വഹിക്കുന്ന ഈ ചിത്രം ഒരു പാൻ ഇന്ത്യൻ തലത്തിൽ വലിയ പ്രതീക്ഷകളാണ് സിനിമാ പ്രേമികൾക്ക് നൽകുന്നത്.
പ്രണയവും കാത്തിരിപ്പും മാനുഷിക ബന്ധങ്ങളുടെ സങ്കീർണ്ണതകളും പ്രമേയമാക്കിയാണ് ലിജോ ഈ ചിത്രം ഒരുക്കുന്നത്. ലിജോ ജോസ് പെല്ലിശ്ശേരിയും കരണ് വ്യാസും ചേര്ന്നാണ് ചിത്രത്തിന്റെ തിരക്കഥ രചിച്ചിരിക്കുന്നത്. വിഖ്യാത സംവിധായകൻ രാജ് കുമാർ ഹിരാനിയുടെ മകൻ വീർ ഹിരാനി അല്ലെങ്കിൽ ഷാഷി കപൂറിന്റെ കൊച്ചുമകൻ സഹൻ കപൂർ എന്നിവരിലൊരാൾ ചിത്രത്തിൽ നായകനായി എത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. അബ്ജയ് വർമ്മയും ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്.
ലിജോയുടെ സ്വന്തം നിർമ്മാണ കമ്പനിയായ ആമേൻ മൂവി മൊണാസ്ട്രിയും ഹൻസൽ മെഹ്തയുടെ ട്രൂ സ്റ്റോറി ഫിലിംസും ചേർന്നാണ് ചിത്രം നിർമ്മിക്കുന്നത്. മോഹൻലാൽ നായകനായ ‘മലൈക്കോട്ടൈ വാലിബൻ’ എന്ന ചിത്രത്തിന് ശേഷം ലിജോ സംവിധാനം ചെയ്യുന്ന ഈ ബോളിവുഡ് പ്രോജക്റ്റ് ആമസോൺ പ്രൈം വീഡിയോയുടെ 2026-ലെ സ്ലേറ്റിലാണ് പ്രഖ്യാപിക്കപ്പെട്ടത്. ഹോളിവുഡ് നിലവാരത്തിലുള്ള ദൃശ്യാവിഷ്കാരത്തിന് പേരുകേട്ട ലിജോ, ബോളിവുഡിലും തന്റെ വിസ്മയങ്ങൾ ആവർത്തിക്കുമെന്ന പ്രതീക്ഷയിലാണ് ആരാധകർ.
