കെ. ജി. ജോർജ് സംവിധാനം ചെയ്ത ‘മേള’ (1980) എന്ന ചിത്രത്തിലൂടെ മമ്മൂട്ടിയുടെ നായികയായി അരങ്ങേറിയ താരമാണ് ആന്ധ്രാ സ്വദേശിയായ അഞ്ജലി നായിഡു. വന്യമായ സൗന്ദര്യവും ആകർഷകമായ നേത്രങ്ങളും കൊണ്ട് എൺപതുകളിലെ സിനിമാപ്രേമികളുടെ മനസ്സ് കവർന്ന നായികയായിരുന്നു അവർ.
‘മേള’യ്ക്ക് ശേഷം ഐ. വി. ശശിയുടെ ഹിറ്റ് ചിത്രമായ ‘ഈ നാട്’ (1982) എന്ന സിനിമയിൽ മമ്മൂട്ടിയോടൊപ്പം ‘മാനത്തെ ഹൂറി പോലെ…’ എന്ന സൂപ്പർഹിറ്റ് ഗാനരംഗത്തിൽ അഞ്ജലി തകർത്തുപാടി അഭിനയിച്ചു. കൂടാതെ ‘തകിലുകൊട്ടാമ്പുറം’, ‘കയം’, ‘കൂടവിടെ’, ‘വേട്ട’ തുടങ്ങിയ നിരവധി ശ്രദ്ധേയ മലയാള ചിത്രങ്ങളിലും, സഞ്ജീവ് കുമാർ നായകനായ ‘ശ്രീമാൻ ശ്രീമതി’ എന്ന ഹിന്ദി ചിത്രത്തിലും രാമായണം സീരിയലിൽ ഊർമിളയായും അവർ വേഷമിട്ടു.
അതിസുന്ദരിയും കഴിവുള്ള നടിയുമായിരുന്നിട്ടും എൺപതുകളുടെ അവസാനത്തോടെ അഞ്ജലിക്ക് സിനിമയിൽ അവസരങ്ങൾ കുറഞ്ഞു. എൺപതുകളുടെ ഒടുവിൽ ഇവരുടേതെന്ന പേരിൽ പ്രചരിച്ച ചില വിവാദങ്ങളോടെ താരം പൂർണ്ണമായും ചലച്ചിത്ര രംഗത്തുനിന്ന് അപ്രത്യക്ഷയാവുകയായിരുന്നു. ഏഴ് വർഷത്തെ സിനിമാ കരിയറിന് ശേഷം ചലച്ചിത്ര ലോകത്തോട് വിടപറഞ്ഞ അഞ്ജലി നായിഡു നിലവിൽ ഓസ്ട്രേലിയയിൽ കുടുംബത്തോടൊപ്പം സ്വകാര്യ ജീവിതം നയിക്കുകയാണെന്നാണ് റിപ്പോർട്ടുകൾ.
