ബിഗ് ബോസ് ആറാം സീസണ് വേണ്ടിയുള്ള കാത്തിരിപ്പിലാണ് മലയാളി പ്രേക്ഷകർ. ആരൊക്കെ മത്സരാർഥികളായി എത്തും എന്ന കാര്യത്തിൽ സോഷ്യൽ മീഡിയയിൽ ചർച്ചകൾ തുടങ്ങി കഴിഞ്ഞു. കഴിഞ്ഞ സീസണിന് മുമ്പ് സംഭവിച്ച പോലെ സോഷ്യൽ മീഡിയ താരം അമലാ ഷാജിയുടെ പേരാണ് പറഞ്ഞു കേൾക്കുന്ന പട്ടികയിൽ ഉള്ളത്. ഇത്തവണയെങ്കിലും അമലാ ഷാജി മലയാളം ഷോയിൽ ഉണ്ടാകമെന്ന പ്രതീക്ഷയിലാണ് ആരാധകർ.
ജനപ്രീതിയുള്ള ഒരു സോഷ്യൽ മീഡിയ താരം ബിഗ് ബോസിൽ ഉണ്ട് എന്ന് ഏഷ്യാനെറ്റും പരസ്യ വാചകമായി പറഞ്ഞപ്പോൾ കഴിഞ്ഞ സീസണിൽ അമലയുണ്ടാകുമെന്ന് ആരാധകർ പ്രതീക്ഷിച്ചിരുന്നു. പിന്നീട് വൈൽഡ് കാർഡ് എൻട്രിയായെങ്കിലും താരം എത്തുമെന്ന് ആരാധകർ ആഗ്രഹിച്ചു. എന്നാൽ, അതും സംഭവിച്ചില്ല. സോഷ്യൽ മീഡിയിൽ വൻ സ്വാധീനമുള്ള തിരുവനന്തപുരം സ്വദേശിയാണ് അമല. മലയാളി ആണെങ്കിലും തമിഴ്നാട്ടിൽ അടക്കം വലിയ ആരാധകക്കൂട്ടത്തെ സൃഷ്ടിക്കാൻ അമലയ്ക്ക് സാധിച്ചു.
ടിക് ടോക്കിലൂടെ തുടങ്ങി ഇപ്പോൾ ഇൻസ്‍റ്റഗ്രാമിലും യൂട്യൂബിലുമൊക്കെ നിരവധി ഫോളോഴ്‍സുള്ള മിന്നും താരമായി അമല മാറുകയായിരുന്നു. ഹ്രസ്വ വീഡിയോകളിലൂടെ ശ്രദ്ധയാകർഷിച്ച അമലാ ഷാജി രാജീവ് ഗാന്ധി അക്കാദമി ഫോർ ടെക്‍നോളജിയിൽ നിന്നാണ് ബിരുദം നേടിയത്. സിനിമയിൽ അമലാ അരങ്ങേറ്റും കുറിക്കുന്നുവെന്ന വാർത്തകളും അടുത്തിടെ പുറത്ത് വന്നിരുന്നു. ഇതിനിടെ സിനിമ പ്രമോഷൻ നടത്തുന്നതിന് വേണ്ടി താരം വൻ തുക ആവശ്യപ്പെട്ടു എന്ന് ആരോപിച്ച് ഒരു സംവിധായകൻ രംഗത്ത് വന്നതും ചർച്ചയായി.
