യുവതാരങ്ങളെ അണിനിരത്തി സജിൽ മമ്പാട്ട് സംവിധാനം ചെയ്ത ‘ഡർബി’ (Derby) എന്ന ചിത്രം തിയേറ്ററുകളിൽ വൻ വിജയമായി മാറുന്നു. റിലീസ് ചെയ്ത ആദ്യ വാരത്തിൽ മികച്ച കളക്ഷൻ നേടിയ ചിത്രം ഇപ്പോൾ വിജയകരമായി രണ്ടാം വാരത്തിലേക്ക് കടന്നിരിക്കുകയാണ്. കേരളത്തിലെ ഭൂരിഭാഗം തിയേറ്ററുകളിലും മികച്ച ഒക്യുപ്പൻസിയോടെയാണ് ചിത്രം പ്രദർശിപ്പിക്കുന്നത്. യുവാക്കളുടെയും കുടുംബപ്രേക്ഷകരുടെയും വലിയ പിന്തുണയാണ് ചിത്രത്തിന് ബോക്സ് ഓഫീസിൽ കരുത്താകുന്നത്.
കേരളത്തിലെ വലിയ വിജയത്തിന് പിന്നാലെ ചിത്രം വിദേശ രാജ്യങ്ങളിലേക്കും റിലീസിനായി ഒരുങ്ങുകയാണ്. ജിസിസി (GCC) രാജ്യങ്ങളിലും യുകെ (UK) ഉൾപ്പെടെയുള്ള യൂറോപ്യൻ വിപണികളിലും അടുത്ത ദിവസങ്ങളിൽ ചിത്രം പ്രദർശനത്തിനെത്തും. പ്രവാസികൾക്കിടയിൽ ചിത്രത്തിന് വലിയ കാത്തിരിപ്പാണുള്ളതെന്ന് വിതരണക്കാരായ സ്ട്രൈറ്റ് ലൈൻ സിനിമാസ് അറിയിച്ചു. ഒരു കായിക പശ്ചാത്തലത്തിലുള്ള ആക്ഷൻ ഡ്രാമയായ ‘ഡർബി’ വിദേശ മലയാളികൾക്കിടയിലും ശ്രദ്ധിക്കപ്പെടുമെന്നാണ് അണിയറപ്രവർത്തകരുടെ പ്രതീക്ഷ.
ആദം സാബിക്, അമീൻ, ഹരി ശിവറാം, സാഗർ സൂര്യ എന്നിവരോടൊപ്പം ഷൈൻ ടോം ചാക്കോയും ഒരു പ്രധാന വേഷത്തിൽ ചിത്രത്തിൽ എത്തുന്നുണ്ട്. ഗോപി സുന്ദറിന്റെ സംഗീതവും അഭിനന്ദൻ രാമാനുജത്തിന്റെ ഛായാഗ്രഹണവും ചിത്രത്തിന്റെ വലിയ പ്ലസ് പോയിന്റുകളാണ്. മാൻസൂർ അബ്ദുൾ റസാഖ് നിർമ്മിച്ച ഈ ചിത്രം സമീപകാലത്ത് ഇറങ്ങിയ സ്പോർട്സ് മൂവികളിൽ ഏറ്റവും മികച്ചതെന്ന് പ്രേക്ഷകർ വിലയിരുത്തുന്നു. രണ്ടാം വാരത്തിലെ കളക്ഷൻ റിപ്പോർട്ടുകൾ കൂടി പുറത്തുവരുന്നതോടെ ചിത്രം ഈ വർഷത്തെ വലിയ ഹിറ്റുകളിലൊന്നായി മാറുമെന്നാണ് കണക്കാക്കുന്നത്.
